2024年4月九州鹿兒島自駕遊 Day 3 - 植物園Florante 宮崎、堀切峠、鹿兒島市

今朝早少少去食早餐，去咗我哋最鍾意去嘅 コメダ珈琲，呢間coffee shop嘅早餐時間，係買咖啡送麵包，雖然只係半塊方包，不過佢係厚切嘅，再跟埋牛油或者果醬，仲可以揀配烚蛋🥚、蛋沙律或者紅豆醬🫘好味！順便又買D花生，因為佢嘅咖啡通常跟一小包花生，而果包花生亦都有得賣，通常都買一包入面有30包細嘅，買嚟做手信 👍🏻 食完嘢行返過去酒店嗰邊，經過有間商店，叫做金城堂，零零舍舍一間舖頭淨係賣手信，應該係日本傳統嘅手信，入邊亦都有位俾人坐，門外都有幾個泊車位，我哋又入去睇吓有啲乜嘢買，佢嘅手信主要係一啲蛋糕，同埋類似豆沙餅嘅手信，亦都可以買咗坐低食，佢仲有免費飲品提供，我揀咗兩款手信送俾朋友，不過佢個有效期比較短，都係一個禮拜內要食完，所以唔敢買咁多，買完行到返去酒店門口，見到隔籬橫街做緊楠並木朝市，又入去八卦吓，見主要係買一D自家種嘅蔬菜、番薯，又有賣咖啡、茶葉嘅檔攤，好友就買咗番薯🍠，我就買咗玄米茶，跟住就返酒店check out ！

今日第一個行程係去植物園Florante 宮崎，呢度係一個好大嘅公園，以植物做主題，所以有好多花花草草🌹🪻🌺🌷🪷🌻🌾🪴，今日天氣好D，有少少太陽冇落雨，啱晒睇花，地方好大人唔多，早知帶埋架飛機仔嚟 😆

去完植物公園再揸車去堀切峠放飛機，放咗差唔多一個鐘，再揸10分鐘車去搵地方食晏，因為大家都肚餓啦，最近有一間叫做南風茶屋嘅小店，呢度附近一帶就只有呢間食店，所以佢都有啲客，我哋去到嘅時候已經兩點幾，佢都有幾台客差唔多食完，我哋就叫咗三個套餐，有親子丼、兩款炸雞set，個炸雞好食，D雞肉好有雞味，雖然間店舊舊地，但係套餐都好平，都係1000円多D，好抵食👍🏻👍🏻

食飽飯，揸返車過去鹿兒島市，上咗車冇耐開始落雨，去到公路仲好大雨㖭🤦🏻‍♀️ 我哋去中途站休息嘅時候見到有好多超跑，排隊入油，平時在日本好少見到呢D超級跑車 😍😍 我哋喺中途站買咗啲手信，上返車繼續行程！

下一站去一個叫 Across Plaza ，近住市中心，呢度係一個大型商場，不過入到去好似冇乜嘢睇，我哋見到有間叫做Direx 的超市，一入去就見到藥妝部，睇吓啲價錢都好平，平過我哋之前睇過嘅藥妝店同埋Donki，最多仲平30% 😳 我哋即刻入貨溝淡，買咗兩籃嘢，主要係藥妝同埋一D食物，順便買咗D魚生上車食，一買嘢啲時間就過得好快，又要趕住走，因為已經七點幾，太夜又驚冇嘢食，雖然我哋喺車上面食咗少少魚生，不過都要食正餐，所以我哋都揸車返酒店放低行李先，酒店唔遠，不過酒店冇停車場，要喺附近泊車，我哋先寫低行李，上去大堂問咗泊車情況，職員俾咗張地圖我哋，叫我哋拍後邊街嘅停車場，我哋上房擺低行李，就出去食飯，酒店喺大街近天文館，附近好旺，應該係鹿兒島市嘅中心，我哋行咗去後面街搵嘢食

搵咗一間食串燒嘅叫做燒鳥たけなわ，我哋冇訂位，不過佢有枱，店嘅面積唔係好大，有三張半榻榻米枱，即係佢係榻榻米，但係唔係跪喺度嗰種，係坐喺度，不過要除鞋，我哋睇緊餐牌嘅時候，有個侍應埋嚟用英文問我哋嚟自邊度？我哋話香港嘅時候，佢就用國語同我哋講嘢，咁就方便溝通，我哋揀咗一個雜錦串燒、手羽先、五花腩、馬刺、雞髀刺身、雞腎刺身、餃子、豬軟骨串，有好多嘢食都賣晒，因為太晏喇！😅 雞嘅刺身好好食，馬刺就麻麻哋，其他串燒都唔錯，不過不失👍🏻

食完飯我哋行去便利店睇吓有冇甜品買，睇唔啱又行去Donki睇吓，見到有好熱賣果隻 Brûlée 甜品，之前去東京都冇食過，因為東京成日都俾人買晒，佢已經出多咗一隻朱古力味，不過我未食過，所以試咗原味先，我哋買返酒店食，個甜品表面係一層焦糖，不過比較厚，如果可以做薄D就更加似，布甸都幾滑，味道唔錯！

