串殿、艾沐春天

諗住約好友出嚟食晏，順便俾手信佢，本來約好咗去九龍灣，好有突然轉軚，改咗返大陸！

我哋喺上水集合，搭車去落馬洲，再轉車去皇廷廣場，一入商場，就去試食Fufuland 疏乎厘pancake，好友話一路想試，不過得佢一個食唔晒，所以要等埋我同佢share，味道都OK唔算特別出色

跟住去咗一間叫做串殿食串燒，因為要用美團落單，所以好友的男友負責落單，叫咗豬軟骨、羊肉串、麻辣排骨、雞脆骨、五花腩等，我覺得味道都可以，但係講唔上好好食，食完就去瑞幸買咖啡，終於可以試到佢嘅咖啡喇，我哋叫咗熱咖啡拎走！

跟住行去附近一間叫做艾沐春天嘅按摩院，好友話嚟過幾次，覺得幾好，所以帶我嚟試吓，我都係第一次去國內按摩，一上到去見到個大堂都好靚，跟住就帶我哋分開男女賓部，入到去比個個locker我哋放低嘢，跟住就攞毛巾同埋佢哋嘅衫去沖涼，呢度有個水池可以浸浴，但係今日個水池冇熱水，所以我哋冇浸到，亦都有一個桑拿浴室，不過焗咗一陣就冇再焗，因為我同好友都唔係好鍾意焗桑拿嘅感覺，於是我哋就去按摩，佢有一個地方係擺咗好多梳化，每張梳化都可以瞓低，每張梳化都有一個電視，可以睇電視或者電影，亦都可以喺電視度落order叫生果食，呢個area可以選擇一個腳部按摩或者頭部按摩，好友就按腳，我就按頭，都幾舒服，按完可以喺度瞓覺，因為我哋個package係包廿四小時，不過好友話今晚約咗人唔喺度瞓，所以我哋喺度Hea咗一陣，食吓生果睇吓電視，聽到附近梳化有D人瞓到扯晒鼻鼾，如果真係喺度瞓可能都有D嘈，我哋坐咗一陣就去獨立嘅按摩室，可以選擇泰式或者中式嘅全身按摩，好友兩個一間房我就自己一個人一間房，我就揀咗泰式按摩，負責按摩嘅女仔，身形細細粒但係都好好力，不過佢應該係傷風，但係冇戴口罩，感覺就唔係咁好，按摩完我就去佢哋間房搵佢哋，見佢哋瞓咗覺，我就去返浴室沖涼換衫等佢哋，因為好友今晚約咗人，已經剩返唔多時間，所以佢哋應該都好快會出嚟，等佢哋出埋嚟，就一齊去搭車返香港！

 

全職乖孫 Billkin

阿M 的婆婆獨自居住，阿M亦都唔係成日去睇佢，後來佢知道做護士嘅堂妹，一路都獨自照顧自己公公，其他人因為公公要長期臥床，都唔多願意去睇佢，更加唔願意去照顧佢，而堂妹一直照顧住公公，仲要幫佢換片，直至公公去世後，將大部份遺產留俾堂妹，令阿M明白點解堂妹一直照顧佢公公不離不棄，後來阿M的婆婆患了癌症，阿M就主動去照顧婆婆，目的當然係想要婆婆嘅財產，在照顧嘅過程中，婆婆漸漸覺得佢係一個乖孫。。。

好少睇泰國片，呢套戲都幾感人，好多人話睇到喊，我就冇睇到喊，成套戲個編排都係預期中，結局有少少出人意表，都幾好睇！

 

2024年5月英法自由行 Day 11 - (法英） 花神咖啡館 Café de Flore、盧森堡公園 Jardin du Luxembourg、巴黎夏爾·戴高樂機場 Aéroport de Paris-Charles de Gaulle、希思羅機場 Heathrow Airport

