俠盗.驕雄 Robin Hood

今天精神好了點，原本想去剪髮，只是Stylist今天沒有上班，早上吃了葯，又想睡覺，便多睡一下，醒來已是四時了，起來走走，還是看電影，可以坐着，即使眼瞓也不怕睡着，這套戲140分鐘，都幾長，套戲同印象中的Robin hood有點不同，故事講述英法戰爭，英王戰死後，其唯一的弟弟繼承皇位，昏庸的他受奸臣唆擺，不斷向人民徵收重稅，令人民齊起反抗，引發內戰，Robin Hood與幾個好友原本浪蕩天崖，因為對一個士兵死前的承諾，而替其將劍送還給其父親
，因而認識了女主角，亦加入了戰場，更受人民愛戴，卻令英王甚為不滿........！

其實套戲有d悶，可能好多打仗場面，劇情較少，而且故事發展，亦係意料中事，呢類大製作亦拍過不少！

又病了！

又病了，星期一晚瞓到半夜覺得扁桃線位痛痛地，第二日就腫左，不過無乜嘢，但係過左一晚，第二朝就好腫，好痛，走去睇醫生，食左一日葯都無好過，仲發燒添！醫生話鰓線發炎，如果唔消炎，就要開刀？？我諗唔使開刀掛？都係睇第二個醫生，今日睇果個醫生好好多，佢話我生炸鰓，比左特效葯我，食一次葯已經好左好多！仲有抗生素，之前果d葯食左好眼瞓，今日果d就無咁頭重重，要食五日葯，希望快d好返！

愛在你左右 Mother & Child

個b後來三個女人log好唔容易先log in 到，差不多要四五天才log in到一次，不過yahoo那邊也很幫忙，雖然不知道原因，也給我回覆，也不知是否自己部電腦有問題還是甚麼，照計電腦有問題，應該是甚麼網都不能log in，為什麼只是yahoo log in唔到呢？看看明天什樣！

前幾日睇左呢套講母親和女兒的電影，故事講述十四歲的女孩Karen，誕下女兒後，放棄了女兒的撫養權，兩人自此分開，三十多年後，Karen仍然單身，與年邁的母親同住，分開了的女兒仍然常在她的心裏，性格古怪的她，在母親去世後，才開始與男同事交往........另一邊，Karen的女兒，自養父母去世後，過着獨立生活，一直努力工作，在律師樓有出色表現，除了和黑人上司有親蜜關係外，更與隣居的白人丈夫有染,後來更懷了孕.....另一對黑人夫婦，因妻子無法懷孕，而决定領養，只是處處碰壁！

戲中各人都演得很好，在母親節，很適合為人女兒亦同是身為母親的人看，個人覺得好感觸！
這幾天天氣反覆，總是下雨，心情也會差點，好想放假！

鐵甲奇俠2 Iron man 2

又幾天不能 login 自己的blog 了！也不知是甚麼原因？可能是電腦出了問題吧！希望明天不會再冇問題吧！

上星期看了 Iron man2, 賣飛的情況比葉問2更旺，可能較吸引外藉人仕和學生，始終葉問2較重愛國情懷！今集Iron man有更多電腦特技，而且節奏很快，睇trailer都知，今集多了個奸角，目的要打低Iron man ，亦見到他的好友跟他一起做 Iron man，雖然多了女秘書，但其實戲份不是太主力，還是以電腦特技為賣點，Robert Downey 好有型呢！節奏又快，動作又快，好快就睇完！

