2025年4月東京獨遊 Day ４- 大橫川親水公園、野口鮮魚店、龜戶神社、淺草、上野

今朝個天色都係天陰！Skytree個頂都比大霧籠罩睇唔到！今日行過去大橫川親水公園，距離酒店都唔太遠，沿住側邊條馬路向着Skytree行，行咗10幾分鐘，就去到公園嘅一邊入口，呢度有條紅葉橋，望到個公園頗殘舊，加上落咗雨，公園入面冇人，更加顯得好荒蕪，沿着公園行去另一邊，主要係去一間叫做野口鮮魚店嘅海鮮丼飯店，上次同好友去到佢冇開，今日去到又太早，唯有去附近搵杯咖啡飲吓

行咗去一間叫做 der Kóffer 嘅咖啡店，裏面都頗爆場，裝修係有啲懷舊風，叫咗一件多士同埋一杯咖啡，點知嗰件多士係非常之大件，所以只係食咗少少，咖啡都唔錯，坐到咁上下就去鮮魚店排隊！

行到過去大概仲有45分鐘先開門，門口已經有五個人等緊，等位區只有五個座位，好彩後面有個石壆，我都可以坐吓，店員出嚟比餐牌我哋，順便每人派咗杯茶，我唔知道呢度最多人食係邊一個丼，我就揀咗一個雜錦海鮮丼，原本係想叫佢個中拖羅丼，但係我驚太多，同埋前日已經食咗一個，所以都係食雜錦海鮮丼！店員提早在排隊時幫我哋落單，店員話個丼會跟一個麵豉湯，可以加錢轉海鮮湯，我就冇加到，等到夠鐘入去嘅時候，條隊已經有十幾人，但係佢只係入咗六組人，明明仲有好多位，後來發現佢係所有人嘅食物已經上晒枱，佢先至再放第二批人入嚟，大概相隔左7-8 分鐘，應該係處理咗一組人的食物之後，先放第二組人，其實我覺得可以俾人入嚟坐低先，我諗大家都唔介意等，同埋排隊嗰陣已經落咗單，唔知點解坐低都唔係即刻有得食，呢個就係日本人執着嘅地方，我見到大部份客都係一個人，而且都係男士居多，佢哋食嘅餐通常係一大碗雜錦海鮮飯， 加一嚿好大舊嘅燒魚雲，應該係吞拿魚頭及魚雲，係一舊好大嘅骨，但係見到入面都有一嚿肉，份量都唔細，價錢就幾抵食，我諗呢個係咁多人排隊嘅原因，我個人認為個海鮮丼都唔錯，只係千幾円，性價比都高，不過要排咁耐我就覺得唔值得，我哋食緊嘅時候都見到出邊條隊仲有十幾人，可能有網紅介紹過，所以咁多人嚟食！

食飽咗就繼續行，消耗吓卡路里，行過去龜戶神社，行咗都有廿幾分鐘，因為中間有停低影吓花，今次去呢個龜戶神社，最主要係佢有紫藤花，上次去九州嘅時候睇過一次，啱啱呢兩日睇到有報道講佢開咗紫藤花，而且見佢咁近酒店，所以過嚟睇吓，入到去都幾熱鬧，雖然今日天色唔算好好，但係起碼冇落雨，呢度嘅紫藤花都幾多，神社中間有個水池，地方都幾大，而且仲望到Sky Tree，都好值得嚟呢度！當然係有花開嘅日子😄

