炑八韓烤

原本好友約19/1 食團年飯，但人唔齊，我諗住約其中一個19/1 可以出席的好友，兩個人食飯，點知佢見飯局唔成事，約了其他人，但係今晚就可以，所以改今晚去，佢男友知道，又話要來，咁啱另一好友又話食飯，令本來19/1唔成事，變左20/1，相請不如偶遇！

好友兩公婆帶埋兩個仔去 AIA 嘉年華，在中環 join 埋我一齊去尖沙咀，而另一 pair 好友要遲一點才到，我地去搵位先，去殿大喜屋，嘩！爆晒場，去附近極上都爆場！同好友去赫德道另一家叫伊賀的，又爆場！年尾流流，又星期五晚，周圍都好多人，上網 search下，睇下食評，同好友在尖沙咀折騰一番，都搵唔到野食！而另一 pair 又遲遲未到，在尖沙咀兜轉了近兩小時，好友才到，又想不到吃甚麼，求期見到有韓燒，上去試下！去到都要等，店員俾咗兩張枱我地，雖然只是在旁邊，但感覺像分開坐，大家唔想再行喇，所以就算啦！只係相隔一尺左右啫！

店員推介三至四人套餐，韓牛肩胛肉、護心肉、甕醃韓牛五花肉、厚切五花腩、LA牛骨、大八爪魚、蝦、魷魚泡菜煎餅，我地另外叫左醬油蟹、鰻魚、牛舌、熟豬肉，仲有石頭飯同海鮮鍋，個個都眼闊肚窄，加上好肚餓（佢地），係咁叫野食！我今日忙到5:00先食 lunch，所以唔餓，佢地飢腸轆轆，我冇阻止佢地叫野食！先來芝士粟米同埋泡菜蛋在爐邊，咁邪惡的組合我冇諗住食，不過好友夾左D比我，我先食小小，最快上的當然是醬油蟹，仲跟左一碗湯同一碗飯，好友們第一次吃，佢地話好正，我覺得ok，我上次吃過的更好！肉類方面，牛舌同韓牛肩胛肉都好味，牛舌超厚的，我地分兩個爐燒，有一個燒得過火，好韌，而另一個燒得剛剛好，好味好多！我諗起頭先睇其他食店的食評，有人話D烤肉好韌，我諗係自己燒得好唔好都好大分別，除非係燒好比你，如果自己燒，就自己功力都好有分別！

大家搶攻一輪，都好飽，呢個時候，店員問海鮮鍋上得未？！！忘記左仲有海鮮鍋！都要夾硬頂埋佢，佢哋又食咗芝士又食咗咁多肉，比我更加飽，但係我太遲食午餐，真係食唔落，個海鮮鍋仲有跟一大個麵餅，反而可以食晒D麵！飽到不行了！

食完飯，幫好友兩公婆同小朋友截的士，送咗佢地上車我哋再去飲野！

吉吉燒

上星期六先去完BBQ，今日又去，又去美孚九華徑！

上個月去過九華徑燒烤場，今次去旁邊果間吉吉燒，今日閒日，時間又早，七點鐘冇乜人，每位$148，我地廿幾人，比左兩張枱，兩個爐，我地開左一個爐先，然後燒住等，食物選擇同另一間差不多，不過我覺得D雞翼呢間好食D，但係設備就另一間好D，佢地有錫紙、仲有蕃薯食，呢邊就冇，我地有買海鮮，冇錫紙所以冇買魚，買左象仔蚌、蜆、同埋蝦，其實唔知點解佢地成日買象仔蚌，我覺得難控制，又好乾，吃起來又硬又唔鮮味，次次都剩好多！

其他人差不多八點才到，而呢度越來越多人，幾乎爆滿，今日天氣好適合BBQ，所以好多人！

西鐵燒烤場

今次人小小，五個人，諗住去美孚九華徑 BBQ，今日星期六，加上凍左D，兩間都爆晒！我地買左海鮮，唯有轉場，打去西鐵燒烤場，有位！即刻坐西鐵去元朗站，去到都仲有位，有兩個朋友到左，佢地帶埋七個月大的小朋友來，上次見佢係剛滿月，咁快半年了！

