麵麵

去完旅行有兩日假期，尋日同好友食飯，因為佢個仔生日，今日就自己活動，去咗旺角行街，先去搵D嘢食，上網搵到呢一間麵店，佢係上樓店，主要係食魚麵，店入面嘅地方唔算好大，大約都有40個位左右，佈置得有少少似台灣嘅Cafe小店！

試咗佢地個下午茶餐，叫左個白玉魚丸鴛鴦春卷花膠濃湯魚麵，另外再加一個明太子雞翼，飲品就試咗佢地嘅斑蘭咖啡，店家話佢哋嘅花膠濃湯係用天然材料熬製左9小時，仲去咗油，試一試個湯真係幾好味，冇味精！唔錯唔錯！個魚麵都好食，佢個口感係好爽，幾鍾意呢個質感，配埋個湯好食！魚蛋都好彈牙！明太子雞翼都整得好食，咖啡就唔係想像中咁好，亦都唔係好飲到斑蘭嘅香味！店員嘅服務都幾好，走嗰陣時仲介紹佢哋嘅聖誕餐，價錢都幾優惠！

2019年12月令和元年東京之旅 Day 7 - 銀座、有樂町

歡樂嘅時光過得特別快，又係時候講拜拜！

今朝一早起身就去check out，放低個行李在酒店，出去最後衝刺，昨天訂左去15:33pm 去機場的火車，預計2:00pm 要返酒店！

先行去銀座果兩邊睇吓有冇野食，在日本想搵早餐食係有D難度，如果三文治咖啡都唔太難，想食熱野就有困難，大部分店都係11:00am先開，即使百貨公司10:00am 開門，樓上的食店都係11:00am先至開！行左一陣都搵唔到野食，由三越行出嚟等過馬路時，望見對面日產車行旁邊，原來有家幸福 pancake ! 

過去睇吓，店子在大廈的7/F，上到去見佢開10:30am，去附近行一陣返去，早兩個字上到去已經有十多人等緊，佢改左自助取票，攞張飛係4號飛，頭先冇留意到有飛攞，應該攞飛先！不過頭 round 都可以入到！店入面有大約三十個位，除咗攞咗飛的人客，仲有訂左位的人客，攞飛果D主要係遊客，有四位、六位的，其餘大部分係一位女士！多數係日本人添！今期有季節限定的栗子味，不過我都係叫原味！叫返杯 Latte ，店員話要等，其實都好快有，見佢未安排入坐已經整緊 pancake，在日本食確實幸福好多，經過期待、等待、食到好味嘅嘢pancake ，特別覺得幸福！一路食都一路有客入，開始要等位時間，頭一 round 都差不多食完，所以一走就多人走！

食完 pancake 行過去有樂町果邊，原本想去 Tokyu hands ，但見到有間 Loft，仲係好多層同埋都幾新，就上去行吓！我都好鐘意行 Loft，不過如果公價貨品，去 Tokyu hands 有5% discount，大家都可以退稅！在 Loft 行左個幾鐘，買左少少野，都差不多要返酒店，因為仲要處理一下個行李，將所有野塞入去！今次個喼好爆，因為買左件羽絨褸同背囊，都係比較大件！所以個喼好脹！pack 完行李行返去火車站，搭兩個站去東京站，時間尚早，就在車站內行吓，其實呢個站都行到好熟，不過都係消磨時間，所以行左陣，就去月台等車，一個鐘車程去到機場，先去寄行李，然後在機場搵野食！

見到一間新開的店叫做 麵処 つるはん，店子在 shopping mall 的入口，主要係食蕎麥麵同烏冬，門口仍有花牌，店內只有兩個客！叫左個國產牛 Sukiyaki 烏冬，味道不錯，不過牛肉有點韌！

食完野行一陣就過關，海關增加了自助過關，自己都scan passport，不過我過唔到，要去人手過關！過關後又見 Akihabara 大排長龍買手信！我冇嘢要買，所以只係望下就走！今次來回都在九十幾號閘果邊，都要行一段長長的路！回程要飛5小時！同北海道飛返去一樣咁耐！瞓左一陣，仲有差不多三個鐘先至到，所以就攞部 tablet 出嚟睇戲！睇完戲都差唔多到香港！到達後要坐巴士轉無人駕駛去過關，雖然係麻煩D，不過橫掂都要等行李，返香港呢一程經常等行都要搞成個鐘，今次都係一樣，因為架飛機拍得遠，行李都會運得慢D！等左好耐先有行李攞，返到屋企都已經一點幾！略為執一執D行李都搞到三點先瞓！

2019年12月令和元年東京之旅 Day 6 - 築地、東京、汐留

今日星期日，去築地食早餐，先行去東銀座往築地方向，用左八分鐘左右去到歌舞技座，再行十分鐘左右便到築地場外市場近本願寺果邊！入到去場外市場好熱閙，築地去過咁多次，呢幾年轉變好大，以前覺得咁多遊客，又咁多海鮮，點解唔整D掃街型式的小食檔，以前見到賣醃好左，生的銀鱈魚，店員煮少少比人試食，我地膽粗粗問人賣舊熟嘅比我地食，人哋都唔知點同我地計，係咁依收返少少錢，依家即食小食檔就越來越多！真係食壽司刺身嘅越來越少！除咗小食檔，依家仲有賣咖啡嘅小店，已經國際化，同以前嘅築地好唔同，不過仍然見到淨係賣魚生比本地人嘅魚檔，當然只係好少數啦！