葉問 2 Ip Man2

唔知做乜入唔到自己個blog，攪左幾日終於先用到！激氣！

前日去左睇，賣飛情況都好旺，雖然加左場，好多場都得返最前或者最則邊既位。

套戲講返上集結局，葉問受左鎗傷之後，去左香港，1950年，佢租左層舊樓既天台，開班受徒，黃曉明係佢第一個徒弟，呢段戲好有周星馳套功夫feel，背景已經好相似，d情景又相近，都幾惹笑，後來黃曉明同洪爺(洪金寶)個徒弟打架，比人捉左去魚欄，葉問去救佢，一個打幾十個，洪爺同佢講，如果想做師傅教功夫，要先同各大門派比武，先可以正式做師傅，葉問去酒樓同佢哋比試，有兩個師傅輸左之後，無人敢同佢打，洪爺親身上場，同佢响張枱度打到難分難解......當時的香港，好多貪污，各人都要比錢鬼頭幫辦疏通，後來鬼頭攪左場boxing，揾左拳王twister同中國人打，兩人為國家榮辱，奮力一戰.......！

今集同上集一樣好睇，連場打鬥，絕對滿足觀眾要求，今次以葉問和洪爺為主，其他人都變了大配角，像黃曉明，熊黛林，都沒有太多戲，洪爺功架十足，寶刀未老！

芽莊

前幾日係姨甥的生日，早已忘記了他們的生日日期了！大概是很久沒有一起慶祝吧！又可能是我太善忘吧！難得正日可以一起吃飯，選了尖沙咀Ocean terminal ，記得上次去這附近吃午飯，是心情很沉重的一次，今次可是輕鬆多了！

這間越南餐廳應該是開了不久，裝修很新，店內人客不多，最入的坐位都是靠近碼頭，一片海景，學李生話齋"心\曠神怡"！只是天色陰暗，略為失色！

個人幾喜歡越南菜，清清地食碗粉，仲有蝦，都好啱食，我地叫左柚子蝦沙律，有我喜歡既腰果，軟殼蟹粉卷，我成日講錯軟脚蟹！越南春卷，係我唯一會食既春卷，我唔食酒樓既中式春卷，法式雞絲三文治，我無食，蕃茄蟹肉檬同平時食既檬唔同，味道普普通通，原本想食甜品，但係選擇太少而放棄了！

天間叛徒 Legion

睇trailer覺得應該幾好睇，加上由鐵甲奇俠，魔盜王系列視覺效果班底，演員亦係熟口熟面果幾個，臨場賣飛情况係最少位剩，不過唔太清楚劇情，trailer既對白話上帝之前帶來洪水，今次帶來天使，原來係黑天使，佢哋好似鬼上身咁，令d人變左喪屍，去追殺幾個人，因為其中一個大肚女人既bb，係未來人類既救星(好似未來戰士咁！)其中一個天使為救人類，咁願折翼到凡間，保護佢，成套戲都係响一間屋裏面，又鎗戰又喪屍，為左電腦特技，大部份戲都係夜晚，畫面好黑！結尾都好求其，最後女主角坐响架車度，包住頭巾，加埋旁白，直情同未來戰士第一集最尾果part一樣！真係幾失望！

雙情路 Brothers

套戲睇左一個禮拜，都唔得閒寫，不過套戲比我既感覺仍然好深，個人覺得好睇，唔知點解無乜口碑，同埋咁少院線做！

故事其實好簡單，哥哥去伊拉克打仗，失踪後被誤傳死訊，弟弟照顧嫂嫂和姪女，開始有些感覺時，哥哥卻回來了，飽受煎熬的哥哥，大概有些創傷後遺症，精神出了問題，對三人之間的關係，出了很大的問題，險些演變成悲劇..........！

直得一讚，蜘蛛仔一改形像，演情緒病者，入木三分，搶哂鏡！

霞飛

自從果次响上海食左好好味既生煎包之後，都無食過好味既生煎包，前幾日睇雜誌介紹左呢一間霞飛點心拉麵，仲介紹佢哋既鮮肉生煎饅頭，我緊係要去試啦！

去到 K11，有小小落雨，商場入面頗為冷清，間店在B2，落到B2先發現原來地鐵有個好大既入口入呢個商場，而且呢層都幾多店舖。去到霞飛，店裏只有三枱客，侍應也只有一兩個，呢度用開放式廚房，人客可隔住玻璃睇到師傅整點心，一坐低，緊係先叫左客生煎饅頭，食上海菜又點少得小籠包！又叫返客試吓！原本想叫埋牛肉餅，但係唔想食得太飽，所以無叫到，而且已經叫左擔擔麵，仲要留返位食甜品！

