六公館

買完酒，在海港城商場行咗一陣，就去搵下有咩食，行咗去海運大廈果邊，左睇右睇，揀咗呢間中菜館，一直都好想試，今日終於可以試喇！

去到問吓有冇位，店員開頭話只有一張高枱，我哋其實冇乜所謂，等佢安排之際，轉頭佢又話有張普通嘅枱，我哋都冇所謂就坐普通枱，只不過係高D嘅櫈同矮D嘅櫈分別，當然普通枱係坐得舒服少少！

睇吓個餐牌選擇都幾多，睇咗輪都唔知揀咩好，最後決定揀咗一款雞、羊扒、海膽炒飯同埋一款菜，飲品我哋就有人叫咗杯 mocktail 🍸🍹🥃，飲品嘅造型都好靚，不過味道就唔算特別好，呢度環境靚，服務都算唔錯，食物嘅質素都有返咁上下，當然價錢相對啦！

今晚再一次睇到幻彩耀香江，已經好耐冇睇過喇！難得今晚啱啱好8:00喺呢度睇到，同好友 F 睇過好幾次，今晚又一齊再睇！😆

 

花前月下

同好友飲完咖啡，由太子行返過去旺角，去商場涼下冷氣先！行咗一陣街就落去尖沙咀，今晚一於食餐好D！

我同好友之前在網上看到一款日本白酒想試，好友search到呢間樓上店有賣，所以我哋就上去睇吓，店入面嘅地方好細，不過酒嘅選擇就好多，店入面只有兩位女士，其中一位很年輕的美女，她是老闆娘，正準備做直播試酒，又問我哋有冇興趣試，也叫我們follow她的IG，又向我們介紹幾支白酒，我哋買咗兩支，我攞返屋企先，日後上去我屋企試！

 

Dozy

最近好友J 同我一樣，喜歡左去大南街附近飲咖啡，佢就啱啱開始去，所以只係去過兩、三間，今次同佢一齊去呢間啱啱新開幾日嘅coffee shop ！仲約埋好友F一齊去添！

今日天氣有D熱，店嘅面積唔算好大，不過中門大開，應該話係冇門嘅，樓底亦都好高，所以冷氣唔係好夠，坐喺度有D熱，店入面D裝修有D舊舊地嘅風格，亦都有部舊嘅電視機做擺設，食物嘅選擇唔多，只有五款，我哋揀咗芒果石榴沙律配香橙酸甜汁、慢煮特級牛小排三層三文治🥪、薯片脆雞三文治配是拉差醬，食物嘅造型唔算好靚，先食咗個沙律同埋牛小排三文治，牛肉偏鹹咗少少，跟住我顧住講電話，好友就食脆雞三文治，我冇食到，佢哋話個脆雞好鹹，所以攞咗返去退，店家亦都好識做，有講唔好意思仲送咗兩件cake 🍰🍰俾我哋，可能啱啱新開，煮食嗰部份失左手，不過都有誠意做好件事，下次再試吓，咖啡就唔會差得去邊，都好好飲，不過好友話覺得好熱，所以我哋坐咗陣就走，雖然佢話想涼冷氣，但係成條大南街我哋一路行都係冇乜冷氣，跟住仲行左去旺角😅

 

Loop Kulture

上次同好友去同一條街嘅 Womanboss ，見到呢間新開無耐嘅coffee shop已經想去，不過佢啱啱開所以都幾爆，今日再睇吓有冇人，又出奇地少人！

上次見佢開咗玻璃門坐晒出門口，今日就關咗玻璃門，要推門入去，超過一半位冇人坐，我仲可以影到有D位冇人添，應該話其實只有三、四枱客，呢度除咗飲咖啡之外，仲有售賣一D果仁同埋一D食物，例如果汁、麵食、食油之類嘅嘢，都係一D比較健康嘅食物，另外行去後門果邊，條巷仔仲有賣洗頭水護膚品之類嘅嘢，睇吓個餐牌，食物主要都係輕食 bagel 🥯 同埋多士 ，我叫咗一個煙三文魚水煮蛋多士，另外叫咗杯 Dirty ，食物同咖啡都唔錯，呢度可以再 encore ✌🏻

 