嚟到行程嘅最後一日，今日2:30機飛返去英國，酒店可以11點check out，有幾個鐘頭時間，就去多兩個地方，首先去食個早餐，喺網上睇咗呢間花神咖啡館，話好耐歷史，同埋話環境唔錯，由巴黎北站搭4號線去Saint-Germain-des-Prés 聖日耳曼德佩站，雖然車程只有14分鐘，但係足足有11個站，呢個火車站都幾靚，牆上面係有啲黑白嘅字，有D以前嘅法國名人介紹，當然我哋唔識啦😆 行出火車站，兩個短街口就到，店門口擺咗兩個垃圾桶，有D大煞風景😅 門外面嘅座位已經坐滿咗客，所以我哋唯有坐室內，其實成間咖啡店嘅裝修都係傳統法國嘅格局，外牆同我哋住嗰間酒店差唔多樣，門口都係圓枱同埋藤椅，我哋講英文落order，店員個樣唔多想理我哋咁，但係見到佢對講法文嘅人客又好好笑容😓 我哋叫咗兩杯咖啡，同埋一個brioche ，一個提子danish ，另外加多一個火腿奄列，咖啡上面有店名，都幾特別，食物同咖啡味道都唔錯，我覺得如果有時間可以喺度飲下咖啡，食吓嘢都唔錯，但係又未至於非去不可！🤭

食完嘢我哋去搵一個叫做盧森堡公園嘅地方，原因係我哋想放飛機，睇英國已經放咗一轉，但係喺法國就冇放過，所以我哋搵個公園，由咖啡廳行過去十幾分鐘，呢個公園係非常之大，我哋行咗去一個位置，見冇乜人就攞飛機出嚟放，跟住行去另一邊比較多人嘅地方，有個球場有小朋友喺度打波，旁邊又有一排好整齊嘅樹，又攞架飛機出嚟影多一轉，雖然呢度比較多人，但係都冇人理我哋，大部份坐咗喺水池附近度hea ， 影咗差唔多兩個鐘，行返去火車站搭車返酒店，途經一間紀念品小店，終於買咗少少紀念品，因為呢間個價錢比我哋之前睇嘅平！

我哋行去最近嘅火車站Odéon 奧德昂站，搭返4號線返去巴黎北站，都係14分鐘就到，返到酒店上房執好嘢就check out，然後去火車站搭車去機場，呢個巴黎北站我哋每日都經過，每日見到佢有間Pierre Hermé ，今日臨走終於去幫襯佢，好友買咗馬卡龍，同埋一啲特別版嘅金屬盒去裝馬卡龍，佢嘅馬卡龍最多只能夠擺三日，所以我就唔買，淨係買佢哋嘅朱古力，另外仲喺另一間商店買咗頂帽，跟住真係要搭車喇！

在巴黎北站搭B 線去戴高樂機場，大概要半個鐘車程十個站，車上面唔算太多人，擺行李嘅位置都只係得我哋兩個行李，去到機場，排隊過關嗰度都幾耐，由落車到過關都要50分鐘，過咗關之後仲有個半鐘時間，就喺度買手信，我就買咗朱古力，買完曬嘢，去到閘口，等到夠鐘都未上得機，delay 咗半個鐘，三點鐘左右先至飛，個半鐘就飛到英國，英國又慢返一個鐘，去到係英國嘅時間三點幾，我哋搭夜晚八點幾機，仲有成五個鐘，所以我哋諗住去其他Terminal度行吓，落咗機之後我哋搭機場巴士去其他Terminal，點知原來係唔入得，因為入去Terminal嘅時候佢會check你個登記證，即時話俾你聽唔係呢個Terminal叫你搭返車走 😅 

不過英國嘅機場都好大，我哋去Terminal 5食個lunch 先！去一間叫做 Giraffe ，叫左牛肋條、韓式炸雞，食物不過不失，跟住去商店行吓，買左茶葉比屋企人，行到差唔多，就去搭冇人列車去閘口，飛機都算準時起飛，回程12個半小時，起咗飛冇幾耐又派餐，我之前訂咗特別餐，但係去程嗰陣時冇安排俾我，回程反而有，我叫咗低鹽餐，係魚柳配粉絲、Yogurt，好友就食牛肉或者雞肉飯，食完飯就瞓吓覺，始終坐喺度瞓吓醒吓，不過都可以瞓到幾個鐘，去到朝早七點幾又派早餐，食完早餐又瞓一陣，好快就捱過12個鐘，落飛機嗰下真係好開心，返到香港下午五點幾，又要等行李，好友嘅行李出咗嚟先，所以我叫佢走先，因為我哋搭車都唔啱路，大家早啲返屋企，我攞咗行李之後，有少少想去食翡翠拉麵，最後見到咁多人，都係唔食，返屋企煮少少嘢食算喇！