酒店住後感：
Daiwa Roynet Hotel Kagoshima Tenmonkan Premier
酒店位於鹿兒島市中心，一個叫做天文館嘅商店街，類似大阪心齋橋咁，酒店對正大街，呢度有電車🚋，所以係最旺嘅一個地方，酒店好新淨，我諗可能開咗一兩年，因為成座酒店對比附近嘅建築物係最新淨嘅一座，接待處在7樓，因為一至六樓係商場，酒店嘅大堂都幾大，有好大Area 梳化俾人坐，亦都係有人接待做check-in，大堂亦都可以自取護膚品、漱口水、牙刷等物品，我住嗰間房就喺7樓，即係酒店大堂旁邊，有個玻璃門要拍卡入去，住喺呢層我覺得好方便，好有住樓上要再搭lift，佢哋間房話有按摩椅，我間房就冇，我估計7樓可能係一啲商務房，因為房入面有燙褲嗰個部機，房入面嘅空間都唔算細，有一張小枱，酒店嘅設備都幾齊全，房入面有捲髮器、直髮夾、風筒，都係 ReFa 呢個牌子，另外仲有一包兩塊舒緩貼，類似「休足時間」咁樣，呢間酒店真係唔錯，如果有朋友去鹿兒島巿我都建議住呢間👍🏻

2024年4月九州鹿兒島自駕遊 Day 2 - 青島鬼之洗板、日南太陽花園、鵜戶神宮、Aeon mall 永旺夢樂城宮崎

今朝約咗好友10點集合，一早起咗身，走落去餐廳飲咗杯咖啡，然後去旁邊嘅商店街行咗兩個圈，時間太早啲舖頭全部未開，四圍睇吓影吓相，出邊街嘅十字路口應該係附近最繁忙嘅地方，見到路邊嘅花都仲得幾靚，又影吓一啲相，再行返去酒店等好友！

我哋攞埋行李上車，因為今次行程每晚都唔同酒店！今朝第一個行程就係青島嘅鬼之洗板，記憶中以前跟團去過呢個地方，我哋首先拍低架車喺 Aoshima Beach Village 外面，沿着沙灘行去一條叫做彌生橋，係通往一個小島，小島呢邊係有一D鬼之洗板，呢過海灘環境好靚，好有度假feel，小小嘅島上都有間神社，見到有一個伯伯嘅小攤檔，賣緊一啲貝殼，同埋用貝殼做嘅裝飾品，我買咗一盒貝殼俾好友，因為佢屋企個魚缸係冇水嘅，淨係擺貝殼🐚😄 我哋四圍行吓影吓相，我就攞假Hover 出嚟拍吓片，好開心！行咗一陣行返去度假村嗰邊，見到有架舊舊地嘅篤篤車咁嘅物體，可以車遊客過去青島兜一個圈，都幾得意，跟住我哋行去廁所嘅時候，見到對面有一個宮崎縣市立青島亞熱帶植物園，但係我哋趕住要去下一個點唔夠時間，所以就喺門口睇咗陣就要去攞車！

我哋趕住去下一個地方，就係一間叫做伊勢海老料理大海嘅食店！佢開11點，我哋諗住12點去到應該可以食到第二轉，我哋揸車要20分鐘先去到，去到見到好多車泊咗喺度，門口亦都有幾個人等緊位，我哋先去攞位，好友泊完車，諗住放吓飛機，點知好快就有位，餐廳唔算好大，睇落有大概10張枱，不過佢仲有樓上，我哋冇上去睇，店門口例牌有啲食物賣，呢度就賣日向夏，係一種好似橙咁樣樣嘅水果，另外仲有啲陶瓷售賣，亦都有D毛公仔，我哋未有位之前已經睇咗餐牌，揀左一個龍蝦套餐，雖然係二人餐，我哋諗住必要時再加啲嘢食，套餐兩款兩隻螺、有一隻龍蝦🦞刺身、一隻蒸龍蝦🦞、一隻鮑魚刺身、四款刺身、龍蝦湯、龍蝦飯，龍蝦刺身好新鮮好爽口好好食🤤，鮑魚都好爽，整體嚟講全部海鮮都好新鮮，雖然唔係好多嘢食，但係三個人食都夠飽！👍🏻👍🏻 走嗰陣買咗袋日向夏，留返呢幾日慢慢食，一包有12個左右，只係¥800 ，好抵！

食飽飯就諗住出嚟放飛機，點知佢就落雨！咁唯有去咗下一個行程先，車程五分鐘就去到日南太陽花園！之前上網見到呢個公園已經好想去，因為佢係仿照復活島上面嘅巨石🗿，做咗七個巨石像🗿，而且呢個公園都幾大，有D位置要行樓梯，我哋嚟到一直都落雨，所以影出嚟啲相比較暗，同埋角度都唔係太理想，因為要攞遮☔️只能夠單手影相🤦🏻‍♀️ 呢度除咗巨石之外，仲有一排彩色嘅人偶，一字排開咁樣坐，每個人偶一個色，都係呢度其中個打卡點！

