志明與春嬌 Love in a Puff

跟朋友食完添好運之後就去睇戲，去到戲院想睇既戲已經睇左，未睇既又唔啱時間，得返一個選擇，就睇呢套。

故事係講一班煙民在後巷煲煙吹水，講是非之餘，亦因此發展出戀情，兩人的關係似是疑非........！

套戲因為有粗口而被列為三級，其實粗口不多，如果無粗口反而不夠真實，我諗對煙民來說一定好有共鳴，我都覺得好寫實，完全係時下年輕人的真實想法，而且攝影方面拍得很好！

添好運

終於走去試添好運，已經有心理凖備要等兩小時才可一嚐這間米芝連一星點心，與朋友約好先到先等，我兩點去到，見有些人在等位，但沒有人替人登記，只見門口寫着四時登記，有人走出來時，只掉下一句四點才登記，唯有打電話給朋友改地方，見自己miss了姊姊的來電，通完電話後，忽然想走回去問多次，這時又忽然派飛了，因朋友未到，我就待在那裡等候，等了一會，發現他們入坐的安排很亂，基本上是不會叫號碼，因為好多人取了飛就走開了，只要取飛後，四時前返來告訴負責登記的姐姐，她會mark低你的no.有枱就比你！我等左半個鐘就有位，因為我之前果廿幾個號碼都未返，但係我朋友未到，唔比我入呀！！到我朋友到左之後等左五分鐘就入得喇！

入到去，見得三十個位左右，我地坐在一張六位枱既中間打對面坐，我們兩人的左右兩邊的人都是自己一個人來的，這樣的安排卻好奇妙，幾個唔識既人，有共同既目的，大家都迷茫地等待，然後終於可以一起坐在這狹窄空間裏，大家都掛着滿足的笑容，然後各自為自己的點心拍照，大家都不期然互望笑了！坐在我朋友旁邊的是個外國人，他不時用他那部GF1拍照，他用英文追點心時，個店員用廣東話答，佢哋又溝通到，好攪笑！佢幾次想同我地講野，又唔知我地識唔識聽就無講，但係佢食個黑松露奶凍時，忍唔住向我地表示好好味！

點心紙要在入坐前寫，入坐時即時落單，我地見個個都話酥皮焗义燒包好食，但係要等好耐，所以我地叫兩碟！一人一碟！我地叫左蝦餃，燒賣，豬潤腸粉，粉果，鹿根，香茅午肉脆瓜餃，馬拉糕，桂花糕同新出既黑松露奶凍！d點心價錢由十元至十六元，真係物超所値，食物質素好高，焗义燒包好好味，最貴既黑松露奶凍$36，本來無叫，見個外國人食得咁開心，食完仲要加個外賣，我地就叫左個試吓，個奶凍除左有一片黑松露之外，奶凍裏面仲有黑松露碎，果然足料又好味！呢餐真係食得好開心！

宮廷眷戀─維多利亞與阿爾拔親王 The Young Victoria

這陣子有點悶悶不樂，可能天氣不太好，各人都忙著自己的事，少了聯誼，連facebook都 update少左，d人唔知去哂邊呢？

前幾日睇左呢套戲，都幾鐘意睇英國古裝，尤其宮廷服飾，好靚好優雅，今次呢套戲仲係奧斯卡最佳服裝獎，雖然唔係非常華麗，但係都好有果個年代既特色。

故事講述少女時的維多利亞，十八歲前，母親和她的親信(唔記得佢嘅職位叫做乜嘢名)經常想迫她簽署協政文件，讓他們可以操控她至廿五歲，但她堅決拒絕，亦因此她對二人非常討厭，而當時年邁的英皇威廉四世亦很愛護她，希望能活到她十八歲，好讓她能繼位，幸好她最終能繼承皇位，她登基後，都跟隨自己的意願去處理國事，年輕的她，當然有做錯的地方，亦有失去民望的時候，身邊的人都難以信任，幸得阿爾拔走進她的生命，一切都改變了..........!