個小籠包都幾好食，一般小籠包既外皮好快凍兼變硬左d，但係呢度既小籠包唔會喎！食最後果個都仲熱架！唔知係咪廚房近呢？味道同尖沙咀翡翠差不多，至於最期待的生煎饅頭，就有小小失望，個饅頭係真正生煎，個底煎得乾左d，裏面肉汁唔算好多，味道都OK既，擔擔麵無乜特別，上枱個樣麻麻地，不過麵線好似幼d，吃起來爽d，而且剪得較碎易入口，唔同平時果d成著麵。甜品叫左廚師推介，唔記得叫白乜嘢拉糕，我以為係白色既，原來係紅紅地色，呢個糕，好奇怪，用义拮唔容易拮得入，黏性很強，黏住隻碟好攪笑，但係入口又好"淋"，而且無味！我食唔到咁甜都覺得好淡！

食完野在商場行了一圈，商場做緊promotion，消費$1000送菲林相機，呢度多數係名店，真係買野食飯都好易換到，上到地下果層，我見到 Awfully chocolate，一直想試吓佢哋既朱古力蛋糕，但係唔想拎住個蛋糕去街，所以都係無買到，知道呢度有分店，下次先試啦！

勁揪俠 Kick-Ass

五一假期前，又係無乜戲好睇，想睇既又唔係咁多院線做，要到月尾就有幾套好戲睇！

响無乜得揀既情況下，揀左呢套笑片，睇 trailer 覺得應該幾攪笑，事實上我覺得好笑過Date Night，應該話唔同性質既笑料，大家都係惹笑既英文對白，呢套有惹笑既舉動，加埋主角既幻想，尼古拉斯基治講對白既語氣同把聲都幾好笑！愛看漫畫和幻想又渴望做英雄的宅男主角，將幻想付諸實行，但係無情既現實，令佢烏龍百出，而尼古拉斯基治演的big dad，自小訓練女兒做超級英雄，人細鬼大的她，言行都好惹笑，尼古拉斯基治big dad這中年男人的做型入型入格，佢哋聯手對付黑幫頭目，各式重型武器都出齊..................故事簡簡單單，低bb咁，睇呢套笑吓都OK既！

Happiest Bits Exhibition

前日去又一城見做緊呢個exhibition, 用一些平日成日見到既物件，或者一些童年回憶的物件既圖案，貼上幾架mini cooper 車身上，覺得好得意，第一架見到既係富豪雪糕車既圖案，第二架見到既，覺得好熟，一時諗唔起，見車旁邊有包大sugar，就記得係茶餐廳既外賣熱飲紙杯！呢架仲係開篷車！跟住仲有學校私家小巴同埋大白兔糖！大白兔糖仲有幼稚園既白兔仔印，好可愛！

呢d真係大家既集體回憶，呢邊exhibition由理大攪，我見告示牌話16-18號，但係14號已經見有，不過仍有工人在執手尾，可能到16號有其他安排吧！

良朋共聚

前兩晚跟幾個老朋友食飯，大家都有一段時間沒有見面，有些幾星期，有些兩三年，原本去打邊爐，後來改了去深水埗的容記，再嚐超脆皮的燒腩仔，真係好好味！

大家一路傾一路等，最終有三個唔黎，真可惜，我地五個傾左好耐，好開心，旁邊的侍應也不時插嘴，當年大家一同工作，如今各自在不同的地方工作，我驚訝於朋友已跟拍拖多年的女友在結婚前席分了手！另一朋友雖然仍然單身，卻原來未夠三十歲的他，因受不了廿歲頭的"年輕"女友才寧願單身！他說現時的女生多愛用SMS傳情，而且是不斷的發，令他工作時甚為不便！所以寧願單身，可能是個別情況吧！除了傾感情外也分享了工作上的苦與樂，大家少不了想當年，總有令人懷念的日子！

