Big Sur

 

 

今日去咗中環，因為中環 Donki 尋日開張，今日去八卦吓！先去食D野！原本想去PMQ食嘢，但係 PMQ 冇乜嘢好食，行過士丹頓街見到呢間餐廳，感覺幾舒服，所以就去試試佢！

我地叫左個 Caesar salad 、smoked chicken、牛肉漢堡，兩杯咖啡，沙律加左D魚肉，以前 Caesar salad 只有菜、芝士、麵包粒，依家都加左一條條魚仔，smoked chicken 跟左D焗羽衣甘藍，味道唔錯！漢堡包我沒有試，睇落唔錯！

食完野行去 Donki，超多人！好迫咁入去行左一圈就走，地方好細好迫！😅

去撘地鐵時，行去香港站睇吓台灣品牌在地鐵站內的 Showline ，開了短期手信店，牌子是海邊走走，之前沒有食過，主要係蛋捲，買左一包細盒的肉鬆蛋捲試試，味道一般，我覺得唔夠鬆脆，太厚了！

利星海鮮火鍋小炒

 

好友 T and K 臨時即興約食飯，去咗深水埗呢間小菜館度食，我哋幾個食嘢嘅口味都好相近，大家都想食羊腩煲，所以叫咗一個羊腩煲，但係見佢份量都幾多，所以只係加多兩個小菜，一個唔記得乜嘢排骨，令一個就係豆豉鯪魚油麥菜，最終碟菜都係食剩少少，因為大家都好飽，個羊腩煲嘅肉都幾多，味道唔錯！價錢都合理！

整容液 Beauty water

 

藝智自小因其貌不揚及肥胖而自卑，而且暴飲暴食，受盡欺凌，有一天她收到廣告電話，介紹一種美容液，他不以為意，卻收到了美容院的送貨，以及一條介紹使用的手指，看過影片介紹後，她決定前往一試，但自己做的效果不好，所以前往整容液的公司作出修補，並要求父母支付龐大的費用，經過修補後，她變成了又靚又苗條的女孩，走到街上，非常矚目，她決定改名，及要進入娛樂圈，務求能夠成名，卻因為意外，讓她徹底毁容，為了變回原本靚樣不惜代價.....！

同好友食完飯，臨時決定去睇呢套戲，所以匆匆忙忙遲咗入場，睇唔到最頭一段，我哋一直想睇呢套戲，只係夾到今日去睇，睇預告片覺得套戲應該係恐怖片，雖然睇影評話佢係講一D比較警世，唔好只求外表之類的含意，但係我覺得套戲都冇好明確咁表達呢一樣野，反而我覺得當一套驚慄片睇就算，如果要講警世，只能夠講人係唔能夠滿足於現狀，只係不斷追求要更多，結果只會弄巧反轉！個結尾就麻麻哋，我覺得可以拍得好D！

Poseidon restaurant & bar

好友 F 的生日飯，三人行，好懷念以前四人行，始終食野可以多D選擇，而且 F 的前度是很有食力，每次都做最後勇士，包尾食晒D野，依家三個人會就住叫野食！

上網 search 到呢間餐廳，用 app 訂枱有主餐牌食物7折！又試吓佢，在亞士厘道的商廈，都幾多人，好彩訂咗位！我地坐卡位，很寛闊落，可以坐到6個人，我地叫左半打生蠔🦪，好友 F唔食，我同 J 一人三隻，生蠔味道ok ，不過太瘦了！唔係咁抵食！另外叫左龍蝦牛扒🦞🥩，同埋海膽魚湯意粉，食物質素又幾好喎！好食！牛扒正！👍🏻👍🏻

我地買左蛋糕🎂，蛋糕都幾大個！三個人一人一大件😅如果四個人分就好喇！

樂天皇朝

好友 S 又約食飯，最近都幾頻密同佢食飯，因為佢而家份工係freelance ，所以佢都好得閒，只係要講多幾個電話睇多幾個message，另外約埋好友F 同佢男友四個人一齊去食嘢，去咗旺角雅蘭食飯，去到雅蘭就諗起以前，好多時同家姐去樓上酒樓度食飯，已經唔記得咗間酒樓個名，淨係記得我地好鍾意叫一個瑤柱扒四蔬嘅菜，依家都唔見有酒樓有類似咁樣嘅餸菜，其實只係四款唔同嘅蔬菜，果陣時覺得好好食！

今晚訂咗7:30 ，我早咗去到，坐住等佢哋，睇吓個餐牌嘅時候見到樣樣都好似好好食，類似係上海菜咁樣嘅菜式，餐牌D相影得好靚，所以好吸引，樣樣都好想食，不過到時睇吓份量有幾多再決定，好友嚟到同我一樣，睇到餐牌上面D相都想食，不過有D嘢食都已經賣晒，因為呢度9:00就 last order ！最後我地叫咗小籠包、麻醬油麥菜、松子桂花魚、京醬肉絲、紅燒肉、上海炒年糕，D餸上得好快，可能想快D收工，食物嘅質素都唔錯，份量比較細，個小籠包有八種味，老實講真係分唔出有D咩唔同，因為個餡係一樣，只係個皮唔同味，但係分別唔大，食完之後，我地叫甜品，好友F的男友好開心我地叫甜品，因為好友F唔食甜野，平時佢地兩個人撐枱腳冇乜機會食，如果要食就要預自己人一個人食嘅份量，但係好似呢一類咁樣嘅甜品就一個人一定食唔晒😅，我地叫咗雷沙湯丸同埋豆沙鍋餅，甜品都幾令人失望，豆沙鍋餅同平時食嘅好唔同，雷沙湯丸亦都同之前食過嘅唔同，本來唔同味都唔緊要，不過唔同味得來又唔係咁好食！好友 S 話下次去荃灣食另一間老牌上海菜！