我地先去洗海鮮，今次只係買左條烏頭、蝦、同埋唔知乜嘢蚌定蜆咁，唔相淨係比錢入場，食下呢度提供的食物，烏頭好大條，用錫紙包住燒，其他真接燒，好友帶子車里子和士多啤梨，仲帶左牛油同刀，又帶左個大膠袋比我地放外套，唔使D外套都有燒烤味，好細心！

今晚雖然得六個人，都食得好開心，臨尾我地成班燒麵包，本來話飽，仲可以一人食兩、三塊方包，麵包燒熱左，再塗蜜糖燒一燒，趁麵包仲熱，再塗牛油，好邪惡呀！好友仲要卷腸仔食添呀！

Brook's cafe

吃完 lunch ，去利東街行下，成條街大紅燈籠高高掛！好靚，好有氣氛！

呢度仲有個地庫商場，入面有大約十多家商店，而且日後會有地鐵出口直達，這裡的商店都是比較迎合遊客，也有一家超市，不過好細間！

見到一家日式咖啡店，仲有抹茶食品，就坐低食杯野，叫左抹茶巴菲同一杯藍山咖啡，抹茶巴菲有塊咖啡豆造型的蛋糕，個樣幾得意，而藍山咖啡送來的時候，聞不到咖啡香，而且喝起來，味道不太像之前飲過的藍山咖啡，有點失望！

鴛鴦口味

十三號黑色星期五，都要出街！今日明顯凍左，仲落雨添！今個冬天，最凍都算今日，最低14度，終於可以著羽絨！

去灣仔食 lunch，在春園街，試試呢間食肆，之前睇電視，介紹佢地招牌菜，黃金蝦多士配子薑皮蛋、慢煮柱侯牛面肉配彼得包、話梅醬配慢煮醬燒豚肋骨，好想食！去到睇睇餐牌，見到得 set lunch，問店員有沒有其他餐牌，店員説只有 set lunch (-_-)，我諗只有晚市才有機會食到！費事再諗去食乜，唯有食 set lunch！

餐牌有慢煮豬扒，食唔到慢煮醬燒豚肋骨，食豬扒都好！另外叫左咖哩雞，所有 set lunch 都是跟沙律同湯，湯係西蘭花忌廉湯，味道唔錯！先來咖喱雞，咖喱有少少辣，雞肉頗大塊，味道唔錯，萬煮豬扒好厚身，豬肉呈粉紅色，肉質算嫰，只是不夠 juicy，有些近骨位置看似唔熟，雖然知道慢煮的豬肉，顏色是淡粉紅色的，唔熟的部份是生肉的顔色，而且只有小部分，所以不吃為妙！整體來說，這是一間高級一點的茶餐廳，食物質素固然好一點，店員的服務水平也好，希望有機會試晚餐！

天煞異降 Arrival

Louise 是語言學家，她經常在腦海出現一個小女孩，和她一起生活的畫面。一天，神秘的太空船穾然出現在全球十二個國家，軍方無法辨別這些外星生物是敵是友，於是找上 Louise 這個語言學專家，另外還有科學家Scott，藉着兩人專長，嘗試讓他們與外星人溝通，再分析他們的目的，由於無法拆解外星人的語言，Louise 用寫字的方法，從基本開始，逐步了解大家的語言......!

套戲前段頗緊張，主角進入太空船，有好多未知的情況，所以睇得好肉緊，不過後段有D悶場，因為破解咗好耐，都唔能夠了解外星人表達D乜野！近排真係冇乜好戲睇，之前聖誕檔期都已經冇乜戲好睇，非黃金檔期更加冇！

