淪落人 Still human

昌榮因為一次意外導致半身癱瘓，雙手亦有限度活動，他獨居在公屋單位內，好兄弟替他請了一個菲傭 Evelyn 照顧他，Evelyn 以前是護士，為了要賺錢與丈夫離婚，所以來港做傭工，由於她以前是護士，要照顧昌榮這類行動不便的人，對她來說沒有太大困難，Evelyn 本身亦有自己的夢想，希望能當攝影師，在照顧昌榮的期間，兩人由言語不通，到互相扶持，昌榮希望能幫助 Evelyn 實現自己的夢想........!

早一星期前已經想睇呢套戲，見到攞咗最佳男主角同最佳新演員，更加想睇下，套戲都幾感人，男女主角都演得好好，只係男主角姊弟之間有咩問題，同埋 Evelyn 點解要離婚，都冇交代到，戲入面菲傭之間講點樣偷懶，實際上與一些好的僱主建立的感情，都好令人感動！

閃亮人生 The Upside

Dell 在假釋期間，仍然不務正業，為了應付假釋官，佢要去搵三份工，要僱主簽署文件表示佢有見過工，佢原本以為第三份係清潔工，卻原來係要照顧一個全身癱瘓嘅人 Philip ，原本佢都無意在此工作，但係因為前妻和兒子已經對佢非常失望，唯有硬着頭皮試一試，他發現這裏還提供住宿，正合佢這個無家可歸的人，而且人工也不錯，所以就繼續工作，Philip 因為一次滑翔傘意外導致全身癱瘓，加上前妻去世，他可以說是生無可戀，但兩個不同世界的人相處下來，又可以成為知己.......!

七年前已經有另一套閃亮人生，但是我都有睇套戲，今次呢套同上次嘅劇情係差唔多，上一套係比較認真D，呢套就搞笑多D，兩套嘅男主角都做得好好！

大都烤鴨

今朝因為老細生日，我地買左士多啤梨蛋糕比佢，下午開完會，老細的老細又買左蛋糕比佢，原來仲有另一同事生日，仲要買左同一款士多啤梨生日蛋糕！

夜晚又有生日飯局，去左呢間一直想試，終於今個月會食兩次的飯店！我先去 Tony Wong 度買個拿破倫，今日食左兩次士多啤梨蛋糕，所以買個芒果拿破倫！其實見佢有玫瑰花蛋糕。但係比較貴，怕佢地嫌貴，所以冇買，其實今日有八個大人，除開都唔太貴！下次人多D先買啦！

我地10個人所以安排左房入面一張大枱，房裏面仲有另一張大枱，暫時未有人坐，不過擔心有兩枱客嘅時候會好嘈，我地好快就齊人，叫咗壽星女最想食嘅片皮鴨同埋小籠包，仲有松子魚、叉子燒餅、炸豆腐、奶油娃娃菜、兩個炒飯同埋擔擔麵，片皮鴨好食，小籠包都好好味，其他就OK啦！擔擔麵個麵好似烏冬咁，有別一般擔擔麵！炸豆腐好滑，呢度嘅餸份量較細，食完飯之後，我地叫咗甜品食，係甜品餐牌上面嘅甜品每款都有叫，最好味係個番薯，個個以為係炸芋頭，因為外型似反沙芋，其實係番薯，反而果個鴨子造型的酥餅就唔係咁好食，食完飯我地食埋蛋糕，壽星女話蛋糕好好味，當然 Tony Wong 嘅蛋糕一定有返咁上下水準！

密室逃殺 Escape room

有六個人分別收到一個黑色嘅小盒，入面都有邀請函，邀請佢地參加一個密室逃脫嘅遊戲，佢哋上到去大廈嘅接待處，坐住等嘅時候，遊戲就已經開始，接待處已經係第一個密室，佢哋要尋找線索去離開密室，佢哋發覺如果離開唔到個密室，只有死路一條........!

同好友食完飯之後，一齊去旺角睇戲，呢套戲上左畫都已經兩個幾星期，之前冇諗住睇，不過好友話睇過影評，話好睇，所以去睇下，入場的人不多，大概只有十幾個人，套戲都幾緊張，每一個密室都好危險好緊湊，不過個結尾就比較爛，好似匆匆忙忙完結左等拍下一集咁！

三陂小廚

由迪士尼出去荃灣都好快，約咗好友去三陂坊食飯，好友話好好食，所以要約我一齊去食，我去到佢地仲未到，我先去攞位，佢地好快就到，我地四個人可以叫多幾個餸，佢地話個冰鎮咕嚕肉好好食，所以一定要叫個大，另外仲叫咗炸子雞半隻、豉汁蒸䱽魚、西芹鮮魷、啫啫生菜煲、豉油王炒麵，冰鎮咕嚕肉味道都唔錯，不過咸咗D，佢用冰鎮住，令到表面嘅糖變硬左，食落口有種脆嘅感覺，其他餸就一般啦！都係一般小菜！如果去開都可以再食，但係就唔會特登搭車入去食！

蟻俠與黃蜂女：擊戰特攻！Ant-Man and the Wasp: Nano Battle!

