太湖

好耐冇去太湖食飯喇，以前在港島區返工，好多時收咗工都同D同事去太湖食飯，離開咗港島區之後就冇去過喇，今晚同同事 farewell ，原本去耀華街食西餐，但係間餐廳格局比較迫，而且店員態度麻麻地，所以轉左去太湖食，我地一行11人，在銅鑼灣行來行去，去到酒樓攞咗間房，傾計都方便D，其他同事都有間唔中去太湖食飯，所以佢地都知道叫D乜野食！

我地叫左招牌菜三弄回味牛肉，這是一款厚切的牛肉片，有點像叉燒的口感，牛肉下面D青瓜，另外有一碟蝦片，吃的時候一片牛肉加一片青瓜，連埋汁放蝦片上一齊吃，又好夾喎！好味！食完前菜，來兩盅燉湯先，螺頭鳳爪豬展湯，好好味，湯渣都有兩大碟！跟住叫咗片皮鴨兩食，隻鴨未送來之前，侍應推咗張枱入來，用來即場片鴨用的，枱上面放咗一個金色馬奬座同埋證書，話呢款片皮鴨係中國飯店金馬奬得主，好搞笑，我地係咁影相，又攞人地片鴨把刀來玩，乜都笑一餐！見佢攞咗獎，都有所期待，不過成隻鴨片出嚟D肉真係好少，每人都食唔到兩塊！皮脆肉唔會乾，味道都唔錯，只係嫌佢地D京蔥切得太厚，一般都會係切絲，佢地就切段，蔥係要幼絲先好味！個鴨殼就切粒炒，再生菜包！仲有斑頭腩兩成，斑腩炒西蘭花，頭就薑蔥煀，好似好耐冇食過斑腩，啖啖肉就最好味，另外仲有兩食的鮑魚仔，分別有豉油王，同埋椒鹽，鮑魚仔真係好細隻，一人一隻，有D唔夠喉！跟住黃金蝦，黃金即係鹹蛋黃，呢款餸真係好耐冇食過，好好味但係好邪惡！另外我地叫咗兩碟菜，一碟腐乳通菜，一碟係鹹魚粒炒芥菜膽，炒芥菜係我叫的，因為我好鍾意食芥菜，我當然覺得佢好好味啦，雖然有少少苦味，但係芥菜本身就係有D苦！

最後想甜品，有迷你煎堆同埋蛋散，我好少食炸野，不過呢個真係炸得幾好食！另外仲有紅豆沙，真係食得好飽，食完飯，將要離職既同事，講咗好多想當年的往事，我們也不忘催婚，他口頭承諾2019年，真係想話比個女友知，不過我地都覺得佢只係隨口噏，未必成真，費事去女友期望過高啦！

保鑣救殺手 The Hitman's bodyguard

Michael 係3A級保鑣，在一次保護日本軍火商失敗後，自此一蹶不振，另一方面，前白俄羅斯領袖 Dukhovich，為了逃避海牙的軍事審判，不斷將所有證人殺害，最後只剩餘一個殺手Darius可以指証他，Darius 因為他的妻子 Sonia 被禁錮，為了讓她獲得釋放，他唯有答應國際刑警出庭作證，在國際刑警護送他到法庭前，衆人受到白俄羅斯的人襲擊，Darius 和刑警 Amelia逃到安全屋，因為他們的行蹤被內奸透露給 Dukhovich，刑警 Amelia 為了不讓 Darius 行蹤被發現，唯有委托他的前度 Michael 做保鑣，保護 Darius 到荷蘭出庭作證，卻原來Michael和 Darius 是死對頭，一個殺人、一個保護人，兩人針鋒相對，卻又要一起逃避追殺........!