跟住上網search有咩車去淺草嗰邊，喺正龜戶神社門口斜對面就有巴士過去！有架 ”草24”巴士，去到我要去嘅地方，所以就搭巴士過去，雖然排隊嗰陣都有唔少人，不過架車都好吉，大家都有位坐，搭咗幾個站，見到經過咗條河，去咗淺草嗰邊，就準備落車，我要去一間咖啡店，因為佢有3D拉花咖啡，巴士站行過去幾個街口就到，呢幾條街都好靜，基本上冇乜舖頭，呢間叫做Hat Coffee嘅咖啡店，見到門口有人影相，行入去睇吓，店入面好細，座位唔多，佢又黏咗張紙喺度，叫人唔好等位，埋去問店員，佢又話可以坐低飲，先落單，然後排隊等拉花咖啡，其實係可以坐低等，不過有啲人都係排喺度睇，佢哋應該係拎走，攞出去打卡，因為有啲人都係着住和服。其實係可以比相片佢跟住整圖片嘅咖啡，或者3D嘅拉花咖啡，因為我冇乜idea，所以就咁叫佢整一杯貓貓嘅3D拉花咖啡，另外叫咗一件cheese cake，比完錢店員會比張啤牌你，上面有數字，你可以坐低等佢叫Number，叫到你嘅時候，你可以喺counter睇住店員做你杯咖啡，仲有個架俾你擺手機，好細心，店員好快手，幾分鐘就搞掂，我杯貓貓拉花咖啡整得唔算太靚，不過都OK得意可接受，呢度座位只有十幾個，仲要有兩張係梳化，其中一張有人坐咗之後，另外嗰張啲人都唔好意思埋去坐，因為兩張梳化都好近，飲完咖啡喺門口影吓相就走！

行過去淺草寺雷門嗰邊，去佢對面個遊客中心，上去影吓雷門通，順便同個電話叉下電，自己又可以坐一陣，淺草寺一向都係非常之多人，我入去望一望，就行過去田原町，經過一間賣九州熊本醬油嘅小店，買咗透明嘅醬油，仲有松露醬油同埋Wasabi油，跟住去田原町行咗一個小圈就走！

過去上野嗰邊，因為想食嗰間鴨&蔥拉麵，不過去到見到大排長龍，於是諗起上次住嗰間酒店對面有一間食蕎麥麵嘅，又行過去睇吓有冇位，點知去到見到晚市淨係得火鍋🥹 一下子唔知食乜好，最後決定返酒店附近食！因為每日經過一間拉麵店，都想去試吓！店名叫做双麵，叫咗一碗醬油拉麵，同埋餃子，佢個餃子🥟比較大隻，而且有一個鐵盤熱辣辣裝住，所以係非常之熱，拉麵就唔係太大碗，湯底嘅味道都唔錯，拉麵同叉燒就不過不失，食飽又返酒店浸浴，呢幾日基本上冇用過酒店房入面個浴室😅 行咗成日真係要浸下對腳，早啲瞓😴

 

2025年4月東京獨遊 Day 3 - 東京站、高輪 Gateway、櫻神宮、豪德寺，新宿

今朝瞓醒，直接搭車去東京站，去搵一間叫做 The Front Room 嘅餐廳食早餐，佢嘅招牌食品係厚多士，最多人叫係鹹嘅多士，上面有雞蛋，而且有個熱嘅鐵盤裝住，加兩個白色嘅隔熱套，啱晒打卡影相，我一時諗唔起要叫熱嘅先有鐵盤，我叫咗個水果多士，因為佢係凍嘅水果，所以只係用碟裝住，影相冇咁靚😅 食完野在丸之內附近行吓影吓相！

跟住撘JR 去高輪Gateway，呢個站應該有D新嘅建築，成個站好新淨，站內有一大個休息區，舖左人造草皮，有D人在瞓覺，旁邊有個鋼琴可以自由使用，一出閘有個廣場，有一排彩色條條的裝飾打卡位，當然要影吓相，呢度有D美食車，附近幾棟大廈都好新，不過地面嘅店大部分未開，只有Blue bottle、Starbucks，和小量店舖，我諗要一年半載後呢度先會熱閙D！ 

冇乜野睇就去下一站，搭JR 去渋谷轉東急田園都市線，搭四個站去櫻神町，主要去一座叫做櫻神宮嘅寺廟，呢度最出名係櫻花場景，雖然知道櫻花季節已經過咗，不過都想去睇吓佢啲御手，出咗站行幾分鐘就到，呢個地方係好細，只有兩棵好大嘅櫻花樹，當然而家係冇櫻花，不過都綁咗好多粉紅色嘅絲帶喺棵樹度，睇落都幾靚，雖然都冇咩睇，都買返個御手，我諗就算櫻花盛開，呢度都唔係太值得過嚟，因為附近乜嘢都冇，真係一個住宅區，只有一間幼稚園😅