上星期開幕嘅蟻俠與黃蜂女機動遊戲，今日去試吓玩，原本上個星期五有會員優先試玩，但係要返工去唔到，今日放假就一定要去試一試先！

尋晚一覺瞓到今日一點先起身，好好瞓，瞓醒先去食啲嘢，去咗茶木食咗碗面，飲咗杯水果茶，然後就搭車入去！

入到去已經三點幾，今日巡遊已經做咗，所以冇得睇，咁就直接去玩機動遊戲啦，今日有D熱，因為有太陽，但係人唔多，諗住會排好長龍，雖然佢都排到去出面，但係條龍都行得好快，大概5-10分鐘就已經可以玩，個機動遊戲位置係以前巴斯光年果個位，都係以前同一個入口，入到去見到一駕駕車，好似以前巴斯咁，只係個造型唔同咗，都係有兩支槍，其實成個遊戲同以前巴斯光年好相似，我覺得佢基本上係同巴斯光年果條路軌係一樣，只係行相反方向，基本上個內籠，同之前冇分別，只係D裝飾唔同晒，都係射擊目標計分！

因為人唔多所以玩多次，又玩埋Iron Man，去蟻俠個商店睇下，買咗頂 cap 帽，再去玩埋迷離大宅，行過去果陣時經過森林果邊，見到有 Moana，所以同佢影咗張相，行到去城堡，見到城堡仲整緊，似乎係拆咗一部份再起過，跟住行咗去小鎮大街，睇吓有冇乜嘢買，都冇嘢睇啱，啱啱好有朋友約我食飯，所以就早D離開！

炸雞特攻隊 Extreme job

緝毒組組長連同下屬一共五個人，辦案經常錯漏百出，幾乎要解散全組人，在一個同輩升職的時候，提供了一個重犯的資料給他，於是他們五人到疑犯對面的炸雞店部署，希望能夠捕獲重犯，在此期間，生意冷清的炸雞店要結業，他們為了繼續監察疑犯的一舉一動，唯有頂手接了這家炸雞店，由於有人蝦到店內光顧，他們唯有硬着頭皮去做炸雞，豈料炸雞大受歡迎，令他們忙得無法查看...........！

今個禮拜都有好幾套戲上畫，都未諗到睇咩戲，見到呢套戲個影評唔差，所以去睇下先，近年都多左韓國電影，可能香港人都喜歡煲韓劇，所以韓國電影都受歡迎，套戲都幾搞笑，有場戲明明男主角喺度喊，都會令人覺得好好笑，不過我覺得可以再豐富D笑料，有D位可以做得再搞笑D，雖然有幾個位係悶悶地，但係整體都算係好笑！

Texas burger

放假睇返場戲先，睇戲之前當然要食D嘢啦，上咗朗豪坊搵嘢食，星期日周圍都好多人，見到呢間漢堡包店冇乜人，咁就試下佢啦！

呢度以前係一間咖啡店，都經營左一段時間，應該轉咗做漢堡包店唔係好耐，呢度有幾個卡位，其餘都係四方枱，今日都係得四、五枱客，我揀咗個車打芝士牛肉漢堡，同埋一杯橙汁，其實可以跟套餐要埋薯條同汽水，但係兩樣都唔係我嘅喜好，所以叫杯橙汁飲就算啦，見到個漢堡包有D失望，因為個麵包冇芝麻！最鍾意食有芝麻嘅麵包，芝士亦都唔算濃厚，牛肉就不過不失！

燒邦特色燒烤、晶晶甜品

好耐都冇去天后食嘢，呢日因為睇咗介紹，所以你就試吓，相約好友一齊去食，呢間小店真係好少，店內只有12個位，而且係幾逼夾，睇呢度的裝修好舊，應該開咗好耐，如果呢度開放式廚房嘅話，就可以加多幾張枱，今晚有三枱客，除咗我地兩個，另外一枱係三個人，另外一枱係六個，呢度主要係食串燒同埋海鮮，佢呢度有幾個魚缸養左D海鮮，不過唔多，主要都係貴價海鮮，例如龍蝦、鮑魚、花竹蝦，我地就叫咗兩隻扇貝，其他野都係每樣叫一串試吓先，叫咗白鱔、牛柳、芝心丸、雞翼等等，因為叫咗辣嘅所以有好多七味粉，太多七味粉唔係好食得到本身食物嘅味道，不過食材都唔差，飲品我哋就叫咗洛神花茶，不過佢係非常細樽，應該唔夠200 ml ，食辣野來講真係唔夠飲，所以要叫多支，其實佢有樽裝烏龍茶，但係夜晚我唔想飲茶，又唔想飲汽水，所以唯有叫多支 ，雖然我地傾計唔係好大聲，不過隔離枱果個男人講嘢好大聲，又同隔離果台六個人吹水，所以好嘈，我哋食完果陣，隔離兩枱都走啦，所以基本上一次過清場，不過佢之前有其他客想食野，就安排左坐係店外面路邊，落完兩天氣涼涼地，坐出邊應該都無所謂，而且呢段馬路唔係咁多車！

食完飯我地去食甜品，去咗斜對面有間叫做晶晶甜品，一人食咗一碗糖水就走！