墨魚韮菜花

之前在報紙看到一道韮菜花鮮魷,好想試整,但係買唔到魷魚仔,只係見到墨魚仔,大概差不多吧,便買來試試,用蒜頭和辣椒爆香墨魚仔,味道唔錯,只稍嫌不夠辣味,我諗會再煮既.

化妝掃

昨日睇報紙見到化妝師介紹買平價化妝掃,見他推介的化妝掃主要是一些$88的貨品,其實一些有牌子的化妝掃套裝,價錢貴少少,質量有保證些,我睇完再看看自己的一套化妝掃,都好齊全,細細支連埋皮套帶出街都好方便,再用埋專用清潔液得閒洗吓,都好耐用,我較喜歡Bobbi Brown的掃,也買過Shu Uemura, RMK同埋Giorgio Armani,比較長身,不便帶出街.

晚上整左d啫喱,加埋水蜜桃,雪左一晚,今晚食得!Yummy !

今日我同事阿偉個哥哥做左爸爸,佢阿嫂生左個仔,成家人都好開心,但係前日就有另一個friend佢太太小產左!!上個月先飲佢地餐喜酒,佢地有左bb先結婚,由於個胎唔穩定,佢都住左幾日醫院,加上擺完酒又要飛返大陸再擺酒,舟車勞頓後就無左啦!唉!!!!!不過佢都重後生,第日重有機會既!

Panda & to-fu@Ocean Terminal

尋日個電腦上唔到網,今日又無事,原來我除左上網同儲存資料外,唔會點用電腦!

去左Tsim sha tsui 行左陣,好多人呢!見碼頭擺左好多隻熊貓,慶祝回歸十年,每個年份一種色,好多一家大細影相. 上到去見有一個好小型既To-fu公仔展覽,最近成日見到呢個公仔,都幾得意,不過唔鐘意佢唔笑,我前兩日見過一款好似百福豆腐包裝既做型,都幾可愛!行過一間shop見佢地個show window 有個人咁高即巨型雪糕裝飾,好特別,之前見呢間shop既display都好有心思,好似係賣童裝既,就响Evisu對面!

DIY 耳環

今日去左旺角食晏,去百味買左兩包冷麵同布丁奶茶,就當一餐,食完响旺角中心行左個round,買左件背心,我都好耐無買過背心,因為驚d拜拜肉粗手臂嚇親街坊啦!不過見件背心只係$50,著返件外套襯吓都ok.行行吓見有間shop賣耳環,$9對,重買三送一,咪睇吓囉,好多款一係好大揪,一係有d娘,不過我見d款大揪得黎都可以拆開黎改款喎,而且屋企有d零零碎碎既水晶珠仔...............唔!一於動手DIY........here we go!!!!!!!!!!

第一張相係嗰4款耳環既原貌,承惠$27,左邊嗰兩對,我嫌個圓圈同菱形好娘,尤其嗰圓圈上面嗰兩舊類似魚仔既吊飾,但係d配飾都好多,好useful,最左嗰對我同其它耳環mix& match 變左三個款,而右邊黑色嗰款都ok既,只係銀色粒珠有d甩色,可以換粒水晶落去,而黃色嗰對,揾唔到合適既珠,所以唔改.


Original


配方型紫水晶.................Cool!!


加左水晶嗰三款,好滿意,不過手指頭好痛耶!點解寫寫吓blog聞到好香糭味,唔道隔離屋半夜包稯?好想食tim,唔知大肚公主有糭食未呢?我聽日有得攞喇!

Fantastic 4 - Rise of the silver surfer

今日睇左呢套戲,鍾意睇電腦特技既話就啱晒,大量特技制做的驚險場面,又有d攪笑場面,充滿娛樂性,笑吓又多野睇,好過睇蜘蛛俠同魔盜王,起碼無咁悶先.

晚餐去左食京川菜,有小籠包,上海粗炒,雲吞雞,火腿津白,同擔擔麵,好飽!d小籠包好好味!