見仲有時間，就去下一站豪德寺，搭返頭先嘅東急田園都市線，搭返轉頭兩個站，去三軒茶屋站轉東急世田谷線，呢條東急世田谷線嘅車係比較細架，坐位都少，因為佢只有9個站，搭到去山下站，再行路去豪德寺，大約10-15 分鐘，因為中間有停低影相，沿住豪德寺商店街行，呢條商店街都算冇乜嘢行，佢有少少二手商店，之前見網上有人介紹過有啲名牌好平，我都有入去睇過，雖然係好平，不過睇得出有啲衫都好舊😅 沿路都見到好多外國人，差唔多跟住人哋行都啱路，去到寺外，發覺呢度其實有幫人辦喪禮，而且附近都有個墳場🙄呢度地方就相對比較大，亦都有幾座建築，跟住啲外國人行，就見到一大堆招財貓，真係有少少密集恐懼🤭 一場嚟到，當然要影吓相拍吓片，行咗兩個圈就走啦，完返頭先條路走，經過一間路邊咖啡店，買咗兩包咖啡豆，先至去返車站，回程在山下站附近的豪德寺站搭小田急小田原線，搭9個站直接去新宿！

去到新宿有少少肚餓，又唔想食咁飽，行咗去NEWoMan，嗰度有個細細的food court，上次想去食壽司但係冇位，今次去望吓有冇位，去到見佢落咗場，呢度仲有幾間食店，揀咗一間生蠔吧，諗住食少少生蠔，當係前菜咁，就唔會太飽，呢間店叫做Oyster bar Wharf ，去到嘅時候只有一兩枱客，我坐低之後，又嚟多咗三枱客，忽然之間熱鬧起嚟，我order咗一個六隻生蠔嘅拼盤，佢有三隻或者六隻嘅選擇，但係我知道日本嘅生蠔都係比較細隻，而且佢係日本六個地方嘅生蠔，所以都想試晒六款，另外叫咗杯飲品，生蠔係來自兵庫、廣島、德島、福岡、長崎，果然係細細隻，不過睇落都好飽滿，店員俾咗四支醬料，有檸檬汁、辣椒檸檬汁、仲有一支我唔記得咗係乜嘢，因為我只係用新鮮檸檬汁，但係有一支噴壺嘅，就比較特別，店員話係威士忌（定係白蘭地🤭），我試噴咗一隻，覺得個味道又幾特別，唔會食到酒味，有提升嘅作用，感覺良好！啲蠔好新鮮，好好食！我諗緊之後好唔好再嚟多次🤭🤭

食完嘢四圍行吓，去吓高島屋，睇吓D手信，去到高島屋，又見到做北海道食品節，幾乎每次去到都係做緊北海道食品節，見到佢有啲嘢食都唔錯，不過今日一心過嚟食壽喜燒，所以冇食到其他嘢，而佢售賣嘅嘢好多都要雪藏，所以買唔到，今次又冇乾瑤柱賣，所以空手而回，然後行去新宿三丁目嗰邊，行吓伊勢丹，又去BicCamera睇藥妝同隱形眼鏡，行到咁上下就去食壽喜燒！

再去幫襯木曾路，今次入到去，帶我落下一層度坐，原來樓下嗰層好多都係房，我坐嗰度都係一間大嘅房，裏面有幾張枱，本身有一枱係家人嘅香港人，後來又嚟咗一個男仔一個人，加埋我都係得三枱，同過往一樣，都係幫你起咗個爐，煎咗第一片牛肉，就交俾你自己搞掂，雖然佢有飯有烏冬，不過今次都食得晒，好味！甜品就揀咗芒果雪糕！

食完飯再行多一陣街，就返去酒店，返到去都八點幾，去便利店行吓，買咗火腿包住cream cheese嘅零食，一包有六件，每件都係好細個，買返房做宵夜，返到去，又去一去浸浴，今日又係冇人，返上房食埋宵夜就瞓覺！今日行咗好多路，所以都有啲攰！😴