羅馬假期 when in Rome

長假期前無乜戲睇，諗住睇套輕鬆d既，就揀左呢套，故事講事業為重既女主角，在羅馬參加妹妹的婚禮時遇到男主角，兩人互生好感，卻因誤會而沒有走在一起，女主角因失意走到羅馬噴泉，拾起噴泉內的金幣，令金幣的幾個主人都追她，當中有中年阿叔，有畫家，model，攪出好些笑話.........！

這類愛情小品像雨後春筍，卻不是每部都輕鬆惹笑，或感動人心，這部既不夠窩心，笑料又搔不到癢處，難怪不能在下期與其他電影較量！幸好男主高大靚仔，先有返d睇頭！不過覺得佢在Transformer穿上軍服有型d！同埋佢都好高，定係女主角矮？

brother & sister

呢兩日又凍返，仲好乾燥添！尋日去尖沙咀，行去Heritage果邊仲好大風！

最近睇到幾本雜誌都介紹呢間 brother & sister，就去睇吓啦，去到 Heritage都揾唔到地庫，原來這店是英皇珠寶的一部份，要入去珠寶店裏面，再落一層先見到，落到去見一邊仍是賣珠寶的，感覺有點高檔，另一邊就是餐廳，兩者中間有一個空位，主要用來攪event， 見之前做 event既布景都未拆，令人覺得餐廳主要是用來招待event的賓客多於用來招待街客，在餐廳入口有些梳化坐位，行入d就係賣首飾同服裝既地方，我無行入去睇，我諗d野太young唔啱我！行到梳化見有位就坐，d坐位都好舒適，好似Starbucks既梳化咁，只係呢度既梳化係皮革質地，坐位大概可以坐廿多人吧！侍應給了set lunch 的menu，只有三款素和三款肉的午餐選擇，要問有無其他餐牌才拿給你，侍應看來都較生手。

餐牌內選擇都不是很多，我地先選左蟹肉南瓜湯，我最鐘意飲南瓜湯，好味道！跟住係帶子沙律配日式柚子醋，帶子都幾大隻，沙律一般都唔會差，ok good! 到我好鐘意既煎鵝肝，好好味！只係個sauce小小唔夠甜，不過幾好食都係食半件好喇！始終高胆固醇！而且咁先回味無窮！

食完前菜，到主菜，上次食咗niji 既黑豚豬排之後，就想試吓呢度既黑豚豬排，不過呢度既豬排係薄切！先在心裏扣了分，加上煎得稍稍過籠，乾了點，塊排又比較瘦，吃起來不夠滑，反而伴碟的燒蕃茄幾好味！最後到意粉，一時唔記得沙律有帶子，又叫左帶子櫻花蝦天使麵，睇個樣都知比較清淡，味道都ok啦！

總唔少得甜品呢part！五款甜品選擇有兩款都無！不過最有興趣都係有既焦糖燉蛋同拿破倫雜果千層酥，燉蛋雖然老左dd，但蛋味香濃，唔錯！不過伴碟的cream好快溶！大慨是現成的支裝cream吧！成餐飯最失敗是那千層酥！單看顔色己令人失望，應該是現成冷藏酥皮，雖然脆，但係無味又唔香，中間雜果用cream夾着而不是吉士！都無所謂，但係未食已經溶了，實在太令人失望了！

niji Bistro

前兩日去尖沙咀食飯，去到海港城，攞本食肆指南睇吓，兩個小姨甥，一個想食pizza，一個想食蛋包飯，始終都想佢哋食飯，所以揀左食日式蛋包飯的niji Bistro.

過左City Super 再行過小小就見，店了不算大，有些坐位在路邊，店內還有餐具賣，睇menu原來有pizza 食，咁就一次過滿足兩個細路既要求啦！我地叫左沙律，蝦pizza，意粉，蛋包飯，黑豚肉豬排，甜品。

餐前先來幾個牛角包，個外皮好脆，不過味道就淡左d，沙律比想像中大份，有我喜歡既巴馬火腿同水煮蛋，仲配左七種sauce，有wasabi，芒果，黑醋，千島等等，都幾得意，食完牛角包同沙律都飽飽地，主菜飯麵幾乎一齊到，個意粉好細份，不過都夠食既，個wasabi sauce辣辣地，只係比較杰身，個蛋包飯我無食到，我都係想食 pizza, 個pizza 用左蝦同埋沙律醬，紫菜，和風口味，都唔錯！最好味係黑豚豬排，肉質同平時食既豬排唔同，加上厚切，好好味呀！配埋切成方粒形既薯仔，真情係想再食呀！

甜品係兩件蛋糕，店門外有整個售賣，不過味道無乜特別，唔食都唔會覺得有損失。

最近upload上個 blog都要 load幾次，最慘係要重新打過，真係激氣！

拆彈雄心 The Hurt Locker

第一個金像獎女導演所拍既全男班電影，故事題材較新，在得獎後更吸引多人入場，我沒有第一時間去睇，因為比較想看些輕鬆點的電影，尤其在大時大節前，一般都無乜戲好睇，大可在復活節檔期前，慢慢去睇都未遲！