末世綠洲 Greenland

John 係建築工程師，準備同兒子慶祝生日，新聞亦都每日報告彗星Clarke 將會墜落地球，此時他接收到政府的通知，他一家三口被選中前往避難所，John 原本不以為意，但係第一組彗星墜落嘅時候，造成好大嘅破壞，所有人都意識到事情唔簡單，John 即刻帶妻兒前往空軍機場，據知政府會送佢哋去格陵蘭的避難所，他們到達機場的時候，因為 John 的兒子有糖尿病，而被拒上機，因為末日將至，好多人湧去機場希望有一線生機，混亂中他們失散了......！

謝拉畢拿都有好多戲拍，今次唔使 show 肌亦都冇大量打鬥，做個普通住家男人，其實我覺得佢做戲都係好一般，女主角就做得幾好，覺得佢好熟口面，唔記得咗係邊套戲見過佢，套戲都幾好睇，末世來臨嘅時候，有人選擇逃亡，有人選擇順其自然，有人為求保命不惜一切，人性的真面目🤦🏻‍♀️

飯局主場 - 第十八回

 

好友F 嘅生日又到啦，雖然過咗幾日，我哋都會同佢慶祝，我地約好咗分頭行事，我去買蛋糕🎂，佢哋指定要食Tony Wong 的士多啤梨拿破崙！好友K同老公、兩個仔去買餸，我地會合嘅時候先發覺壽星女唔見人，果然佢仲係屋企！🤦🏻‍♀️不過我地煮餸都要時間，所以由得佢遲少少到！

今晚整咗蒜蓉蒸開邊蝦、煎羊扒、蘆筍炒帶子、煎䱽魚、上湯焯皇帝菜！五個餸好似唔係好夠，所以我去接好友F嘅時候，順便買多盒手撕雞，飯後仲有蛋糕同水果，所以一定夠食！煮飯足足煮咗差不多四個鐘，餸唔多但係好好味，個個食到飽飽，清晒所有餸，一D都唔嘥！食完飯再切蛋糕，水果今次有香印、水蜜桃同埋車厘茄！今日飲咗支菠蘿酒同埋冰酒，一支蘋果汁同三罐大啤酒，傾偈傾咗成晚好開心！兩個細路嘈到不得了😅好彩時間尚早唔會俾人投訴！

Contrast

今日約左好友晚飯，早上有時間，所以去搵食，去左長沙灣，極少去呢個地區，近期一D文青 feel 的咖啡店，由太子開到去深水埗再到長沙灣，今日就去試吓，呢間咖啡店都幾開揚，店子在街角位置，一邊是入口，另一邊做咗玻璃窗，有更加多陽光透入店內，去到嘅時候剛剛滿座，其實門口吧枱位有七個位，但係佢話吧枱當一張枱計，，所以只能夠坐四個人，因為已經有四個人客，所以要等位，店員話人客都係啱啱入去，所以應該冇咁快，因為正值午餐時間，我諗去第二間都要等位，所以就等一等，等咗半個鐘頭就有位，見到店入面大概可以坐30個人，裏面有一張大嘅四方枱竟然坐左八個人！只係用版透明膠版隔開，唔明佢點解門口張吧枱唔可以搵嘢隔開（可能唔夠膠板😅），反正都有好多人等位，同埋呢度可能都係午餐時間繁忙D，而且店中間有D位其實好鬆動，可以加多張枱坐多兩個人都唔會迫🤔

呢度係安排咗坐位之後先至落order，行返出去收銀處度落單，然後餐具同埋水係自助，不過店員話冇晒水杯🤦🏻‍♀️🤦🏻‍♀️，我叫咗一個半熟蛋牛油果沙律，一杯 Matcha Latte，同埋一件咖啡巴斯克芝士蛋糕，沙律就好簡單，生菜都好脆，抹茶鮮奶就有D淡味，蛋糕其實好細件，不過都幾好味，整體來講食物嘅質素都唔錯，見店員全部都係一班年輕人，唔知間店開咗幾耐，可能只係幾個月，店子今期聯乘一個叫做 kennisdaily 推出作品展，應該係話一D好香港人生活嘅嘢，係比較有趣嘅一D繪圖，你我他都曾經做過嘅嘢！例如會試過飲紙包飲品🧃嘅時候會咬支飲筒😝都幾得意😄

麵鮮醬油房周月

今日無無聊聊走咗去銅鑼灣，雖然係星期六，但係條街都唔係好多人，先去搵D嘢食，突然間好想食拉麵，去咗呢間度試吓，去到門口先見到佢係米芝連推介，店入面冇乜人，只有兩個客，睇吓張點餐紙，有五款沾麵同埋五款拉麵，叫咗個香蔥拉麵，個麵有好多葱，啱晒我，個湯都幾濃味，麵條都幾爽身，幾好食！