2024年4月九州鹿兒島自駕遊 Day 1 - 霧島、和氣公園、宮崎市

又去日本，今次同好友去九州南面嘅鹿兒島，好友在疫情前已經book 過機票，因為疫情剛開始便取消了，最近見 HK Airline 開始有機直飛鹿兒島，所以join 埋一齊去，加上日元滙價又見新低5.1 ，好似就快低過5😅 機票千六至千八，比起飛日本其他地方平一D，酒店都平！

今日8:45 機，每日只有一班機去，一班機返，我地各自去唔同嘅 lounge 食早餐，然後在閘口等，之前空姐叫7:55 要登機，唔使早成個鐘啩！在附近影吓相，再慢慢行去閘口，7:53 行去閘口望吓，竟然話Final call ，有架巴士等緊我地上車，聯絡唔到好友，但等左陣就見佢地上車，滿客就去停機坪，去到飛機已經8:15 ，見飛機仲有好多位，估計仲有一班巴士，果然8:30 有第二架巴士，最後上剩兩個人話漏左個袋在洗手間，見機組人員聯絡機埸處理，而passport 等有跟身，就冲冲上機，冇延誤，我同好友分開坐，因我在App 買機票，價錢貴一點可以即時揀位，好友上網買，平一點，要揀位要加百幾，原來上網買平過用App買，App係加左百幾蚊，冇得選擇唔揀位平D ! 

機程2小時35分鐘，冇飛機餐，只有輕食照燒汁雞肉包加支水及一杯飲品！中途小睡了一會，落機後見機場好細，只有我地一班機，落機後我第一個過關 🤣 因為坐第二行，前面嘅人去左廁所，我通常過關後先去，去完廁所行李都未出，好友亦未到，等左廿分鐘先見到好友，我已幫佢拎左行李，過完關就去攞車，同一班機有個 EGL 團，亦有幾組人同我地一樣去攞車，呢度一個counter 處理所有租車公司，我地今次用呢間叫做 スズキレンタカー (Suzuki rent a car ，網址 ：  https://suzukirentacar.jp/ ） 的租車公司，先在4號候車處等租車公司接我哋，接左我地同另一組香港人就載我地去攞車！大約6-7 分鐘車就到，見到呢間店係新開的，店內有D白色蘭花，一般日本新店開張都會見到，店員好有禮貌，辦手續用左十分鐘，好友話我地租果架車冇車，同我地免費upgrade 左架三菱 Delica ，架車好新，行左九千里，又大架，我地三個可以好鬆動！好友（司機）大讚，我地好滿意！

攞完車去揾食！去霧島市一間叫做黒豚の館，在一段馬路旁的一家食店，主要係食炸黑豚，去到已經兩點幾，想食已經賣晒，我哋叫左腰位，同埋一個 ShabuShabu，因為今晚book 左燒肉，所以唔食咁飽！呢庋大約有八張4-6 人枱，旁邊幾枱都係香港人😅 豚肉炸得好 juicy，味道唔錯！ShabuShabu 個昆布湯好清，肉唔算多，不過幾多菜，食到好飽！

食飽繼續行程，去附近嘅和氣公園睇紫蕂花 ，大約25分鐘車程，去到見有工作人員指揮交通，都幾多車，泊好車見到公園入口有少量紫蕂花，入到去睇唔算好大量，影左一陣行入D睇，原來𥚃面都好大量 紫蕂花 😍😍 有紫色、粉紅色、白色，好多呀！入面個花棚比入口果個多好多花，澎湃得多 😄😄 蝦蟲入面有啲蜜蜂，而且係一D好大隻嘅黑色蜜蜂🐝 😅 呢個公園有個巨型繪馬，話係日本一，繪馬上係一隻豬同一個古裝人 😂 