仲响Logon買左兩對耳環,我足足睇左成個鐘先睇啱!跟住有人响度做research,咪幫佢做吓,做完送左個隔熱手套比我,又係隔熱手套,究竟有無第二d野送,我都收左3次喇!!!!

蘋果酢

原來成個禮拜無update個blog,黎緊呢幾日得閒d可以寫多幾篇!

最近媽媽的朋友教她用日本蘋果酢浸蒜頭來做保健飲品,媽媽說她飲了之後腸胃好了,因她長期服葯的副作用影嚮,令她腸胃不好,最近見她開心了,可能飲了這蘋果酢後健康改善了,心情也好些,她說要在日本百貨公司才買到,前幾天和姊姊吃飯時,在Sogo見到,便買了支細的試試,每天飲一茶匙,又好似暢順左喎!

去開超市,緊係要買吓零食,買左我喜歡的Jagabee薯條,雖然熱氣,間中食吓都無乜問題,仲買左魚仔同埋糖果,見有d乾果零食,係比較少見到既蕃茄乾同小紅莓乾,d蕃茄乾幾好味,口感好得意!等我下次再買先!

牛皇星

昨晚約好了幾個朋友,諗住去食Mr. Steak 既日本和牛Buffet,但係 book 唔到枱,都知道勁多人,於是轉去吳松街嗰間牛皇星食牛肉火煱,一行四人我同Ronald,阿偉同阿孫坐的士去,而嘉嘉就之後來會合,間店坐滿人,佢地安排我地坐樓上,樓上只有我地一枱客,好似包場咁!


由於一早温左書(飲食男女),一坐低,先叫個清湯底,然後叫左一客牛肉粒,這個牛肉粒即使煮耐左都唔韌,好好食,而另一碟叫牛姜,白色一片片像象拔蚌,一灼即熟,味道像肥牛的肥膏,但係口感爽脆,仲有牛脷托,我冇食到,對牛脷興趣不大,所以無食,跟住係牛肉刺身,切得好薄既雪花肥牛,味道平平,最後係牛肉片(頸位),本書話呢嗰頸位牛肉片好嫩滑,果然係好嫩滑,好好食呀!!!!!!!!!一定要食,係今餐最好食既一道"菜",我仲叫左墨魚滑,好味!


個侍應只係招呼我地一枱客,成晚聽我地傾計,都忍唔住答左幾句,今次見嘉嘉對雙眼皮自然左d,真係成個靚左,唔怪得咁多人去整容,食完飯我地三個女仔去睇化妝品,嘉嘉話想辭職,因為人工低,時間長,我地都叫佢唔好做,但係佢耳仔軟,比佢阿姐氹佢做多一個月,希望佢到時走得成啦!

禮

這幾天都收到各種'禮',前幾天朋友買了一盒大大盒的士多啤梨給我,這份禮物又甜又好味, 然後收到兩張喜帖,到我要做"禮',不過都比得開心,今年有好幾個朋友都會結婚,喜氣洋洋!

今天收到朋友從台灣買回來的史廸仔立體砌圖,好靚好可愛呀!唔捨得拆嚟砌呀!多謝阿天!!!!!!!!!

Living Beauty

早前看雜誌介紹的這本由 Bobbie Brown 撰寫的 Living Beauty,一直都在Page One 找不到,上Amazon 又要等好幾星期,原來要到 Bobbie Brown 的門市才有,一向覺得這品牌的產品很好用很自然,可以說她是現代化粧技巧的領導者,在多年前己推行用化粧掃的重要性,記得那時候她的門市裏那些化粧小姐的妝容,有別於其它牌子的化妝小姐,我記得是很自然的色調,加上長密的眼睫毛,那時候覺得好靚,佢地教既化妝技巧亦很好,只是自己不大化妝,所以沒有去學,那些化妝跟現在流行的,可說是沒有兩樣!

講返本書,它不是教化妝的書,裏面只有小量化妝技巧的相片,而大部份是化妝前後的對比,而這些示範都是由一些上了年紀的女仕示範,大概是四十歲以上的女仕,還有些養生之道,例如飲食,瑜珈等,我覺得此書較適合35歲以上女仕,看完真想去Bobbie Brown學吓d化妝技巧!!

