Saizeriya

呢間平價薄餅店，成日都見到佢有分店，但係從來未食過，睇過佢個餐牌價錢真係好平，當然都唔好期望太高，即管去試吓質素如何，望望餐牌，見到好多意粉同意大利飯都係$30以下，佢嘅飲品叫法係一個價錢任飲，但價錢係只係十幾蚊，不過佢話部熱飲機壞咗今日冇熱飲，我又唔係好想飲凍野，所以都係飲水，叫咗個雞肉意粉，加咗個雜菜湯同埋蒜蓉包，因為預咗個意粉應該好細碟，先來雜菜湯同埋蒜蓉包，蒜蓉包就唔會差得去邊，個湯就真係好菜湯，應該落咗極少量肉落去煮湯，所以都係齋菜湯嘅感覺冇乜肉味，意粉同預期中差不多份量，細細碟有幾舊雞肉，不過都係新鮮炒出嚟，仲熱嘅，味道就麻麻，都係一分錢一分貨！

京都 一の傳

今日出去尖沙咀，原本諗住搵個同事，但係佢又剛剛離開咗尖沙咀，唯有自己一個人去食D嘢，呢間日本餐廳，本來價格應該唔平，但係坐出面嘅位置就有D特價午餐，價錢都算合理，而家市道唔好，好多地方食嘢都平左，餐廳𥚃面邊落高級D，坐出面就只有幾張枱，出面並唔係露天座位，只係在商場𥚃面店子門外，午市時間後就只有兩枱客，叫咗個午餐，有兩款壽司刺身加一碗牛肉飯，味道就一般，唔算特別好，牛肉亦都唔係想像中咁好食，食完野喺附近行咗一陣，最近朋友話買唔到噴霧膠樽，唔係俾人搶購晒，而係大陸生產單停咗工，因為國內好多人放新年假放十幾日，在要隔離10幾日，所以成個月都冇人開工，食完野喺旁邊果間Muji 都睇過冇，唔知係佢本身冇得賣，定係真係賣晒，我自己就冇咁嘅需要，不過有朋友話買唔到諗住幫佢睇吓！

依家尖沙咀海港城真係冇乜人，見到有個展覽叫做 The art of bakery by Kate Jenkins，應該係一位叫 Kate Jenkins 女士，用毛冷鈎左一D像真度都幾高嘅麵包、蛋糕，都幾有趣，展館入邊冇乜人，又可以影下相！

Outback

今日唔使上寫字樓開會，改為視像會議，不過都開得好辛苦，因為回音好大，聽得好唔清楚，自己講嘢嘅時候把聲好怪，因為有回音聽到每句說話都講兩次，情願去現場開會好過 ！

好友K忽然約食飯，都有一段時間冇見佢，上次整蘿蔔糕佢已經冇黎，都有個幾月冇見面，相約好友J一齊在銅鑼灣等，又係唔知食乜好嘅時候，都係去咗好友K最鍾意嘅 Outback，原本想去 Burger room，但係好友都係鍾意鋸扒多D，所以都係去咗Outback，呢排個市咁靜，諗住佢實好多位，點知都唔係，有一半以上嘅枱都有客，真係估佢唔到！我地叫咗一個肉眼扒，一份羊扒，同埋一D side dish，都食到好飽，食完飯我地傾計傾咗好耐，埋咗單之後，好友 K 又話想睇下 Burger room有乜嘢食，我地行過去果陣經過惠康，見到佢啱啱落緊貨，係大量廁紙，我屋企已經用剩一卷，所以諗住轉頭去買，去到 Burger room 望下佢個價錢，好友話唔係太貴下次可以試吓，我地在路口個米奇公仔度影吓相，然後就去惠康買廁紙，呢個鐘數比較夜，超級市場入面唔係好多人，廁紙返量都好大，而且每人限買兩件，除咗廁紙仲有米、漂白水之類嘅產品都係每人限買兩件！我地雖然有三個人都淨係買咗兩卷廁紙，都係因應實際需要先至買，唔會瘋搶，我見其他人好多都係買一條、兩條，就算兩個人都係買兩條，米都有好大量貨，但係得大包裝，我想買細包2公斤果種，但係佢呢度冇，前兩日我在City Super見到有，係日本米，價錢會貴D，屋企仲有少量米，食多兩次應該會食晒，所以都想買一包細嘅，或者第日再去City Super買，因為唔係餐餐食，一包都食好耐！

