Black Sugar coffee

由大館落返中環，去返原本我地想去果間coffee shop，因為大家都想飲杯咖啡，雖然佢冇得坐，大家可以企喺度傾一陣計，店名係取自店主一對狗仔其中一隻個名，店主有兩隻柴犬，之前睇宣傳廣告，話有機會見到兩隻柴犬，不過我相信個機會好低，因為地方實在太細，睇返條宣傳片，先發覺條片一路影住D狗，所以睇唔到間店原來係咁細，雖然只有企位，但係企位最多企四個人！其實門口有一張木凳，不過有兩個店員自己坐咗，所以人客冇得坐！

我地叫咗杯Latte、Flat white、Cold brew，咖啡唔錯，不過店入面較熱，因為地方細，人又多（四個客、三個店員）加上我地有下場，所以好快走！

the chinese library

 

上月同好友J和F睇完廝殺半島之後，今日再相約去街，先去中環食D嘢，原先搵咗一間coffee shop，去到先發現原來coffee shop係好細間，而且沒有座位，所以就冇去到，跟住我哋行咗上大館，因為好友未去過，所以過嚟行吓睇吓，順便食嘢，其實呢度嘅食店唔多，只有幾間，我地見到呢一間中餐廳，入面嘅裝修有D維多利亞風格，唔係好似中菜館，旁邊仲有酒吧，同埋有一個地方可以high tea，不過今日冇high tea，所以我地就食中餐，我地叫咗幾款點心，食物嘅質素就一般，不過個樣都好精緻，而且有少少返傳統嘅點心，例如燒賣就有黑蒜餡，只有蝦餃同埋腸粉係傳統點心，而價錢來講呢度係偏貴，不過真係食環境，因為服務好好，座位好舒服，如果天氣涼一D可以坐室外位添，我地食完野去露台果度影吓相先至走！好友話要擺個 Chill 了嘅甫士，呢排好多時都講呢個字！

食完嘢我哋在大館行吓，我之前已經嚟過一次，佢哋就冇嚟過，所以去參觀下，行過對面監房，中間會有幾條短短的橋，我講笑話果條係嘆息橋，因為上次去威尼斯，果度有一條嘆息橋，係比囚犯見家人最後一面，呢度呢條橋就係通去監獄，所以我叫佢做嘆息橋！😅行過嘆息橋嘅時候，見到對面有人拍緊戲，，原來係郭富城！好友 F 係佢fans，當然係非常之開心啦，不過果度有D工作人員，趕走喺度睇嘅人，態度唔係幾好，其實影咪話見到偶像望吓都好正常，最緊要唔好阻住人或者嘈到人就得啦！都唔需要晦氣叫人走！我地見佢地未正式拍，所以望左一陣就走！

倫哥私房菜海鮮火鍋

都好耐冇打邊爐啦，今次相約好友出嚟聚下，都有幾個月冇見，一如以往，甩底王亦都係臨時今日話唔嚟！早幾日我哋約嘅時候，佢好快就話OK，已經覺得佢會甩底，果然！

呢間食過好多次，西環呢間都食過一次，但係我哋呢一group人未去過，本來去食火鍋撚，但係甩底王話要食雞煲，所以先至轉去呢間，點知佢又甩底！既然訂咗枱就照食啦！我都好想食雞煲，店入面好靜，只有三枱客，所以只有一個店員，見到咁嘅情況都覺得好慘，見到佢哋都係做套餐，雞煲可以refill ，火鍋配料亦都任食，亦都會有一D海鮮，個雞煲好好食，我哋都想refill，但係如果食多一轉，就會食唔落火鍋，所以我哋都係忍口，海鮮有一隻蟹、三隻鮑魚、仲有魚、蝦、貝殼類，蝦係可以refeel，牛肉就有一碟，佢比牛頸脊，當然份量係比較少，梗係想你叫多碟啦，所以先俾啲靚野你食！不過配料都有好多，所以都唔需要叫牛肉，因為第一 round 已經俾咗墨魚滑、蝦滑、菜類、丸類，我地只係再叫咗菜同埋墨魚滑，食到非常之飽！