睇完紫藤花，揸車去對面睇吓一個叫做犬飼の滝嘅遊步道，其實係遠望個瀑布，但係個瀑布唔係特別大，而且個距離比較遠，所以覺得個瀑布好細 😅 真係到此一遊🤣

跟住我哋揸返車去宮崎市，今晚book 咗食燒肉同埋會在宮崎市住一晚，揸咗大約半個鐘嘅車程，經過一個叫做御池嘅地方，話係霧島市最大嘅火口の湖，見呢度有個停車位，我哋就停低架車影吓相，跟住望到湖邊下面有個類似燒烤營地嘅地方，就揸架車落去睇吓，呢度主要係有一個燒烤場地，叫做 Terrace Kazemachi ，旁邊有間叫做Restaurant Kamukura  お食事処かむくら(神鉾座)的食店，呢度只有幾個爐，係好有camping feel 嘅，對住個池都幾靚，好舒服，見有兩個爐已預約左，我諗呢度都幾搶手！ 

揸多十分鐘就到左宮崎市中心，先去酒店check in ，放低行李，再會合好友去食燒肉，就在酒店旁的商店街內，店名叫做炭火七輪焼 焼肉 てげ屋 ホルモン，我地book 左七點半，店內面積唔大，約有8-9張四人枱，及一D面壁位，我地坐獨立三個面壁位，另一邊仲有4-5個面壁位 😅 呢度有燒肉放題或者 a la carte ，我地叫左放題，佢係先上一碟雜錦肉比你先，目的係填飽你先！😅 日本的燒肉放題好多時都係咁做，呢間已經冇搭豬肉雞肉，如果係呢種做法，就最好散叫會抵！我地果碟雜錦肉有四款，好明顯有D唔係咁靚嘅部位，當中一款雪花牛肉係最好食，我哋再加雪花牛肉，但係再上果碟就冇之前嗰啲咁靚 😅 而我哋亦都飽啦，因為上一餐豚肉只係四個鐘頭前食完，所以都好滯 😅

食飽出去行吓！酒店對面就係Donki，又去睇吓D藥妝，Donki 開得夜又多野睇，啱晒我地！我地買完野就返酒店休息，司機都好攰了💤

酒店住後感 ：

Comfort Hotel Miyazaki

宮崎凱富酒店

酒店位於市中心後街，附近有商店街，對面有Donki，附近有幾個停車場，去酒店指定停車場可以claim 返酒店parking fee，酒店頗新淨，大堂地方唔係好大，可以選擇自助 check in，都有職員可以協助，近入口呢邊有D locker同埋自助寄存行李位置，接待處嘅另一邊就係食早餐嘅餐廳，餐廳入口有welcome drink，主要都係咖啡同茶之類，酒店係包埋早餐，早餐嘅食物都好簡單，大部份係麵包，亦都有沙律、麥片、炒蛋、飲品果D基本嘢，酒店房間都好簡潔，應該係翻新過，因為D裝修新淨，但係D電掣位就發黃，房內有張小枱同櫈，整體都唔錯，不過如果搭鐵路嘅話，就唔係咁近鐵路站，我發覺鹿兒島嘅主要交通應該係巴士，因為去到好多比較僻嘅地方，都見到有巴士站，當然班次可能會比較疏，如果係自駕遊就可以考慮，因為佢隔籬街有好多食店，比較適合遊客😄

深圳一日遊

相約好友一齊又返大陸，今次去落馬洲過境，第一次喺呢邊過關，過咗關之後，喺福田口岸站集合，然後一齊搭深圳地鐵去一個叫做紅山嘅站，由呢度搭過去要10個站，第一次搭深圳嘅地鐵，用香港Alipay都可以掃碼搭地鐵！呢度嘅地鐵係要用X光機掃描你嘅包包/行李先可以入閘！

去到紅山站，去一個叫做紅山6979 嘅地方，呢度有一個商場，叫做微醺廣場，我哋去咗一間叫做客家本色嘅飯店食飯，好友用美團app買咗個套餐，套餐有客家手撕鹹雞、梅菜扣肉、茄子、釀豆腐、炒菜心、燉湯，份量啱啱好！人均都係60幾蚊！手撕雞唔算好鹹，啱食，菜心就好甜！👍🏻

