老上海餛飩王

又去荃灣食嘢，見到呢間新開嘅上海店，不過佢主打係食麵，同埋餃子類，午市時間都冇乜人，可能因為新開，價錢都唔算特別平，我見佢有D叫做罐罐麵，所以入去試吓，就叫咗個土雞罐罐麵，所謂嘅罐罐麵，其實都係上海麵，只不過用左個迷你嘅湯煲裝住，湯入面有紅棗同埋杞子，所以都甜甜地，麵嘅份量都唔算少，不過土雞份量就真係好少，大概只有五舊雞件，但係比較細件同埋冇乜肉！

熱遊迪士尼

今日天朗氣清，仲好曬添，入咗去迪士尼行吓，因為想影吓相，今日熱到不得了，之前果兩個禮拜都有D落雨，難得咁好天，都想去外面行吓，不過入去迪士尼係真係特別熱，因為佢好多位冇瓦遮頭，會被暴曬，今日早少少入去，其實都唔係好早，比平時入去時間早D，今期冇咩特別主題，仲有一D復活蛋佈置未換走，咁熱嘅天氣第一時間入去商店行，在出面影一陳張相已經成身濕晒，又再入冷氣地方，然後去左食麵，原本想坐宴會廳果邊，因為室內有冷氣，但係佢裝修緊，冇左大半位置，果細半位置已經坐滿晒人，唯有揀咗間室外，又有風扇嘅店食嘢，原本食完面想去室內商店涼下冷氣，剛好做巡遊，所以再出去影相，好熱呢！ 今日人唔算多，我淨係玩左Iron Man，因為實在太熱了，出咗一身汗個人好眼瞓，所以天未黑就已經走咗！

流浮山 - 明記酒家

好友生日飯，揀咗入元朗流浮山食，就晒壽星公近佢屋企，相約好友們在天水圍西鐵站等，在B出口出，在天橋底下面個巴士站，一齊搭K65巴士，大概10分鐘車程左右，去到總站就見到大大個牌坊寫住流浮山

落咗車見到得一間海鮮店，旁邊有個公廁，公廁隔離有條路行入去，呢度就好多海鮮酒家，同埋好多買手信、海產、乾貨嘅鋪頭，好多嘢賣，我地諗住食完飯先至出嚟睇吓有咩啱買，我地先諗左去邊間食先，上網搜查一輪，揀咗呢間明記酒家，我諗其實呢度幾間都係差唔多嘅嘢，主要係睇下佢門口果D海鮮啱唔啱食，因為你落單嘅時候，應該都係會响門口度揀海鮮，我哋叫咗豉椒炒蟶子、蒜蓉開邊蒸蝦、蒜蓉蒸扇貝、西芹炒班片、咕嚕肉、豆腐、炒飯，本來想食雞炸子雞，但係今日乜嘢雞都賣晒，所以改咗要咕嚕肉，因為男士們想要食D肉，叫豆腐係因為其中一個好友減緊肥，佢話淨係食海鮮同埋豆腐，雖然唔係叫咗好多嘢，不過都好飽，因為蟶子都好大隻，蝦同埋扇貝都有粉絲墊底，食埋都好飽，而且炒飯好大碟，每人可以有兩三碗，仲有橙，食埋蛋糕真係飽到不行！呢度啲嘢食整得好食，店員又友善，又好招呼，我哋冇叫啲貴價海鮮例如龍蝦、原條的魚，店員都唔會變面，人均消費都係三百幾蚊，下次可以再嚟！食完飯我地喺度傾計，傾左好耐，都有問到最近嚟咗分嘅好友，佢嘅家庭狀況，佢都好快冇事，繼續照顧自己嘅小朋友，希望佢早日搵返個女朋友啦！食完飯已經11點，出面嘅手信店已經收晒，應該話成條街都收晒，應該得返我地食既呢間未收，因為除咗我地，仲有幾枱客未走，出去搭返巴士去天水圍西鐵站，啱啱好搭到23:15 pm 果架K65尾班車，去到天水圍站，就分道揚鑣，我去搭巴士，佢哋搭西鐵，壽星公就去搭接駁巴士返屋企，雖然個路程都好遠，不過今次食得好開心，我地搭K65嘅時候仲喺度講，下次約埋一齊去澳門食buffet，希望真係可以去得成！

圓美大盜 The Hustle

Penny 係一個騙徒，經常以一張美女圖片欺騙男士，一次在前往法國的火車上，他遇見了 Josephine ，發覺她同樣是騙徒，而且非常有錢，令她誤以為 Josephine 是傳聞中的傳奇騙徒 Medusa ，更威脅 Josephine 一定要教佢詐騙技巧，Josephine 無奈答應，二人便拍住上一起行騙..........！