六度廸士尼

辛苦左個幾禮拜,總於可以鬆一口氣,係時候relax吓!

前天一行五人,亞孫,亞偉同佢家姐老婆,去廸士尼玩!!!我第六次去啦!一早入左走,入場人數係我咁多次最少人一次,完全唔使攞 fastpass, 幾乎唔使點排隊!! 以前最多人玩既space mountain 同winnie the pooh唔使排隊,最多人當然係新既馳車天地同幸會史廸仔,不過都好快排到.

天氣唔算好熱,不過好曬,好在我醒目帶左把遮,見到d卡通人物覺得佢地好辛苦,熱死!

新加既海盜王唔係太特別,只係有兩個人扮成 Jack 既做型同人影相,如果早幾日去就有可能會見到周潤發tim.

我買左2隻水杯比媽咪,上面刻左我個名,有埋米奇同米妮做型响杯身,都幾可愛,送比媽咪做母親節禮物!

病、倦、累!

上星期傷風咳了好幾天......晚上睡覺老是在咳! 睡得不多,又流鼻水,頭痛.......加上這幾天公事繁忙.....比老細係咁"her"住.....無晒精神......只有一個字可以形容..........."謝"!!!!!

這兩天好了好多,開始有返d活動,昨天買了牛扒和一款叫"soup sense"的杯湯,應該是每天鮮制的,見保鮮期只有兩天,我選了一個 Southwestern corn and tomato soup,無MSG,無防腐劑,味道唔錯,所以賣$40/400ml.

跟住去屈臣氏買潔面產品,有幾個想試的牌子, Vichy, Aqua label 和Kose,最後選了近期口碑不錯的Aqua label ,此牌子是Shisedo的副線,價錢便宜,便買了make up remover 和 foam wash, make up remover 原來是乳狀,不是油,我誤會了,不過都試吓啦!

晚上在Ok見到新登場的小食jelly, 有5款味道,我選了芝麻和荔枝西柚,放左入雪櫃,明天試試好唔好味先!那芝麻味的包裝,好有黑白相feel!

D.A頂級安格斯肉眼扒

上星期見到新假期的副刋講"牛の特集"即刻買本睇睇,裏面介紹了近期有港商引入的D.A (Dry aged)處理技術,不太記得詳細資料,大概是一個類似雪櫃的肉櫃,調校到指定的温度濕度和風速,存放大概十多天,它的外表看來乾乾地,黑黑地,但係能保持豐富肉汁和味道,大概是某些化學作用吧!這種D.A牛扒在Landmark 的Three Sixty 有得賣,此外,在灣仔三里屯Mr. Steak 有得食!!!!我同Ronald睇完都好想試,我地想約左昨晚去試,我打電話去訂枱,個waiter問我係咪訂灣仔嗰間,我話有第二間咩?佢話响銅鑼灣有一間不過主要係食buffet,唯有去灣仔,反正我未去過三里屯,雖然唔係咁就腳.

我地坐地鐵去,都行好遠先到,去到見三里屯嗰度雖然係星期日都唔係咁旺,去到Mr.Steak裏面都坐左九成客,個waitress滿頭大汗,滿面通紅,好似好忙,我地响門口睇過Menu,見到一個XX三重奏牛扒(唔記得名!)有齊三種佢地特式牛扒,有D.A西冷扒,M10和牛扒,同埋唔記得乜野千層扒(大概係幾種唔同既牛扒切片叠成),我定决定叫一客D.A頂級安格斯肉眼扒($398)同三重奏($449)share!同餐廳細細地,掛左好相,有d五六十年代荷李活feel,落order時Ronald話想食生d,我地叫medium,我好少食咁生!都即管試吓,上菜好慢等左好耐,我地一人飲左一支啤酒先有得食,個waiter將牛扒放响枱之後,就介紹一下,(我見塊扒面頭有d血水,驚驚地!)佢話D.A扒下面有一小塊同等級數但係未經D.A處理既牛扒,佢話等我地可以比較到個分別,都好細心喎!我急不及待,先試D.A扒,一入口.................................好juicy ! 肉味好濃,夾集着外層的燒焦味....................係我食過最好味既牛扒!!!!!再食那一小塊牛扒.......................嘩嘩嘩!!!!...............相差好遠呢,那一小塊雖然是同等級數,同我之前食過已經覺得好好味既靚牛扒差不多,但這個D.A真係好味得多,至於那三重奏,只有D.A西泠有得fight,但係無肉眼咁淋,如果喜歡吃牛扒,就一定要試!食左半塊唔夠喉呀!!!!!!!!!!