套戲都拍得好精彩，兩人針鋒相對，性格南轅北轍，一個講求計劃周詳，一個諗到就做，爆出唔少笑話，對白抵死惹笑，飛車追逐、連場槍戰，絕無冷場，而談情說愛，亦同兩人性格相同，既浪漫又搞笑，都係近期值得一睇既電影！

好少星期日去睇戲，今日近近地去咗又一城 MCL，近期都好少去呢度睇戲，因為覺得佢地服務好差，上次去覺得改善咗，今次去又覺得差返，售票員同小食部的職員，冷漠又黑面，如果 UA 、CinemaCity 同 AMC都唔啱時間，先會考慮去 MCL！

飯局主場 - 第十一回

今日二人前，原本想煲湯，但係睇完戲已冇乜時間，去街買條魚，見有好多貝殼類水產，有幾種蜆、蟶子、扇貝等等，想試試炒蜆，所以買左一斤試下，另外再買左蝦，蒜蓉蒸！

先處理D蜆，先煲一D暖水，約60度水溫，用來浸蜆，然後處理D蝦，剪腳挑腸，都攪左一輪，蒸爐煲落飯，切埋D蒜蓉、豆鼓、辣椒、葱，蒸落蝦同魚，差不多蒸完先炒蜆，好快炒好，食得！

天使愛芭蕾 Balleria

Félicie 和 Victor 自小在孤兒院一起成長，Félicie 的夢想是跳舞，而Victor 的夢想是發明能夠令人飛行的方法，兩人決定一起逃離孤兒院，到巴黎尋找自己的夢想，去到巴黎兩人際遇各異，Félicie 誤打誤撞闖進了巴黎歌劇院，這是她夢想要去的地方，她無意中看見有人在跳芭蕾舞，燃起了她想跳舞的慾望，可是她人生路不熟，又身無分文，幸好得到清潔工Odette 的幫助，還收留她在 Régine 的大廈工作，Régine 的女兒 Camille 自小已學芭蕾舞，還準備參加劇團的甄選試，爭取胡桃夾子一角，她還奚落 Félicie 是茄喱啡....Félicie 收到劇團的通知信，沒有交給 Régine ，反而拿着信件冒認 Camille，進入了劇團.........!

之前睇到trailer，見到巴黎歌劇院，就想起上次去法國，和好友在巴黎歌劇院門外坐，還到對面的The Grand hotel 酒店地下的餐廳 Cafe de la Paix 飲野，套戲嘅劇情都係一般卡通片嘅模式，先苦後甜，努力不懈、尋求夢想、最終成功！套戲比較短，所以對女主角練跳舞描述得比較簡單！

Zero

經過幾次呢間餐廳，今日終於去試吓，呢度主要食Pizza同埋意粉，Pizza係可以自選配料，逐樣計，不過我哋都係揀咗餐牌上面嘅Pizza，有時選擇太多又唔知加埋好唔好食，都係揀人地配撘好既就唔使煩！叫咗個雜菇 pizza，另外叫咗蜆肉意粉，同埋辣雞翼，食物都唔錯，個意粉有少少中式，落咗D葱，都幾好食，叫咗兩杯Rainbow飲品，係幾種果汁混合一齊，不過糖漿就多咗D，所以偏甜！好似好多人唔知呢度間餐廳，晚飯時間都冇乜人，反而在4樓的食肆就已經要等位！

鯊海47米 47 Meters down

Kate 和 Lisa 兩姊妹一齊去墨西哥旅行， Lisa 因為同男友分手而不開心，兩人在酒吧認識了兩個男仔，相約一起出海睇鯊魚，兩個男仔先落水，睇完鯊魚上來，到兩個女仔，Lisa 落左海睇到鯊魚之後覺得驚，要上返岸，點知鋼䌫連起重機一同掉進海𥚃，兩人直墮海底47米，在沒有任何裝備下，又面對鯊魚的襲擊，與海面的聯繫又接收不靈，加上氧氣量在倒數，只有離開鐵籠才有生存機會.......!