總結今次嘅行程，大致上都係開心嘅，而且非常充實，其實我哋唔夠時間去計劃行程，如果擺多啲時間去仔細研究會更加好，不過有陣時真係要去完返嚟先至知應該點樣plan，雖然中途同好友有少少拗撬，爭D朋友都冇得做🤦🏻‍♀️ 下次要去咁多日咁遠嘅行程真係要諗吓同乜嘢人去😏

 

2024年5月英法自由行 Day 10 - (法國) 羅浮宮Musée du Louvre、杜樂麗花園 Jardin des Tuileries、橘園美術館 Musée de l'Orangerie、協和廣場 Place de la Concorde、海軍府 Hôtel de la Marine、Westfield Forum des Halles

預約咗今日去羅浮宮，我哋約嘅時間係10:00，早少少食早餐，搭4號線7個站Châtelet 夏特雷站轉1號線去 Louvre-Rivoli 羅浮里沃理站，然後行去Carrousel du Louvre ，呢個係羅浮宮旁邊嘅一個商場，因為經商場地庫入去羅浮宮有一個入口，呢個位冇咁多人，如果排金字塔出面的話，人龍會長好多，行去商場之前經過金字塔，當然要影返幾張相先，我哋行入商場先去搵食，去到商場都係 9:20，好多商店都未開，有一個好似food court嘅位置，有兩三間店開咗，我哋就搵咗一間店，買咗麵包同埋咖啡，坐低食完先去排隊！

排隊嗰陣見到之前喺英國見到嘅餐廳 Caffe Concerto ，喺英國食唔到，一於喺法國食，所以我哋決定一陣去呢度食晏，我哋排隊排咗十幾分鐘就入得場，攞咗份地圖之後，就開始行，我哋先行咗勝利女神嗰邊先，就去影勝利女神，跟住直接去搵蒙羅麗莎，又去睇拿破崙加冕圖，行行吓見到有精品店，見到有件蒙羅麗莎T恤好得意，不過嫌佢太貴，精品店旁邊有間餐廳，不過好友唔肚餓，所以冇去幫襯，後來發現原來呢間餐廳有個位outdoor，可以睇住個金字塔飲咖啡😅，可惜我哋Miss咗🥹

睇咗主要嗰幾樣嘢之後，隨意周圍行，去咗一個位置，係之前冇去過嘅，有少少似半露天嘅地方，有好多雕像，好靚！我地做足行咗四個鐘頭先至行晒，跟住就出去食晏，我哋經過一間UNIQLO，見到有聯乘羅浮宮嘅T恤，不過唔係好靚，而且價錢貴過香港一倍有多，隨時香港都有得賣，所以我哋都冇買到，跟住去Caffe Concerto 食晏，去到啱啱好有位，行遲一步都冇位😅 我哋叫咗兩份意粉，我再叫咗一杯嘢飲，因為今朝飲咗咖啡，所以晏晝唔飲喇！食物嘅質素都唔錯👍🏻

下一站去杜樂麗花園，我哋要去橘園美術館都必須要經過杜麗樂花園，公園都好大，中間有個水池，好多人圍住個水池坐，呢度有好多凳，可以搬去自己想坐嘅位置度坐低，都幾寫意，杜麗樂花園嘅兩邊，分別係凱旋門同埋卡魯塞爾凱旋門，可以離遠望到兩個主要嘅景點喺花園嘅中間方向！

去到橘園美術館，出示返我哋嗰張博物館通行證就入得，不過呢度要放低個袋，入到去呢個美術館，原來都幾細，雖然佢有兩層，但係只係睇畫，有點悶 😅 所以我哋好快睇完就走，跟住就去杜麗樂花園坐下休息吓！