香港迪士尼樂園 - 鐵甲奇俠飛行之旅 Iron Man Experience

期待已久的鐵甲奇俠，終於在10號開幕啦，趁今日放假入去玩下先！

今日遲咗起身，入到去都成三點幾，預咗要排個幾鐘，所以一入園，就直接去排隊，經過鐵甲奇俠商店旁邊，見到有條人龍，排緊鐵甲奇俠裝備展，條人龍都頗長，直接去到鐵甲奇俠飛行之旅，見唔係好多人入去，入到去行了一段好長好長的排隊位，但係唔係好多人，因為唔知仲有幾遠先到，要排前D先知係咪好多人，不過沿路有好多裝飾╱展品，又有播影一D影片，而且人龍都 keep 住行，行到去取眼鏡的位置，大約二十分鐘，比預期少人，呢個遊戲係模擬駕駛艙，見到有五個定六個駕駛艙，每個駕駛艙有五排，要在駕駛艙外排隊等入場，入到去見到每排有九個座位，不過工作人員冇數人數，所以有幾排冇坐滿，我坐第四行，坐低後要扣安全帶，手袋要放櫈底，戴上眼鏡就準備玩喇！呢個遊戲有D似大阪環球影城個 Spider-Man 遊戲，只係坐位唔識轉動的分別，而且因為是模擬在駕駛艙內，所以沒有風吹的體感，只有在打爛玻璃的場景才有風，不過個人覺得好玩，迪士尼終於有比較刺激的機動遊戲，有兩下都撞到個頭，真係建議樂園加返個軟墊在椅背好D！

出到來見仍然冇乜人，又玩多一次囉！今次仲快左，只需要15分鐘就玩得喇！今次坐第二行，近返D，見駕駛艙其實只係開左兩三個，有D駕駛艙冇比人排隊，應該係冇開，可能今日比較少人，今次有小朋友坐旁邊，他們還大聲尖叫呢！

玩完出來，行左一陣就走，今日只係玩左呢個遊戲，在小鎮大街睇左一陣，樣樣野都覺得等減價先買，真係所謂唔等洗既野喇！所以乜嘢都冇買過就走喇！

牛屋餐廳

約了好友食飯，已經有年幾無出來聚會，今次去佐敦食牛扒，呢間餐廳好舊，地方亦唔大，坐位大約廿個，枱櫈都比較細張，我地一行五人，仲驚冇位，不過今晩無乜人，只有兩、三枱客，之前上網睇過食評，好壞參半，既然好友想試，就一齊試下！

餐牌主要係扒類，因為其中一個好友未到，所以我地叫左小食，食住等，叫左雞泡魚乾、椒鹽鮮魷、鴨胸，小食逐碟上，明顯係即做，好友都好快到左，三款小食味道唔錯，睇完餐牌，我哋揀咗招牌菜威靈頓牛柳兩份，銀鱈魚大蝦、咸豬手，每款食物都跟飯同意粉，仲有餐湯同麵包，餐湯唔係細細碗，都幾大碗，招牌菜威靈頓牛柳，是牛柳外包一層酥皮焗，牛柳冇乜牛味，有點乾，可能食過濃味韓牛和Dry aged，一般牛扒已經覺得冇乜味！加上要入焗爐焗，好難才做到 juicy唔乾吧！意粉唔係一般茶餐廳果D又粗又淋既質素，係幼身D同乾身D，我以為會好茶餐廳果種添！銀鱈魚同咸豬手都ok，整體食物都幾好，我諗食評好壞，視乎個人的飲食經驗，同埋對食肆的期望，我諗住似茶餐廳，比預期好就喜出望外，相反期望好高，就往往會令人失望！

街角遇見貓 A street cat named Bob

James 係一名癮君子，他靠一支結他，在街頭賣唱，他沒有居住的地方，他希望重新做人，但飽受挫折他參加了戒毒計劃，可惜受到朋友巴斯的影響，再一次吸毒，還差點因過量吸食而送命，獲救後，他希望能夠戒除毒癮，他見社工，又飲美沙酮，社工亞慧覺得他真心想戒毒，所以協助他上樓，讓他有地方居住，重新過新生活，在他入住新屋之後，來了一隻自來貓 Bob，他認識到一個女鄰居，他希望能夠過正常生活，他帶着Bob ，在街頭表演，吸引了不少人前來觀看，同時，亦惹來不少麻煩，令他再次走到人生的困境⋯⋯！

真人真事改編的故事，電影結尾有播放故事主人翁的相，雖然套戲有點長，而且唔少鏡頭係第一身拍攝，睇到我暈暈地，不過每場貓貓出現的場面，都令人覺得好可愛！