兩公婆今晚玩大咗 Date Night

Trailer好早已經出左，覺得都係美式笑料，睇影評又話好笑，即管去睇吓！

故事內容睇trailer已經知係講兩公婆，生活枯燥，諗住去高級餐廳拍拖，因為無位，就冒認訂左枱無出現既夫婦，就係咁，被黑幫追殺，最後當然係無事啦！

其實劇情都估到哂，我覺得識聽英文對白先好笑，同埋兩個主角既身體語言好惹笑，我自己覺得未至於好好笑，但係現場既觀眾既反應就覺得好好笑，尤其trailer出現過既片段，唔通d人無睇過trailer ?結尾既NG片段都幾好笑！

亡情使者 The Messenger

今星期上既戲，都唔係好吸引，得兩三套係有小小興趣，先睇左比較冷門既呢套，有提名既戲，通常劇種都係另類dd，買飛時先至知道係三級片，原來有裸體鏡頭，雖然很小的幾秒，個人認為可以删除，電影就不必列入三級了，故事講述兩個男主角，負責將在戰場上陣亡軍人的死訊通知其家人，面對情緒激動的家屬，面對陌生的人，不同的人及不同的反應，難堪的感覺，絕對不是一份好差事，而年輕的軍官，卻愛上了其中一個遺孀......劇中兩個男角的性格都是有點神經質，令我想起拆彈雄心的男主角，兩者都有好多共通點！其實套戲有d似拆彈雄心無左戰場上果d戲，得返文戲咁！都有小小悶，有幾場家屬呼天搶地的戲，都幾令人眼濕濕！

3D 人‧神‧魔戰 Clash of the Titans

尋晚睇左呢套戲，因為3D，所以買飛買後D位，驚睇到頭暈，不過有些打鬥場面，畫面搖晃得很厲害，都睇到有小小眼倦!

套戲既內容基本上同之前果套"波西傑克森神火之賊"係一樣，只係時裝阪同古裝阪既分別，同樣係宙斯果仔，果名分別翻譯成波西同柏修斯，呢套就講佢要打冥王，而故事入面既主要神魔角色都差不多，而且做左3D，又揾埋阿凡達個男主角，吸引力當然好好多！

3D 馴龍記 How To Train Your Dragon

呢個星期上既戲之中，比較想睇嘅係兩部3D電影，先睇左呢套先，因為係"Madagascar"，史力加，"Kung Fu Panda"既製作班底，雖然宣傳不多，亦唔知故事講乜，不過仍有信心，應該唔會太差！

故事係發生在一個叫Berk既小島，男主角係叫做Hiccup思噎仔既維京人少年，佢哋既族人，個個都係屠龍勇士，尤其係佢爸爸，但係佢就非常瘦弱，每次族人去屠龍，佢只能幫手做武器.........他自己卻發明了一件武器，並在一次打鬥中擊中了最神秘的Night Fury 夜瘋魔，後來他發現受了傷的Night Fury，他救了Night Fury, 人與龍因此成為朋友，他為Night Fury 改名Toothless 無牙仔，此時Hiccup要受訓去屠龍，他既要隱暪父親去保護無牙仔，又要預備去殺龍.........！
套戲都幾好睇，Toothless好可愛，加上3D，好多飛天下海既鏡頭都好真實，睇到好緊張，如果係4D有埋風就仲好，套戲好啱一家大細去睇，依家成日睇3D，第日係咪要用3D電視睇碟呢？3D電視機下星期出啦，唔知點既呢？我諗坐位對電視個角度都好難較得啱！