套戲都拍得幾緊張，配樂功不可沒，老實說劇情確實有㸃悶，全程在海底𥚃，睇到觀眾都想佢快D上岸！

Amaroni's

今日 WhatsApp 好友近况，知道他離開公司後報讀了長者護理課程，佢話冇讀喇！仲話今晚出來食飯傾！

近近地去左又一城食，仲叫多一個明友，晚飯時間都係要等位，呢間餐廳唔係派飛俾你等位，而係有部機俾你，到你嘅時候部機就會震，我諗如果D人唔等會唔會攞埋部機走呢？我地等左半個鐘就有位喇，都好多年冇來過呢間餐廳，見佢都裝修過，我哋叫咗千層麵，一份豬扒，同埋雞，佢嘅主菜有大細份量選擇，之前嚟食覺得D嘢好大碟，而家分咗大細份量就好好多喇，我哋全部叫 regular，情原細份D，可以叫唔同野食，另外仲叫左個墨汁意粉，食到個個咀唇黑晒，好攪笑！

好友之所以唔讀課程，原來早排同太太鬧離婚，個人冇乜心機，佢形容自己行屍走肉，所以冇讀到，而家已經正式決定離婚，仲諗住賣左層樓，分左D錢，然後返阿媽屋企住，佢兩公婆結咗婚都應該有10年，由佢地拍拖開始已經無人睇好，個個都叫佢唔好娶呢個女人，而家終於睇到佢真面目先離婚⋯⋯唉！

iKon 煮角

呢兩個星期，食左幾間海南雞飯，都覺得麻麻地，今日午餐在中環，試試這間的海南雞飯！

小店在閣麟街，確實是很小的店，主要做外賣，亦有兩個坐位，全開放式格局，令我有點卻步，因為今天仍然很熱！不過見佢有把風扇吹住坐位，就即管試試！

餐牌就在牆上，還有一個類似告示板的牌，除了海南雞飯，還有法國春雞飯、乾撈喇沙等等，有點東南亞食品類型，因為想試海南雞飯，所以沒有試其他，坐下來先上三款醬料，有好多海南雞，沒有落味精，但豉油有味精，食完好口乾，呢度就冇呢個題！另外有一碗湯，是粟米蘿蔔湯，因為太熱，要等陣先飲，跟住上埋海南雞飯，睇D雞肉好靚，即刻食返舊先！好滑好味！終於有間似樣喇！油飯都好味，唔會太油膩，好食！雖然食到身水身汗，不過都值得，下次等冇咁熱先再來！其實一路食，都見斷斷續續有人來買外賣，生意都唔錯，一個海南雞飯$78，雖然物有所值，但對一般打工仔來說貴了一些，不過間中食下，都冇乜問題！

走的時候，行過一間做旗袍的店，古古舊舊的，仍然可以生存到，真是不容易！

川淮居

食完午餐，去左 City super shopping，呢兩日做 privilege night，買左小小野就返屋企，今晚又有飯局，去朋友屋企 join 埋佢去，一齊入沙田食飯！

原本想食鼎泰豐，但係有排等，改左上去八樓食京川菜，大把位！今日好友兩公婆帶埋囡囡出來，第一次見面，BB已經六個月大，好可愛，又唔怕陌生，好得人鐘意！

我地五大一細，叫左個滙豐咭優惠4人餐，個餐有燉湯，兩碟冷盤，係醉雞同粉皮，仲片皮鴨一食，有蝦球，有魚同菜，都幾豐富，另外仲加左小籠包同飯，食到好飽，因為這家食店是美心集團的，質素也不錯，成晚逗BB，好開心，好多朋友生仔，終於有個女，太可愛了！

臨埋單先發現冇滙豐咭，好友有 apple pay ，但酒樓唔收 Apple pay，好彩，另一好友有張放在銀包好耐，但冇用過的滙豐卡，唯有試試，又碌到喎！

拳王

在一蘭旁邊的這家食店，裝修得像泰拳的拳賽環境，牆上有不少泰拳的裝飾，店內坐位40個，有點逼，午市時間，只係比午餐set餐牌，要問店員攞主餐牌睇，叫左個生蝦刺身、香辣蟹肉夜明珠、冬蔭公湯、半隻海南雞同埋炒椰菜苗，生蝦刺身和冬蔭公湯不過不失，香辣蟹肉夜明珠其實係荔枝，入面有D蟹肉，食唔到蟹肉味，亦冇香辣味，感覺似食有小小咸味的荔枝！海南雞用蒸籠裝住，淋上熱汁，雞肉本身是室溫，淋左湯都唔覺得熱左，雞肉唔滑，有點嚡，頗令人失望，炒椰菜苗，一般，整體來說期望越大失望越大！