紅葉茶屋

武漢肺炎嘅確診數字一路上升，情況都令人擔心，市面上除咗搶口罩，同埋搶消毒用品之外，仲搶埋廁紙、米、罐頭糧食，搞到真係有需要買嘅人都買唔到，好似我自己用剩三卷廁紙，都一路買唔到，我知道超市每日都有貨返，不過一返貨就俾人搶曬！好多人囤積好多貨係屋企，雖然覺得D人咁樣做好自私同埋盲目聽信謠言，不過都明白好多人好驚，自從大家發夢都估唔到會買唔到口罩之後，大家都好驚會買唔到廁紙同埋米，所以心態上都覺得買咗穩陣D，因為個疫情唔知仲會延續幾耐，好多人都預計要去到夏天先至受控制，如果係嘅話希望夏天快D嚟！疫情繼續的話，就嚟要搶埋水，可能一個傳聞即刻個個就瘋搶！🤦🏻‍♀️

今日出去旺角，見到好多藥房都有口罩賣，不過一盒50歌，平時可能賣 $50左右，而家要賣 $380 ，嗰D酒精搓手液，450ml 賣$98一支，相對來講唔算好貴，不過佢寫住中國製造，令到好多人都卻步，所以店家都好聰明，開咗支sample俾大家試，但係感覺大家都係驚佢知 sample 同實貨唔一樣，同埋平時可能唔需要咁貴，不過我自己有足夠嘅用品，所以我唔需要買，我只係睇下使唔使幫人買，因為好多親戚朋友都唔係好夠用，尤其是屋企有小朋友嘅朋友！

睇完藥房，就去食飯，上咗去旺角中心樓上，見到呢間食日式野，又走去試吓，叫咗兩個set，一個係和牛粒，一個係炸豬扒丼，賣相精緻，味道都唔錯，以價錢來講都幾抵食，可能因為得幾個客，所以好多食肆個價錢都會減左！

IMAX 猛禽暴隊：解瘋小丑女 Birds of Prey ： And the Fantabulous Emancipation of One Harley Quinn

小丑女自從與小丑分手後，沒有對外公佈此事，因為小丑女仍可以小丑的女友身份，讓人對她有所避忌，她在黑幫 Roman 的夜場認識了 Dinah，Dinah 被逼替 Roman 做司機，她知道 Roman 正在尋找一顆鑽石，而 Roman 也是小丑女的仇家，得知小丑女沒有了小丑的庇護，而捉了她，但小丑女表示能夠替他尋回鑽石，於是 Roman 放了她去找鑽石，同一時間 Dinah 知道鑽石是自己的好友 Cassandra 所偷，為了要救她，無奈向警員 Renee求助 .......!

今集嘅小丑女同上一集都好唔同，今集佢人性化好多，亦都冇上一集咁癲，可能兩套戲唔同導演的關係，今集以女性主導，幾個女人合力打低壞人！確實係冇上一集咁好睇，而且今集覺得小丑女老左好多，唔知係咪攝影嘅問題，眼袋暴現！

今日再去iSquare 果間英皇睇 IMAX，今次坐後少少，去到R果行，個距離都OK，唔會太遠，上次坐H真係暈得一陣陣，感覺個巨幕係比之前UA果陣大左，所以真係唔好坐咁近！我覺得 J 行已經係極限，今日戲院都係得十幾個客，都係好靜，好多人唔敢去人多嘅地方，但係戲院已經變咗唔係人多嘅地方，因為場場戲都係得10個8個觀眾，而家UA仲要安排D觀眾隔行買飛，即係等人唔好前後坐咁埋，其實我覺得雖然隔咗行，但係變相令到坐喺左右嘅人多咗！係坐你隔離打乞嗤定係坐係你前後打乞嗤危險的呢！不過宜家呢個環境分分鐘隔行都仲有好多位！