故事講述在巴格達的美軍，其中一隊拆彈小組，新來的 leader，性格古怪，對炸彈瘋狂着迷，而且視死如歸，每次行動，都沒有理會隊員，令兩個拍檔都對他非常不滿，在他們合作的三十八天裏，三人出生入死，經歷多次危險.........！

老實說，氣氛相當緊張，幾場拆彈戲和槍戰都看得心跳加速！難怪得獎，此導演其他的電影我都沒有看過，今次能打贏前夫的阿凡達，確係爭氣！

歲月神偷 Echoes of rainbow

久遺了的港産片，唔記得上次响戲院睇過乜嘢港産片，呢套因為攞左獎，加上係秋天的童話既導演，相信唔會令人失望吧！

套戲聽講係導演自己的童年，背景應該係五六十年代吧！任達華和吳君如演的兩夫婦，和哥哥秦沛，分別在街頭街尾擺檔，哥哥做理髮，弟弟做鞋，任達華有兩個兒子，大仔讀書成績很好，又是運動健將，還考上了男拔萃，細仔讀緊小學，常常貪玩比老師罰，，故事主要講哥哥喜歡了一個女仔，可是這女仔家境非常富裕，還要舉家移民到美國，兩人無奈分手，此時，他亦證實患上血癌.......！

故事記錄了那個年代的人情味，那時代真正的隣里關係，他們經歷貪腐的社會，天災的傷害，如何仍勇往直前，夫婦兩人為兒子，不惜一切，令人非常感動，那份情懷難怪能打動外國的評審，無論是那個年代的朋友都應該去睇，戲中各人都演得很好，影帝影后的演出故然出色，兩個新人都超出預期，小朋友亦很惹笑，尾段可要預備紙巾喔！

複雜關係 It's complicated

Trailer出左好耐，一直等佢上，都幾鐘意睇 Meryl Streep，雖然有六十歲，看起來像五十歲，由失落的失婚婦人，到春風滿面再有愛情，都演得恰到好處！

故事講Meryl Streep與Alec Baldwin離婚十年，相方關係像朋友，而且有三個子女，令他們不時會見面，亦認識他年輕性感的現任妻子，Meryl Streep有自己的麵包店，當最年幼的女兒都上大學了，她開始過一個人的生活，兒子在紐約行畢業禮時，他們都住在同一酒店，一晚因倆人飲醉了而上了床，前妻變了婚外情？就這樣開始了他們這段複雜關係.......！

其實套戲估唔到咁好笑，中段打後幾場戲都好好笑，有一場d人笑到聽唔到對白！其實果段在trailer都有，不過當時覺得好笑，尤其佢個大女既未婚夫，好搶鏡！除左好笑之外，都令人對有問題的婚姻重新思考，是否欠缺溝通才會分開?

S M L

很久沒有去時代廣場裡面食飯，今天去了11樓的SML，此店的特色是食物分三種size的份量，正是店名 S M L 細中大，店子主要賣pasta意式食品，現正做墨西哥食品promotion，餐牌上的中文用了簡體字，大概迎合國內遊客吧！有好些菜式想試，既然有細碼選擇，就可多揀幾款了！

我地叫左兩款沙律，有凱撒沙律和巴馬臣芝士配火箭菜黑醋橄欖油沙律，我比較喜歡用沙律油配沙律，不太喜歡用沙律醬，所以意式沙律就好啱我！我還叫了魚湯，等了很久才到，餐牌寫明食物不會順序上，做好的就先上，所以一早來了飲品，沙律，奇怪是湯應該一早煲好，只需倒入碗就可以上，卻要等到很遲才上？？

Pasta 叫了蜆意粉，另外又叫了牛尾燴意大利飯，這是唯一一款飯，我也是很喜歡吃意大利飯，不過那一小片牛尾有點羶，pasta的蜆也有點腥！而 S的份量也真是很小的！一碗大概有五六湯匙的飯，意粉大概可用义卷兩圈吧！吃完飯後，遲遲未見那個墨西哥蝦配薄餅，追完多等一陣就到了，鐵板上除了蝦，還有好些芫茜，洋蔥，好香，另有五小杯醬料，以及用蕉葉包住的薄餅，醬料不知是否全都放在薄餅上，店員也沒有介紹，我就自己試試，那片薄餅很快就凍了，不過蝦仍是熱的，其中一個醬好辣，不過幾好味，如果薄餅熱一些，就更加好味！