食飽飽再行吓個商場，去咗一間叫做俄羅斯國家館，主要係賣一D俄羅斯嘅食品，有朱古力、蜜糖、烈酒等等，我就買咗兩排朱古力試吓，味道唔算特別好，不過不失！

跟住我哋搭的士去咗一個叫做荷蘭花卉小鎮嘅地方，睇網上介紹呢度應該有鬱金香🌷同埋風車，去到只係見到風車，一朵鬱金香都冇😅，唔知係咪唔啱季節，呢度主要係賣花，就好似香港嘅花墟咁，亦都有少量雀鳥🦜和兔仔🐇售賣！我哋行咗一陣就坐低飲杯手搖，然後繼續下一個行程，我哋行去搵地鐵站，一路都搵唔到，最後選擇搭的士，其實我哋四個人搭的士係最抵，不過好友話驚塞車，呢一程的士坐咗好耐，期間因為接到公司有突發事件，有同事受傷 🙁 所以冇留意路面有D乜嘢睇🤦🏻‍♀️

去到一個叫做海上世界嘅地方，就好似香港嘅黃埔咁，有隻船做地標，我哋一到步見到係船前面一個廣場，有啲市集feel，我哋買咗茅台雪糕食，價錢一D都唔平，做咗優惠之後平均一杯都要50幾蚊！同食晏差唔多價錢！我哋坐喺船旁邊嘅樓梯食，食食吓有個女仔埋嚟Sell清潔用品，仲幫好友抹鞋，所以佢都買咗支返去試吓！我相信淘寶會平好多🤭

我哋揀定咗去一間食肆晚餐，攞位之前我哋去咗附近超市買啤酒，因為好想飲原漿啤酒，所以買咗一罐上去飲，今次去呢間叫做79號漁船，好友在網上睇過呢間係任食海鮮，不過呢間分店就冇任食海鮮，而係按重量計算海鮮，海鮮嘅選擇都好多，我哋就冇揀自選海鮮，而係揀咗個套餐，人均都係百幾蚊，套餐有百香果鮑魚、燒蝦串、蒸蠔、東風螺、蒸魚、炒飯、炒菜、蠔仔蛋餅、炸白飯魚、水果拼盤、飲品一jug，自攜飲品不用另加收費，我哋另外加咗個海蜇頭，食到非常之飽！我哋坐嘅位置係室外位，原本想話坐最出，想睇吓佢嘅水上匯演，但係最出嘅座位已經full咗，所以坐入一排，都叫做睇到，但係我哋全程冇乜點睇，因為顧住食同傾偈😂😂

食飽飯在附近影吓相就走，搭地鐵去福田口岸，要搭10幾個站，同埋要轉車😅搭咗成個鐘先返到去福田口岸，跟住過關落馬洲，就各自搭車返屋企！全日使費三百幾蚊，喺香港真係做唔到，難怪咁多人北上消費，不過對於我哋住港島及九龍嘅人嚟講，車程比較遠，都未必會經常上去！

 

Komeda’s coffee コメダ珈琲 (香港）

平時去日本都會去呢間 Komeda’s coffee ，分店多，咖啡都唔錯，又好坐，價錢唔貴，同埋最鐘意買佢花生豆豆做手信！

之前見到 The One 地庫 Aeon 開左呢間店，當日因為食飽左冇幫襯，早兩星期想去試吓又要等位，今日早左起身，就去試吓！

去到就有位，呢度有三個面壁位，啱晒一個人嚟！ 呢度掃 QR code 落單，終於有中文餐牌睇😂😂 叫左拿破倫意粉追加塊多士，本身意粉有塊法包，追加嘅係方包，方包可配牛油或果醬，如果要晒兩樣要另計$10 😅 咖啡要左大杯裝嘅豆乳咖啡，每杯咖啡都跟一小包花生豆豆 (11:00 後才有) 😅 意粉份量唔多，跟左沙律菜，法包🥖對我嚟講好硬 🤣 方包好味又鬆軟！咖啡不過不失。不過總覺得日本的豆乳或燕麥奶味道唔太好！ 

食鉋睇吓門口有咩賣，有方包，花生豆豆、盲盒，咖啡豆、杯等等，我原本想買方包，但份量太多！(好似有6片) 花生豆豆留返去日本買，呢度太貴了！🤣🤣