疫情仍然持續嘅時候，自己裝備都充足左，分別都買咗D消毒噴劑同埋放菌膜噴劑，其實都唔知有冇效，不過用咗安心D啦！

新泰 Sun Thai

相約好友食開年飯，去咗呢間泰國菜館，之前去過一間同名但係唔同位置，不過招牌唔一樣，都唔知係唔係同一間，呢一間要上樓，呢個食廈都有好幾間食店，不過就好靜，上到去都係得三枱客，而且每枱客都唔多過四個人，我哋四個人已經算係最多果枱！其實見到咁嘅環境，都好替香港嘅經濟擔心，無奈而家疫情咁嚴峻，大家都係少出街為妙！

我地叫咗好多嘢食，泰式生蝦刺身都叫咗兩碟，仲有冬陰公、生菜包、咖哩麵包軟殼蟹、炒椰菜苗、鹽燒烏頭、炭燒豬頸肉、沙嗲串燒、無骨鳳爪同埋豬肋骨，食到好飽，但係都要叫甜品芒果糯米飯！好友仲買咗士多啤梨同提子，佢哋話買來同我拜年，我就話不如喺度一齊食，所以拆咗嚟食，個提子係香印，不過就唔係夠香，士多啤梨就來自九州，全部都係尖沙咀驚安殿堂買！

今晚大家傾計嘅話題都集中係好友 T 同女朋友 M分手件事，因為佢地用交友App 識咗之後，拍咗拖一年就分手，但係話咁快好友又用交友App 識咗第二個女仔！而好友 J 離咗婚都有一段時間，我哋都叫佢裝返個交友app ，識返個女朋友，不過佢有幾個小朋友，自己都冇乜信心，而且佢都唔鍾意呢種形式識女仔，佢都係覺得要認識一段時間，慢慢了解再考慮拍拖，希望佢快D搵到個伴啦！

品味

之前去咗一次呢間台式食店，今日又再去，店入面嘅地方都幾大，不過人客真係好少，因為呢度食物嘅價錢都唔算話好平，今次去見到佢D餐平左，可能見到客流唔多，所以做D特價吸引人！叫咗個米蘭汁雞扒配黃薑飯，其實個米蘭汁係類似椰汁咁樣，配黃薑飯就好東南亞feel，味道都唔錯，其實呢間餐廳，應該係賣台式嘅食物，而家好似轉左有西餐咁，上次食過豬扒飯都係好台式嘅，而佢呢度用嘅牙籤都係好似鼎泰豐果種，塑膠質地入邊好似刷咁！所以問佢攞佢先至比一支你，可能好似鼎泰豐咁驚俾人攞晒，鼎泰豐都係一張枱擺兩、三支，呢度直情一支都唔擺，你問到先比，不過佢呢款牙籤又真係幾好用，但係搵唔到邊度有得賣！

拾味山西刀削麵館

都有一排冇去灣仔，今日相約好友食個午餐，去咗呢間食刀削麵，鋪頭細細，人又唔多，呢排個個都唔敢出街，所以好多時食店都係得幾個客，呢度點餐係用QR code，我哋一人叫咗一碗麵，同埋一盒口水雞一齊食，食物嘅味道都唔錯，口水雞都幾好食，唔算辣！

呢排個個都買唔到口罩，所有消毒嘅產品都缺貨，自己用緊一支酒精搓手液都就快用晒，好彩公司啱啱今日俾我哋訂兩支酒精搓手液，雖然係細支裝，都好過買唔到，而且都方便攜帶！希望過一排供貨穩定D，大家都買到口罩同埋消毒用品啦！