2018年11-12月 開心東京遊 Day 3 - 池袋

今日可以瞓晏少少，因為今朝早去池袋食墅，果間鋪要11點半先開，所以我地遲少少出去，我地搭山手線去池袋，在西口出，在中央通行入去，轉入左邊橫街，就係之前周奕瑋介紹的一家刺身小店，名叫 みなと( Minato) ，我地11:45 去到，見佢已經開左，門外有四個人排隊，從門外望入去，小小的店子，只有8個，近門口勉強加左個單丁位，叫做可以坐多一個，好迫夾！預計要等一個鐘左右，店內的人多數兩個兩個，要等四個位有難度，所以我地決定要分開坐先，排緊隊果陣前有兩個走左，剩返兩個，都係港人！等候時見這店外觀有點舊，招牌用油漆遮蓋了幾個字，隱約見到原本係寫住 そば処，之前可能係賣蕎麥麵，依家改左賣海鮮丼！等左55分鐘到我地！先入兩個食住等，兩排坐位，每邊四個，有兩個走就可以調位！等多八分鐘我地都入埋去，單丁位果個走埋，發現八個客都係香港人！

我地叫左上北海丼同埋好似係上うに丼，睇返 menu 都唔記得叫左乜野！好似個個丼都係一大堆海鮮！呢度先付款後上菜，D海鮮雖然唔係好高級別，但係都好新鮮！飯的份量唔太多，啱啱好！食左一半左右，見好友身邊兩個港人離開，我地就調位一齊坐！一齊影下相！望到牆上餐牌有 大トロ （大拖羅），又叫一份試下，一碟只有四件的大拖羅非常厚切！入口即溶！正！我地都食左一個鐘多D，其實等佢整果度耐D，因為得老闆一個人做，逐碗整要耐D，所以周奕瑋介紹果陣都話，店主都唔想接受訪問，怕太多人來，眼見今朝全部都係港人，都應該係睇左電視介紹先來，單睇佢門面，應該吸引唔到遊客，不過見大家都好守規矩，好斯文，唔會嘈吵，可能冇大陸人，淨係得香港人好D，老闆應該生意好左又應付得來！食完野同老闆娘合照留念才離開，坐單人位的客人主動幫我地影相，佢又係香港人，在沒有大陸人的環境下，香港人都是友善的，始終在日本請地方大家都懂得禮儀的重要！

食完野去附近行街，同好友去玩夾公仔，可惜夾唔到！跟住我地一齊打機，玩 Mario 因為有四部機，啱啱好可以一齊玩！即時對戰，我第一次玩，唔識玩，所以局局都包尾！玩左幾局見有人等就走！跟住去行 Tokyu hands ，逐層睇都行左兩、三個鐘，每人買左少少野，我見到有人示範一種修補花損屏幕的物料，好似唔錯，如果可以幫我整埋就好喇！我買左少少聖誕裝飾，原先諗住行完街take 個break 去食壽司，因為見到我上次去九州食果間くら寿司店，但係行得耐左，所以直接去食晚飯，好友上次在附近食過一間烤肉店，話好好食，我地行到去餐廳點知冇位，話就算夜D都冇，唯有轉食其他嘢，行過少少有牛かつもと村(牛吉列)食，雖然其中一個好友唔係好喜歡呢個，但係另一個好友又未食過，最後都係去咗食，我地叫最細份嘅套餐，為左晏D可以再食其他嘢！同我上次去新宿食果間同一間店，質素都唔錯，店子就在無敵家對面，見到無敵家排晒長龍，知道佢都好多人識，但係我就未食過，見到佢排晒長龍都唔想去排！我哋食完牛吉列又繼續行街，呢一轉就行藥妝店，一行藥妝店可以行好耐，我地要格價啦，又要搵我哋想要嘅嘢，有D又幫人買，又要影相又要問，買嘅野唔多不過搞咗好耐，跟住又去行驚安殿堂，驚安殿堂真係有排行，逐層行下睇下都行左個幾鐘！

行完出嚟又再去搵嘢食，見到有間叫緣的燒肉店，就入去試下，我地先叫左三款肉類，見到個樣麻麻哋，先發現原來佢係韓式嘅烤肉店，燒左第一碟覺得麻麻地，勉強食咗兩碟多D就放棄喇，當係坐低 take 個break 食飲杯野就算，再搵其他嘢食.

見到無敵家唔使排隊，因為已經接近12點了，就決定去試一試，始終佢咁出名我地都未食過，既然唔使排隊就去試下，我地每人叫咗一碗拉麵，見個樣都幾靚，先試下個湯，都幾好味，唔怪得咁多人去，拉麵同埋叉燒都好食，算係食個之中幾好嘅一間拉麵店，在日本有好多拉麵店嘅質素都唔錯，我就話佢唔係最好食，不過都算係東京區的首選！