去到築地行咗去鮨國果邊睇一睇，見到佢未開門，門口已經有一條隊，諗住埋去排隊，數一數前面有十幾個人，應該第一轉食唔到，如果而家排嘅話真係要等一個鐘，所以轉左去食第二間，去咗下一條街嘅うに虎喰，呢間店其實幾年前已經想試，佢嘅招牌菜係五款海膽嘅海膽丼”雅”，一直冇試嘅原因係覺得佢個價錢太貴，不過一直冇試到個心總係想試，不過老實講，幾年前同而家佢係冇加過價，而家食，相對就唔係咁貴，可能因為鮨國都加過幾次價，所以覺得可以試吓呢間！去到門口見到店入面有兩個位，剛剛有個人走，變咗有四個位，成間店只有10個位，我坐低之後仲有一個日本人入咗嚟，所以剩返兩個位係冇人坐，呢度嘅師傅竟然係女人，在日本由女人主理嘅壽司店係好少見，我都係第一次見，對於遊客來講男女都冇所謂，不過坐上都有幾個日本人，大家都冇乜所謂！睇吓佢個餐牌，其實有部份食物類似fusion 菜，我見好多人都係 order “雅”，我都係叫呢個，另外叫咗杯淡麗嘅 sake，另外再叫咗一隻牡丹蝦！一路睇住師傅嘅製作過程，店員亦都比一張介紹牌俾你睇，佢哋五款海膽都係來自北海道唔同嘅地方，不過今日其中一款轉左由其他地方嚟，另外仲介紹你點樣品嚐海膽飯，建議你咩都唔好落，先試咗海膽嘅原味，然後先至落豉油 wasabi ，最後可以撈埋雞蛋汁一齊食！跟佢個介紹先試咗海膽嘅原味，老實講個差別唔算好大，亦都冇乜太大驚喜，我覺得宜家呢個月份始終唔係食海膽嘅季節，而且食起上嚟我覺得鮨國嘅海膽好味D， Anyway 叫做試過就算喇！

食完野繼續行咗一陣，幫襯左小店一杯咖啡，行到街尾見有人劏緊魚，好多人圍觀影相，不過大部份人睇同影相，冇乜人入去食，可能好似我咁已經食飽咗！由築地行去本願寺果邊搭Metro去八丁崛，轉車落返去東京站，今次落去買手信，上次見到有間新開嘅 Tulip Rose ，因為夜晚去到佢賣晒，所以要日頭去，有朋友話俾我聽，叫我去東京站試吓買買 NY cheese，其實我舊年已經買，買過幾次，朋友都覺得食到厭喇，所以想試吓新野，見呢間 Tulip Rose 個造型都幾靚，應該都唔會太差，而且佢有細盒裝，啱晒我個篋冇乜位，所以有咁細盒買咁細盒就啱，最重要係平D！呢間位於八重洲中央口旁邊的 Tulip Rose ，好新淨同埋好白嘅燈光，離遠已經見到，其實佢主要有三款零食，我揀咗個款係好似一朵玫瑰花咁的，佢有三種味，外層類似餅乾咁樣，裏面有D好似cream咁嘅，睇落有少少似NY cheese 果類型，不過佢嘅味道係有Berry、Caramel、Mango，中午時間佢都有排隊，不過係十多人左右，同埋我見啲人好多都係買一兩盒，可能佢始終係新，所以D人都係買一、兩盒試吓先，我就唔理喇，因為都係做手信，所以一次過買咗好幾盒！

買完手信去大丸入面行吓，上兩次只係匆匆忙忙買咗手信食D嘢就走，都冇認真行過，所以今次入去行吓，落去超市睇吓D生果靚唔靚，見到都過得去，但係冇小田急果D咁靚同埋咁平！行行吓見到有間 Blue bottle！雖然今朝已經飲咗杯咖啡，不過都想試吓佢，所以買咗杯 Latte，味道都唔錯 !

行完東京站之後，決定返一返酒店，因為想放低D手信，跟住行返去新橋地鐵站，行過去地鐵站嘅另外一邊西口出去，因為一直都係返酒店行呢邊，冇行過火車站嘅另外一邊，行到過去原來都幾熱鬧，呢度仲有間烏森神社，神社入面仲有間食店，主要係買酒類嘅，不過佢未開，但係見到入面有好多酒，都幾特別！原本想買過愛情御手比朋友，不過佢呢度嘅御手係冇 for 愛情嘅，只有健康、學業之類，所以買唔到！

行咗一陣，見到有個出口係去汐留果邊，我知道汐留只係一個站之隔，所以諗住行過去搭車，點知原來果條路行過去係可以直接去到汐留個站，原來都唔係好遠，仲要行過去果條路我曾經去過，記得有一次係佢呢度轉車，經過呢一個位置！

去汐留係為咗睇 Caretta 個燈光 show，今年嘅主題係阿拉丁，上次去係美女與野獸，應該係前年嘅事！其實佢個裝置係無變，只係主題轉左，音樂背景轉左，除咗睇佢個燈光 show 之外，商場嘅樓上都有D主題佈置可以俾人影相，今年就有張巨型地氈，可以俾人坐咗去影相，都幾特別，其餘嘅都係戲服同埋主題佈置，影完一輪相之後就去搵D嘢食，去咗地下果間鍛冶屋文藏，有少少類似居酒屋咁，主要係食串燒、刺身之類，我叫咗幾款串燒同埋一個刺身拼盤，刺身就好一般，串燒亦都唔係特別出色，整體來講就係一般啦！食完野就行返返去酒店果邊，早少少返酒店執行李，因為聽日要走喇！