麥路人 I’m livin’ it

森仔和母親、兄嫂住在公屋，森仔經常打機，因為一次與兄嫂爭執而離家出走，他在隧道露宿的時候巧遇亞博，便一直跟着亞博，發現到他如果過他的街友生涯，亞博知道哪裏有食物銀行，晚上會到麥當勞做麥難民，起碼有冷氣，可以瞓一覺，好過瞓隧道，亦學習到街友的生存之道，這段期間，他們一班同樣在老麥打躉的麥路人，每個人都有自己嘅故事，唯一相同的，大家都是在貧窮線下掙扎求存......！

套戲都幾好睇，城城都做得好好，難怪可以攞到獎，不過同楊千嬅好似唔係好夾（個外型），每個演員都做得好好，故事都好感人，我相信在繁榮的香港背後，仲有好多貧窮線下的人，像戲入面的人一樣！聽講張達明攞咗一個最佳男配角獎，不過我覺得係呢套戲入邊佢都唔係好大發揮！ 

皂工房 Savon workshop

頭先食嘢嘅時候， 髮型師話冇返工，今日去唔到剪髮！所以就去附近行吓，由食店行出黎，見到對面有一間賣手工皂的店，又去睇吓，呢度主要係賣店家自己做嘅手工皂，同埋整手工皂嘅工具同埋原料，選擇都好多，而且仲有自家製洗頭水、護膚用品、消毒液等等，行咗一圈，買咗一支首烏洗頭水試吓，因為覺得掉髪都嚴重咗！

沿着大南街一路行，好多買皮革或者係製衣配件嘅店，見到亦都有D Works shop，除咗有皮革製品之外，亦都見到有陶瓷班，如果有時間真係可以去試吓，所以影低左D資料先，等有機會就去試吓！

 

Alive food

今日諗住去剪頭髮，所以去旺角搵嘢食，之前睇雜誌介紹呢一間小店，位置在太子與深水埗之間的大南街，門口寫住合舍，因為裏面有兩間食店合併一齊做，同埋亦都有一個位置，係放左好多書同埋宣傳單張，唔知佢係賣D乜嘢野，因為冇認真去睇，行埋去收銀處，有D食物嘅樣本擺咗出嚟，亦都有一個牆上的餐牌，食物係來自兩間分別叫做 Moono 同埋 Alive food的店 ，Moono 係賣素食，主要係一D素撻，而 Alive food 主要係做酸種麵包，有原個麵包售賣，亦都有吐司，同埋一D飲品，我叫咗一個焦糖西班牙扁桃配腰果忌廉芝士酸種麵包吐司！個名好長！不過店員話冇扁桃改咗做無花果，飲品方面，有幾款叫做 Kombucha 的飲品，應該係茶之類的飲品，店員話有三種味，我揀咗菠蘿辣椒，因為呢個組合好特別！

店入面嘅座位唔多，只有10個左右，座位呢邊擺咗一D麵包同埋馬卡龍嘅sample 在膠箱裏面，而膠箱後面屬於廚房範圍，擺咗一D原個嘅酸麵包，一路都有人入嚟睇D麵包同埋查詢，聽到店員講解，佢哋嘅酸麵包有幾款，如果成個買返去，放入雪櫃可以儲存一星期，如果放冰格就可以儲存一個月，本來都有D興趣，但係我唔係咁鍾意食太硬嘅麵包，我食個吐司嘅時候都覺佢個皮較硬！所以最後都冇買到，個吐司甜甜地，無花果肉都幾多，果茶就想像得到又酸又辣，叫做貪得意試過就算！

前兩晚發生怪事，瞓到半夜竟然跌咗落地下，最奇怪唔係跌咗喺床邊，而係隔咗兩三、步嘅衣櫃果邊，唔通碌咗過去？🤣 瞓返上床覺得手臂有D痛，應該係撞到，但係好快又瞓着咗，第二朝瞓醒好模糊，諗咗好耐究竟係咪發夢，跟住摸吓手臂瘀咗，即係唔係發夢！唔通夢遊？ 😅😅

 

帶廣 はげ天 OBIHIRO HAGENTEN

睇返在北海道影嘅相，好懷念上次在帶廣食果個豚肉丼，諗住上網睇吓佢有冇分店在日本其他地方，點知原來香港有分店！所以今次特登搭車去圓方試吓佢，去到見到個門口好熟口面，我估可能之前在圓方已經見過，只係當時冇去過帶廣，所以冇為意佢，定係因為佢個裝修同好多呢類食店一樣呢？