食飽之後都12點幾，今次又搭的士返去，應該係最遠嘅一程車，都係搭左四千幾円，唔算太貴！

2018年11-12月 開心東京遊 Day 2 - 豊洲、築地、秋葉原、Skytree

今朝大家都早起身，今日預計全日食好西！第一站豊洲！築地場內市場由十月中搬左去豊洲之後，今日第一次去睇下乜野環境！比起築地，去豊洲的交通冇咁方便，我地由鶯谷站出發，搭 JR 山手線先去有樂町轉有樂町線去豊洲站，再轉百合海䳼線，搭三個站去市場前站，先至去到豊洲魚市場！以前在新宿，一條都營大江戶線可以直達，就算在新宿出發，都要轉兩次車，除非住汐留或者台場先可以一程火車到，或者池袋只需轉一次車，日後可能有其他配套設施！當然可以計劃全日在附近台場一帶玩，就可以買百合海䳼線的一日乘車券，沿線玩埋其他地方！

到達左豊洲巿場就見到人頭湧湧，始終新開，一定多人，我地先去搵寿司大！呢度地方好大，分左南北兩面，睇Google 地圖，寿司大就在屋上綠化広場果邊，行過去都幾遠！去到食野個 area，比想像中細，有大約十幾間食店，壽司店的面積比以前大了，但係都係坐十幾人左右，去到寿司大，見佢直情關左門！只係12點就已經關門，唔知佢平時係咪都收咁早，抑或係今日早D收？雖然裏面仲有客，可惜想排隊都冇得排！食唔到寿司大，一場黎到，就搵其他野食，不過呢度間間都排長龍，我地去附近參觀一下，魚類拍賣市場已經收左工，不過我地可以隔住個玻璃望下，然後看到有一間叫做銀座鮨正 The Impression 的壽司店，見到人龍都唔算太長，又即管排下，排左差唔多一個鐘就有得入去喇，同其他壽司店一樣，都係食 Omagase ，佢有兩個set選擇，我哋揀咗貴果個，呢度只有12個位，坐左11個人，有九個都係香港人！整壽司嘅師傅，竟然有一個係講廣東話嘅香港人，個香港師傅負責我地對面果邊果幾個人嘅壽司，佢地叫咗平D果一set，而我地呢邊除咗我地四個仲有三個日本人，睇落應該係三爺孫，兩個小朋友都好可愛，負責我地壽司嘅就係大師傅，都係聽果個香港人師傅講，話呢個係大師傅，我地好期待壽司嘅質素，相信會好好，每款壽司，都會話俾我地聽係乜野壽司，不過係講日文，所以唔知係乜野魚，當中有D識既，有螺、赤身、熟蝦、大拖羅、鯛魚、海膽、赤貝、鯨魚！鯨魚就本來係唔識嘅，但係師傅識用英文講 whale ，所以先至知道係鯨魚，我都係第一次食，之前聽講話好難食，食落又唔係難食，個質地有D特別有D煙韌，我地見兩個日本小朋友食海鮮丼，睇落都好吸引，不過我地都夠食，所以冇再叫來試！今餐真係大滿足！

食完豊州就去返築地，場外市場仍然繼續營業，搭返車過去都好快，唔知係我地晏左去，定係場外市場搬走左，亦都可能因為落雨，今日明顯少左好多人，應該都係我地晏左，因為見好多都收左檔，去我地上次食過果檔買大拖羅刺身，都係剩返幾舊，揀咗一舊切片食，好好味，入口即溶，正！食完大拖羅，就去食蟹腳同埋帶子，再食埋燒扇貝，真係飽到不得了！

今日行程好緊湊，食完築地就要去秋葉原，好朋友要搵 figure 公仔，行咗好幾個圈，雖然有D睇啱，但係價錢好參差，而且偏貴，所以好友冇買到，買唔到心頭好，跟住就過去Skytree，上到月台，佢見到我之前幫襯過嘅一間小店，呢間小店有好多牛奶賣，有好多唔同牌子款式嘅牛奶賣，我地梗係飲番支啦，有好多選擇，都唔知點揀，我地揀D特濃嘅飲，香港好多人飲北海道3.6同3.7嘅牛奶，呢度最高可以去到4.6 ，不過無論濃度係幾多，都一樣係好好味，我地一人飲咗支，然後先去搭車！

去到 Skytree 睇下間餐廳收幾點，先去行左街先，我地在商店街買咗小小手信，好友又買咗條頸巾，然後先去食飯，上咗去31樓果間摩天樓，之前食過兩次，對上一次係同好友一齊食，佢哋好掛住呢度嘅鐵板燒，所以今次又一齊去，我地叫套餐，有兩個唔同價錢，就叫一個貴嘅三個平嘅試下，貴果個嘅牛扒係好食好多，不過平果個都好有水準，只係一比較之下，貴果個就係好食D！套餐有海膽、鵝肝、鮑魚、龍蝦、牛扒，樣樣都好好食！

食飽落返去商場已經關晒門，行過對面商場間超市仲未閂門，即刻入去行街買水果，好少有超市收咁夜，我地都行咗成個鐘，買咗D水果、飲品，因為我地拎住好多嘢，所以試吓佢去搭的士，睇下貴唔貴，因為我地住嘅地方離呢度都唔遠，我地搵咗架大D嘅的士坐，坐得舒服D，返到去都係二千幾円，比想像中平，因為四人分，每人都係幾百円，同搭火車差不多價錢！