文記火鍋

同事移民去加拿大，過去同老婆仔女一家團聚，我哋就同佢食返餐Farewell，去咗大圍食火鍋，呢度附近好多食肆，呢間有樓上，我地坐樓上，由於有限聚令，我地要分枱坐！

呢度都係同一般火鍋店冇乜大分別，食材都係咁上下嘅嘢，牛肉都唔錯，其他食物都係一般大路嘢，我哋志在聚下，因為都差不多年半冇咁多個人聚埋一齊食飯喇！我哋夾份買咗隻智能手錶送俾佢，佢收到都好開心，我哋都好唔捨得佢，始終都一齊做嘢都咁多年，希望佢過到去生活愉快，身體健康，開開心心！

 

港嘢食堂

好耐冇去九展，今日過去做嘢，佢呢度都有好幾間餐廳，試吓食呢間，類似茶餐廳咁樣，試咗個焗豬扒飯，焗白汁雞扒飯同埋口水雞，食物不過不失，個雞扒都幾好食😋，口水雞嗰醬就咸D 😅

 

Balcony

食完泰國菜，原本食飯嗰陣想坐下傾吓計，但係餐廳趕住做多轉，所以我哋都好快走咗，諗住去附近搵間酒吧飲嘢，但係諗起酒吧未開返，但係見到呢間酒吧有開，因為佢係餐廳牌照，唔係酒吧牌照，所以店員都鼓勵我哋要叫食物，咁飲杯嘢食D小食都要嘅，我哋叫咗碟芝士，每人叫咗杯Cocktail，佢仲有買一送一優惠 👍🏻 個芝士切得好細粒，不過都幾好食，仲有一小碗橄欖，兩個好友都唔鍾意食橄欖，所以我一個食晒，唔記得咗影飲品，只係影咗芝士 😅 

我哋一路傾偈，懷念下之前去歐洲嘅日子，諗起都開心，希望疫情後，大家可以一齊去一轉歐洲！因為好友下個月生日，我哋已經約定下次食飯，我哋唔係坐咗好耐，其實酒吧入面只有兩枱客可以慢慢坐，不過另外果枱係咁食煙，所以我哋都好快走喇，買一送一優惠有總共有六杯飲品，我哋只係飲咗五杯，店員都好好，俾返張飛我哋，話下次可以補番果杯飲品！

 

小曼谷

一排冇見嘅朋友今晚又約埋一齊食飯，近近地去九龍城食泰國菜🇹🇭，以前我哋都嚟過呢間餐廳幾次，冇食一排，原來已經搬咗過對面，今晚都幾爆腸，不過我哋早咗嚟所以有位，我哋叫咗生蝦刺身、咖喱蝦🦐、生菜包、柚子沙律、炒椰菜苗同埋蒜蓉包，食過幾次，今次覺得差咗，咖喱蝦雖然大隻，但係D肉係霉嘅，而且店員好想你快D走，可能想做多轉，店員話限時個半鐘，我哋食咗一個鐘，佢已經想我哋走，好快收晒野，同埋係咁係你身邊行嚟行去，都明白食肆有返夜市都要追番之前嘅損失，所以我哋都好快走，不過個感覺唔係咁好，最重要食物差咗，應該下次唔會再嚟😔 依家九龍城好似搵唔到一間好食嘅泰國菜😕

 

素年 （荃灣）

之前在深水埗食過 The Year （素年），原來荃灣都有分店，今日就去試吓佢，今日唔係好多人，可能荃灣區，D人唔會食咁貴嘅午餐，其實佢唔係好貴，但係一人均消費一定超過$100 ，唔係好啱呢度D街坊，所以店入面多數係後生仔女😏，食物嘅選擇都幾多嘅，我揀咗個漢堡包，記得上次去深水埗嗰間都係食漢堡包，但係上次嗰個係竹炭野菌漢堡，今次係不可能漢堡，即係人造素肉，同樣都係跟咗蕃薯條，另外叫咗杯咖啡，亦試左沙律碗，份量都多，有羽衣甘藍、藜麥、蕃茄、菠蘿、南瓜、蜜瓜等等，素食來講呢間都算好食，而且份量都唔細，食到好飽，下次帶我老細過嚟食先得，因為佢最近用咗類似生酮飲食法去減肥，佢係完全介澱粉質，咁佢可以食沙律碗，下次同佢去試吓先！