近兩星期鋪天蓋地，間間戲院主要都係做復仇者聯盟4，我揀咗呢套戲睇，因為覺得佢有D似之前套八美千嬌嘅延續版，但係原來唔係，個題材本來都幾好，不過拍得有D幼稚，絕對唔係乜嘢高科技騙案，所以都有D失望！

航拍 16 - 城門水塘

食完野去搵82號小巴，原來在兆和街果邊，成個站只有三個人，到開車嘅時候一共只有五個人，跟住架小巴停咗去81M個站到上各，我估計因為81 M唔夠車，82有路經佢嘅站，所以佢在82個站上完客就駛去81M上埋先開車，果然架車去到石圍角邨落剩最先上車個五個人，就直接駛去水塘，路程都好近，一落車就已經見到有幾隻馬騮，我身上冇食物，不過都驚佢搶手機，因為之前睇過條片，D馬騮係會搶人手機的！在小巴站頭有洗手間同小食亭，先去咗洗手間，然後行一條長樓梯上，沿路見到好多人上上落落，有D係行完山落嚟，有D準備上去行山，不過最奇怪見到有對情侶，個女仔係着住高踭鞋去行山！呢度附近好多樹，唔係太適宜起飛，跟住行到一個比較空曠嘅位置就嘗試飛，今日天色都唔係太好，好多雲，又冇太陽，我在水塘上飛咗一轉，就冇再飛第二轉，因為天色都唔係太理想，而且個景都唔係特別靚，仲影到好多高樓大廈添，可能飛遠D會好D，下次約埋老友去一齊再飛過！

山西印象山西手工麵

今日要去放飛機，要去荃灣搭小巴，去川龍街搭車之前，去附近搵D嘢食，行到去鱟地坊，有幾間食店，見到呢間食山西手工麵，就去試吓，店入面一個人客都冇，入門口就見到半開放式廚房，有D人手整麵嘅設備，我叫咗一個韭菜餃手工麵，另外叫咗一個炸饅頭，我有諗過唔叫，因為要人特登炸一個饅頭，好似唔係幾好意思，不過個店員問咗個師傅，個師傅話冇問題，個炸饅頭比想像中大，可能我早幾日食過一個炸饅頭大概係兩件壽司咁嘅大細，點知佢原來成個漢堡包咁大！食咗半個已經好飽，跟住個韭菜餃分量唔算多大概有4-5粒，而且唔係好大粒，呢個韭菜餃係素食，因為入邊係無肉嘅，所以成碗都好清淡，本來想試吓個口水雞，但係份量太大，一個人食唔到，所以下次有機會再嚟試吓，因為覺得呢間小店係家庭式經營，好多嘢都係人手做，人手包餃子，人手拉麵！店員都好殷勤招呼，態度友善，我一路食嘢嘅時候一路有客入嚟，希望小店能夠越做越好！

九份飽

上次在北角見到呢間食店，應該係新開嘅，但係冇位爆曬，今日行過見到有位，就入去試吓，話明係九份，睇個門面就知係食台灣野，其實台灣野食物選擇唔太多，雖然台灣有好多嘢食，但係唔知點解喺香港開嘅台灣食品店，都離唔開牛肉麵、蚵仔類嘅食物？我叫咗個牛肉麵，另外叫咗一個蛋餅，佢寫住培根起司蛋餅，我一時想唔起培根等於煙肉，所以叫咗呢個，食物嘅味道ok啦，飲品都離唔開珍珠奶茶、紅茶綠茶之類嘅飲品，我叫咗杯芒果綠茶，都幾細杯，可能因為係跟餐特價，所以份量細杯D，下次可以再試吓其他食物！

令和の初

今日係日本令和年代的開始！又去食日本野慶祝一下！

相約好友在旺角食飯，去左之前去過幾次的立鮨，叫左幾款壽司，有赤貝、火炙左口魚裙邊、海膽軍艦、牡丹蝦、芥辣八爪魚軍艦，原本叫埋牛油果手卷，但係賣晒！今日個赤貝好新鮮所以要 encore ！仲叫左梅酒飲，話晒今日係慶祝嘛！今日壽司的質素唔錯，不過我地食完都飽了，留返少少空間去食水果！

食完野去果欄行返轉！今日得四檔有開，最多人買榴槤！我地都係同一目標！買左個六磅多D的金枕頭，然後幫好友的男友買個飯，就返去好友的家開餐，等佢地食完飯，我地先食榴槤，個榴槤都唔錯，幾好食，去年的5月1號，我地同樣一齊食榴槤，希望以後都可以一齊食！