我哋由上而下，先上咗去最高位，再落返嚟影巨石像🗿，今日可能因為落雨，所以唔係太多人，見到每組人基本上都可以影到冇人嘅巨石像🗿，因為一批人影完就到第二批，大家都唔阻大家👍🏻如果天氣好影出嚟應該都好靚，不過巨石🗿咁巨型，影出嚟個人又會好細🤏🏻🤣 睇完巨石像，再去睇烏龜，呢度有三隻大烏龜🐢🐢🐢好大隻，匿喺屋仔度郁都唔郁，睇完烏龜就去行吓商店買手信，買咗少少手信，又見到之前在香港Muji 買過嘅杏仁魚仔零食，而家香港Muji已經冇得賣，當其時賣$79 ，呢度只係賣¥700，好平！我買咗兩包，好友都話買兩包試吓 😆

下一站去鵜戶神宮，只係15分鐘車程就到！仍然落雨！泊好車之後要行一小段路，到入口見到一間商店同埋coffee shop，因為好大雨我哋就去 coffee shop 度食杯雪糕！日本嘅雪糕🍦真係好好食，平時在香港唔會點食，但係去日本就一定要食！😆 呢度又係有本地特色水果日向夏味甜品，在宮崎周圍都見到日向夏嘅產物！我就揀左芒果杯，𥚃面有芒果沙冰、軟雪糕同埋芒果粒，仲有個鳥居造型嘅餅做裝飾好得意好靚😍 好友就食完雪糕 🍦🍦😅

食完野冇咁大雨，就出去行吓，由入口行一段路同樓梯，先去到神社，呢個神社依海而建，海邊有D被海水侵蝕的石，有少少似鬼之洗板咁，而神社就建在岩石洞下面，據講呢個神社主要保佑孕婦順產，所以多女性來，而且呢度有個有一舊好似烏龜形狀的石頭，稱為“靈石龜石”，龜背中間有一個凹位，只要把神社外售賣的”運玉”拋往這個凹位裡，就叫做投擲運玉，D運玉應該係石頭出邊包咗一層好似陶咁嘅嘢，買5個運玉要¥200，男的用左手拋女的用右手拋，一邊許願一邊拋，我地買左5粒玩吓，結果係一粒都唔中🤣🤣🤣🤣🤣喺神社前面有一個釣魚占卜，我見條魚幾得意所以就釣咗一條，當然入面嘅籤文係唔知佢講乜，因為日文😅

我哋跟住行返出去商店度睇吓，買返少少手信，再行返出去攞車，我哋逗留咗一個鐘頭多少少，跟住就揸車去shopping ! 去返宮崎市，又去AEON，因為日本有好多間好大間嘅AEON，有好多免費停車位，而且好多食店都會黐住喺佢附近開獨立店，所以果一帶都會比較熱鬧，而佢嘅地點通常唔會喺市中心，基本上都係要揸車去，所以幾每次自駕都會去AEON，呢間AEON同其他樣一樣好大地方，我哋一入到去商場，就睇啱咗對鞋，我又買咗個袋，跟住就去超市行吓，一行入超市又睇啱咗一D帽，買完先知原來做緊七折，好有即刻call屋企人有冇人要，牌子係 Converse、Edwin、Chevignon，千幾円起，唔使$100 港幣，好友追加多兩頂😂 跟住買左樽裝水， 2公升只係賣¥70 😳平到呢！平時去便利店買樽細枝幾百 ml 都要 ¥100 😅 跟住又買啲嘢食、水果、手信、貓糧比朋友隻貓，一 shopping就唔夠時間，買完嘢已經用咗兩個幾鐘，仲要即刻去搵嘢食，因為太夜冇嘢食，見到附近有間 はま壽司，原本都唔係好想去，因為香港嗰間啲質素實在唔掂，不過我諗喺日本應該會好啲，最重要係我哋唔多夠時間，因為我哋想食嘅幾間都已經準備關門，唯有去試吓，走嗰陣時落好大雨，好彩有揸車，呢啲獨立嘅壽司店，通常門外都有啲泊車位，泊好車之後再去攞位，等咗大概幾分鐘就有位，因為我哋好肚餓，所以即刻喪嗌咗一D壽司，但係我哋都好冷靜地每樣叫一碟試吓先，試咗OK先至再追加 😂😂 質素冇想像中咁差，我仲覺得佢比而家嘅くら壽司好d，當年我哋第一次去九州食くら壽司，係最好食嘅一次，之後雖然在東京大阪食過幾次，都覺得大不如前了！食飽就返酒店休息了😴因為返到酒店已經10點了！

酒店住後感：

K’s Street Hotel Miyazaki

今晚煮呢間酒店同尋晚嗰間同一區，但隔咗幾條街，所以位置上都係比較旺嘅地方，酒店嘅大堂有少少舊而且唔係好大，佢係有人幫你check-in果種，即係冇自助check-in，房間都算幾新淨，浴室係冇浴缸，只有花灑，電視都比較細部，亦都有張書枱，比較尋日嗰間 Comfort Hotel ，我會覺得尋日果間好少少🤏🏻