 

跟住再行去協和廣場，記憶中嘅協和廣場剩係得一條柱，同埋一片空地嘅廣場，而家又係搭建緊看台，反而見到有個水池，叫做Fontaine des Mers，令我諗起之前喺澳門有一間酒店，都有個類似嘅水池，應該係抄呢一個😅

跟住我哋就去海軍府，海軍府係需要預約嘅，我哋book咗 17:45 pm ，但係 17:00 就到咗，因為頭先在橘園美術館早咗走，去到問吓職員，佢話唔多人，可以俾我哋早D入場，入去之前佢會俾一個耳機我哋，係一個大嘅無線耳機，用嚟聽沿途嘅介紹，職員問我哋要咩語言，我哋就揀中文，跟住個職員叫咗另一個女仔過嚟，佢用國語同我哋講嘢，但係完全聽唔明佢講乜，因為佢唔係中國人，應該係學緊中文，所以想俾佢試吓講，我哋勉勉強強聽到佢教我哋呢個耳機點用😅 講解完就可以開始參觀！首先要上一層，然後經過一條走廊，就開始行入去參觀，一直以為呢個海軍府係介紹海軍歷史，原來佢係以前一個高級海軍嘅屋企，所以叫做海軍府係啱嘅😆 由佢個客廳，行去佢嘅房間，同埋宴會廳，沿路都有講解之餘，仲有配咗一D聲效，例如腳步聲，成件事立體咗好多，而且間屋都好靚，行到最後有一個宴會廳，擺咗幾個三面嘅顯示屏，播緊D人喺度跳舞，又會播吓啲歷史嘅動畫，個顯示屏仲會轉，都幾特別，我覺得呢個海軍府好值得嚟參觀，地方雖然唔算好大，我哋都行咗40分鐘 😄

走嘅時候，經過一間商店，不過啲嘢唔係好啱，諗住走嘅時候見到原來呢度有間藍帶學院，我哋見到佢入口嗰度樓梯旁邊寫住 Free Visit ，所以我哋就上去睇吓，一上到去就見到有一個烹飪室，我哋係甴烹飪室嘅玻璃望入去，不過冇人上緊堂，再行前啲見到有個接待處，有個女仔喺度講緊電話，我哋企咗一陣佢都冇理我哋，所以我哋自己再行入去睇吓，見到一個wine room ，遇到一啲工作嘅人員，佢哋都好有禮貌咁同我哋打招呼，由宴會塞出嚟嘅時候，接待處嘅女仔講完電話同我哋講呢度唔係博物館，好友就話見到門口寫住Free visit，個女仔同我哋解釋，係有興趣想上堂先至可以 Free visit 😅 我地誤會咗，所以同佢講sorry 就走，今次真係唔誤闖咗藍帶學院🤣🤣

跟住我哋又行返去兩柱子之間，因為好近，上次過嚟落緊雨，今日好天所以再補飛影相！再行埋旁邊嘅皇家宮殿花園 Jardin du Palais Royal，跟住再去附近行吓，無意中去咗一個商場叫做 Westfield Forum des Halles，剛好有人唱歌表演，好熱鬧，呢度仲有間Lego，有入去睇吓影吓相，跟住就走，行去Chatelet Les Halles 站搭車返酒店，我哋決定今晚在酒店樓下間餐廳度食嘢，因為日日都經過都想試吓好唔好食，因為好友一直都想食青口，想食嘅時候就搵唔到，唔食嗰陣佢又出現，我哋知道呢間一定有得食，所以就返嚟食！

在 Chatelet Les Halles 站搭B 線返巴黎北站，只係一個站就到，我哋直接去餐廳食嘢，唔想上咗房又落返嚟，我哋叫咗一個 Burrata 芝士蕃茄，一客青口，同埋鴨腿 😅個芝士冇上次喺意大利餐廳嗰個咁好食，青口有D失望 ，細隻亦都唔係好新鮮，個汁亦都一般，鴨腿就不過不失，食完飯就要返酒店執行李，因為聽日要走了！