入到去睇吓個餐牌，覺得有D唔對路，同上次喺帶廣果間個風格好唔同，雖然佢都有豚肉丼，但係只係擺喺餐牌最後果幾頁，上次帶廣果間都有一品料理，不過我哋冇詳細睇，因為佢門口棟咗個牌，主要食豚肉丼，總之個餐牌就唔一樣，可能要適應香港嘅市場所以就餐牌又唔同，除咗豚肉丼，另外亦都叫咗個天婦羅紫蘇葉海膽，本來想叫個活帆立貝，但係佢話賣晒！另外仲叫咗杯梅酒！🥃

紫蘇海膽份量好細，一啖食完，豚肉丼個樣就好相似，不過味道就差好遠，雖然佢呢度話用北海道嘅豚肉，豚肉唔夠 juicy，有D韌，個汁亦都唔係果回事😔，在帶廣食 ¥980，呢度要 $145 ，貴左一倍！唯一係D飯都 ok ，同埋店員服務好好！下次可以試吓食其他嘢 ！

 

鮨穴

時代廣場呢間鮨穴，前後都去過兩、三次，每次都係食刺身壽司，今日相約好友J 和K，今次試吓佢D丼！

限聚令仍然係兩個人，我哋要隔開楚，今次坐吧枱位，只係隔開一塊板，我地叫咗加拿大海膽丼，三文魚籽丼，另外再叫一個刺身拼盤！食物嘅質素都算唔錯，其實我覺得佢個價錢係偏貴，不過佢有D午餐 set 其實都平左好多，我地因為要用商場 coupon，所以食正價嘅set ，因為用咗coupon 等於半價，真係好抵！

我哋都好掛住之前一齊去日本，築地果間鮨國！上次我地去就係有叫咗海膽丼同埋三文魚子丼！個個都好想去日本，真係唔知幾時先可以有機會去，我諗最快都要出年，好友已經問定，如果可以飛係咪即刻要去一轉日本，我話出年都要睇吓情況點，因為編左假期好難再改，而且我相信啱啱開始飛得嘅時候，酒店同機票一定好貴，因為個個都想去，亦都好多人唔介意比多D錢佢，因為今年冇去過旅行，慳埋D錢就可以去切貴D，我就情願等一等！其實而家可以買定可改期嘅機票，而家都好平，不過唔知改期可以改幾耐，我都冇深究，酒店亦都好多可以免費取消，仲要係訂左果日嘅前一、兩日取消都得！只係你俾咗錢之後驚唔驚佢會執笠！

 

點茶公館

又去南豐紗廠，因為知道佢做可口可樂展覽，不過去到先發現原來要網上登記，所以入唔到去睇，只可以在出面影幾張相，下星期睇吓有冇時間再去！

原本約咗好友一齊睇展覽同埋食lunch，不過好友突然間屋企有事嚟唔到，我唯有自己去食，好耐冇去過酒樓飲茶，所以好想食點心，見到呢間點心小店，望到招牌左邊紅噹噹嘅裝修，有少少人客，但係店員叫我坐另外一邊，右邊係半開放式，以綠色裝修為主，加咗D霓虹光管招牌，有少少大排檔feel，店入面只有兩個客，加埋我先至三個，不過坐低一陣果兩個都走埋，不過後來又來多一個客，見到點心紙好多樣嘢都想食，但係一個人食唔到咁多野，叫咗我最鍾意食嘅叉燒包、蘆筍蝦餃、黑白蝦米腸，在門口見到一款包，係飛行棋造型，原來係流沙包，一個人真係食唔到咁多包，所以冇叫到，既然佢擺咗個sample出嚟就影返張相，下次同朋友再去試！個蘆筍蝦餃幾好食，蝦嘅份量都算多，都好爽口，叉燒包就有D失望，味道有D淡，叉燒份量都比較少！腸粉就普普通通，不過佢冇比甜醬辣醬我，淨係比豉油，我都冇特別問佢攞醬，淨係點豉油都OK，食完都好飽！

下次可以再嚟試吓其他點心，不過呢個商場有好多間食店我都未食過，下次或者試吓其他都可以！