The Sky Bar

成日去朗豪坊行街都好想去試吓呢間Bar，不過知道係酒吧，無返幾個朋友去，就好似差dd，呢日睇完戲，原本想去和民食飯，點知好多人，我地就轉返去朗豪坊，酒吧應該無咁多人，上到去先知原來有好幾間食肆，不過人唔多，間間都有位，我地睇完門口份menu，都係揀返呢間，始終一路都想試，可惜我想坐果邊無位，我地坐得好入，靜靜地傾吓計都ok既！

我見menu有藍青口，即刻order個白酒汁，伴埋法包，再叫左個野菌湯，都係我鐘意食既，我仲叫左個意粉同雜腸，果"煲"青口份量都唔少，加埋法包，食完已經好飽，碟意粉睇落好細碟，其實個碟都幾深，都幾多，到碟雜腸，見到都好飽，可能我唔係太喜歡食呢類腸，反而食薯條為主，一路食一路傾，見有人在打美式桌球，外面又有人唱live，環境都唔錯，下次可以試吓其餘果幾間！

志明與春嬌 Love in a Puff

跟朋友食完添好運之後就去睇戲，去到戲院想睇既戲已經睇左，未睇既又唔啱時間，得返一個選擇，就睇呢套。

故事係講一班煙民在後巷煲煙吹水，講是非之餘，亦因此發展出戀情，兩人的關係似是疑非........！

套戲因為有粗口而被列為三級，其實粗口不多，如果無粗口反而不夠真實，我諗對煙民來說一定好有共鳴，我都覺得好寫實，完全係時下年輕人的真實想法，而且攝影方面拍得很好！

添好運

終於走去試添好運，已經有心理凖備要等兩小時才可一嚐這間米芝連一星點心，與朋友約好先到先等，我兩點去到，見有些人在等位，但沒有人替人登記，只見門口寫着四時登記，有人走出來時，只掉下一句四點才登記，唯有打電話給朋友改地方，見自己miss了姊姊的來電，通完電話後，忽然想走回去問多次，這時又忽然派飛了，因朋友未到，我就待在那裡等候，等了一會，發現他們入坐的安排很亂，基本上是不會叫號碼，因為好多人取了飛就走開了，只要取飛後，四時前返來告訴負責登記的姐姐，她會mark低你的no.有枱就比你！我等左半個鐘就有位，因為我之前果廿幾個號碼都未返，但係我朋友未到，唔比我入呀！！到我朋友到左之後等左五分鐘就入得喇！

入到去，見得三十個位左右，我地坐在一張六位枱既中間打對面坐，我們兩人的左右兩邊的人都是自己一個人來的，這樣的安排卻好奇妙，幾個唔識既人，有共同既目的，大家都迷茫地等待，然後終於可以一起坐在這狹窄空間裏，大家都掛着滿足的笑容，然後各自為自己的點心拍照，大家都不期然互望笑了！坐在我朋友旁邊的是個外國人，他不時用他那部GF1拍照，他用英文追點心時，個店員用廣東話答，佢哋又溝通到，好攪笑！佢幾次想同我地講野，又唔知我地識唔識聽就無講，但係佢食個黑松露奶凍時，忍唔住向我地表示好好味！

點心紙要在入坐前寫，入坐時即時落單，我地見個個都話酥皮焗义燒包好食，但係要等好耐，所以我地叫兩碟！一人一碟！我地叫左蝦餃，燒賣，豬潤腸粉，粉果，鹿根，香茅午肉脆瓜餃，馬拉糕，桂花糕同新出既黑松露奶凍！d點心價錢由十元至十六元，真係物超所値，食物質素好高，焗义燒包好好味，最貴既黑松露奶凍$36，本來無叫，見個外國人食得咁開心，食完仲要加個外賣，我地就叫左個試吓，個奶凍除左有一片黑松露之外，奶凍裏面仲有黑松露碎，果然足料又好味！呢餐真係食得好開心！