D.A肉眼扒,下面有一小塊!

三重奏!!!給比下去了!!!

甜甜壽宴

晚上去了姨甥女的5歲壽宴,其實只是一家人吃餐晚飯,去了美孚的桃源,訂了一間房,只有十個人,媽媽見我染了髮,摸摸我的頭話我咁有型tim!!!!!!!我這大頭蝦姨姨,把生日禮物留了在家忘記帶去,我告訴她我買了禮物給她,叫她估我買了甚麽,她估是食物和玩具,我說不是,她叫我明天拿給她,我話唔得閒,下次先啦!早知跟姊姊一樣封利是給她,我也真太大懵了!

晚飯有鮑魚,侍應送上楊桃檸檬汁,她說吃鮑魚前喝,可清清味蕾,鮑魚會好味些,我也不肯定有否幫助,不過味道不錯,吃完主菜當然是甜品,今天的甜品很豐富,先來了熱辣辣的壽包,樣子很可愛,姨甥女最喜歡吃皮,當她吃完皮見到裏面的蛋黃油流出來,她大叫"媽咪,佢漏水呀!"引得我們哈哈笑,吃完壽包,還有桂花榚,杏仁茶和水果,當然少不了生日蛋糕,姊姊做了一個很漂亮的立體蛋糕,是米妮穿着一條大圓裙,米妮上半身是塑膠公仔,比Barbie大小小,下身大圓裙是鋪滿士多啤梨的半圓型蛋糕,蛋糕裹是各種berry,很漂亮和好味,只是蛋糕坐了長途車後溶溶地,d士多啤梨甩左d出黎,上面d忌廉ball ball甩左好多,所以無影相,真可惜.

美甲

昨天行街時見到些美甲產品,試了很多色,最後買了三個色,和一些貼紙,自己回家整,雖然是幾拾圓的貨品,買吓買吓都幾佰元!自己的指甲好易斷,尤期塗完甲油之後,所以要好小心保護,好多時都係整兩三隻手指,而且隻隻手指貼花要有d唔同款先覺得好睇.

杯湯

上次响超市見到這款像杯麵一樣包裝的湯,我叫它杯湯,有三款味道,我選了有菜的忌廉湯和較穩陣的粟米湯,尚有一款蜆湯沒有買,價錢也不便宜,要$14.9一杯,杯內水位指示在中央,即半杯多一點,裏面有些麵包乾,浸完水發漲了味道不錯!

晚飯去了Pokka食,我地叫了提子蘆薈果汁冰,韓式石窩飯,特色飯團,一口牛肉,意粉同鳥冬,食得好飽呀!

Highlight

今天的天氣很好,下午天朗氣清,在車站等車時好曬,我拍了張自己的倒影照片,差點miss了架車.

去了媽媽的家喝湯,喝完去了剪髮,Elsie老是叫我做highlight,便試試看,還是第一次做highlight,出來的效果比預期紅,她說落些髮臘會淡色些,但似乎不是!唯有等佢洗多幾次淡色些吧!

剪完髮去左Harbour city, 想去City super食拉麵,但係勁多人,唯有去最少人既Ocean terminal, 唔知點解今日成個商場都好靜,無乜人,我又去Fuzion度食飯,叫左茄醬鮮蝦燴飯,都幾好味!商場成層都裝修緊,呢個商場硬係做唔起SportX呢層,可能改做Food X 或者Beauty X會好d!!是關Faces好似唔夠位咁!而LV又擴充緊,新港中心又大幅裝修,遲d應該有一番新景象.