吃過了主菜，當然少不了甜品，甜品的選擇以雪糕為主，還有些pudding之類的，我地叫左檸檬西柚pudding和椰子jelly,味道不錯，一路吃的時候，都見有些人在打燈拍照，可能替雜誌拍照吧！店子的食物不錯，又有不同size選擇，我諗還會再去的！

守護有心人 The blind side

電影上了兩個星期，一直都無乜聲氣，直至Sandra Bullock憑此劇贏得奧斯卡才令人注意起來，仲幾乎滿坐。

套戲講一個十七歲身形非常高大的黑人男童Michael，身世坎坷，讀書成績很差，因為他有點自閉，他寄居別人家裏(有點像天生不是寶貝的女主角)，當學校想放棄他時，老師發現他其實很聰明，一次偶然機會下遇到Sandra Bullock，這個金髮太太有一對子女和Michael 讀同一學校，後來Michael無家可歸，她一家便收留了他，視他如親子，更努力尋找他的生母，希望能成為他的合法監護人，後來發現他更是上佳的美式足球員的材料，幾經努力才令他考上大學，進入校隊，更成為職業球員！

能贏得奧斯卡，Sandra Bullock 一改戲路，擺脫昔日攪笑戲路，雖然劇中有小小惹笑情節，但仍令人眼前一亮！

江順河鮮

連續三日假期話咁快就完結！呢幾日懶懶閒，乜都唔願做！連原本想去剪髮都無去！

不過唔少得同朋友食吓飯！願本去尖東食，但係唔就腳，改左去我近期最愛既 isquare，呢度有幾十間食肆，可以慢慢逐間試！

今次揀咗呢間食順德菜既，之前我地成日去佐敦一間順德菜館食飯，後來間野搬左幾次，最終都執左！我諗可能响呢度會揾返果種口味！

我地叫左兩碟小食，煎尖椒同燒腩仔，個尖椒都幾好味，d魚肉有醃過，唔使點豉油！燒腩仔不過不失，當然不及容記小菜王，我地仲叫左石板燒汁生蠔，污糟雞，砵仔鬼馬焗魚腸，啫啫芥蘭煲，大良鮮奶炒蝦仁同埋蒸魚，d餸上枱時個個都嘩嘩聲，因為好大碟！係個碟好大，好似個芥蘭煲咁，個煲咁大，其實少過半煲，碟蠔得六隻，但係個鐡板就大大個！

個大良鮮奶都幾好，清清地，焗魚腸就大失所望，可能係廣東菜，揾順德師傅做就差小小，蛋比較實，魚腸無味，大家最想食既一道菜，大家吃了都無講嘢........個蠔係最好既一味菜，好香唔會腥，熱辣辣，好味，我見好多枱都有點，至於條魚，始終係河鮮，當然不及海鮮，點都有d淡水腥味！污糟雞好似荷葉蒸雞，雞肉幾滑，不過好細件，無乜肉！

食完飯一行五人，行過去厚福街食甜品，果度有叫糖仁街既甜品店，去到大排長龍，大家都有點累，唯有放棄！下次再去吧！

愛麗斯夢遊仙境 Alice in Wonderland

又一套3D電影，同樣好難買到 imax既靚位！想去 isquare，但係佢哋既 imax 仲做緊阿凡達！仲要未來果d預訂日子都無晒靚位！我諗佢隨時會做到復活節！

套戲雖然係一個好耐之前既童話故事，但係我無乜印象個故事詳細內容，今次睇完都唔知同原著有冇大分別！

故事由小小愛麗斯6歲開始，小小愛麗斯的父親是個很有遠見的人，愛麗斯常常夢見自己身處一個仙境，自覺自己是個瘋子，父親沒有因此而責怪她，還安慰她！十三年後愛麗斯的父親去世了，母親安排她嫁予貴族，在求婚宴會上，愛麗斯見到在夢境中見過白兔，她隨着白兔走到一處地方，開始她的奇妙旅程！結尾仍不忘提一提China!

故事大致同獅子女皇魔衣櫥差不多！小童冒險旅程，中間有勇氣的考驗，最後當然是戰勝壞人！當然加了3D，視覺效果非常的漂亮！