$10 特賣場

28-10-2007

今日去左旺角hea左半日,雖然早晚都涼了,但係下午仍然有點熱,條街咁多人,最好揾個地方hea,我就去左冒險樂園玩左一陣,想用d票換野,又唔多啱使,想換果d又唔夠票數,留返遲d先換. 跟住上左樓上間吉之島$10店行,我行左好耐好耐,佢好似迷你版既spotlight 咁,當然冇spotlight咁多選擇,但係都好多野賣,大部份都係$10,我見d Pastel bowl 好靚,原本想買粉紅色呢對,我又覺得佢太細,見到d水杯,水樽都好colourful, 見個迷你鐵板燒都想買,圓形嗰果好似好d,但係寫住唔可以"省"佢,咁係咪會甩油架?四方形嗰個有手柄都幾方便,但係燒野食時d汁咪漏晒落個火度?我見佢個圖重係用平面電磁爐tim ?????之前見過d迷你炭爐,佢呢度得迷你炭,無個爐!!!!!!!!!give up啦 !!!!最後我都係買左洗衫袋,膠盒,儲衫袋呀咁,都買左成$120,比錢時個男店員問我有冇J 咭?我話冇,佢停左手望住我,我望吓佢"好面善"!佢問我認唔認佢,我望吓佢個名,記得佢曾經响我公司做過part-time,記得個名唔認得個樣!

Hea 完去左朗豪坊揾食,上左12樓Ozone 聽 live, 好耐冇聽過 live music, 今晚唱歌個男仔叫吳彤,依家d年輕人,多左好多機會去尋找自己的夢想,真幸福!!!!聽live真係個feel好正,加埋背後d燈+則面d流水+陳奕迅既慢歌............So Romantic !

夜晚收到亞孫既SMS,佢話已經係第三年同我過生日喇!佢送左條scarf 比我,好開心,可以成班一齊聚吓已經好開心,我希望大家可以keep 住呢份友情,好多朋友因為轉工,拍拖,結婚,生BB而漸漸少見,各自有自己的生活圈子而日漸生疏,就算有聯絡都可能係一年見一次半次,甚至可能更少.......!

18樓BBQ

27-10-2007

今日去左Suki屋企BBQ, 我以為佢住村屋,原來住大厦,上到佢18樓既屋企,原來佢屋企有個大露台,對正對面係公屋,感覺好特別,不過我唔敢行咁出,驚驚!

Suki買左好多野食,有大大隻既蝦,大眼雞,雞翼,金沙骨,腸仔,魷魚,腎,牛丸,青椒,金菇...................我同Suki,Moon, Rita 一路食一路傾吓計,都幾relax,食完野又同佢嗰三隻倉鼠玩,好難捉到佢地,就算有野食都引唔到佢地,佢地動作太快喇!

食完BBQ出去旺角揾Gary 同阿魚,點知阿魚話要返屋企湊女,唔出黎,我地唯有行住街等阿孫,點知行行吓遇見Gary !佢話約左阿魚一齊返去.........!我地去左元綠食住等,阿Cool 黎先,跟住阿孫先到,我地屈左阿Cool請食飯,然後去左發記食甜品,一人一碗榴槤飄香,然後Cheers !!!!!!Happy birthday !

呆

這幾天身心都很疲累,昨天早上買了個蕃薯麵包,$10個,賣點是內有原個蕃薯仔,外型也像個蕃薯,味道唔錯,我以為食完會好飽,原來都唔係.

夜晚去超市買菜,遇見Vincent ,他竟然對我說"生日快樂",真令我感到意外,雖然我未生日,但係估唔到佢會記得! 之後去超市買菜,最近我成日買有機芥蘭苗食,我鐘意食芥蘭,但係唔鐘意粗身嗰d,要切細黎炒,芥蘭苗就啱晒,嫩d,又快熟,炒牛肉就最啱!不過我見到有豆苗賣,又到冬季先有得食,即刻買包返去食!

尋晚瞓左十四個鐘......好似將成個月既疲累一次過瞓夠咁,起身時個頭暈暈地,好想繼續瞓,我唔想瞓咁多,起左身個人都呆呆地..........zzzzzzzzzzz

今晚去酒樓食飯,去酒樓之前見到美心出左d Halloween既蛋糕同甜品,想食d甜野,就買左個 jelly 杯,佢地d蛋糕靚左好多,但係好似無咁好味!去到酒樓,覺得好凍,叫左飽魚,蒜蓉蒸海蝦,椒鹽泥鯭,蟹粉小籠包,蒜蓉豆苗,好飽呀!飽到個人呆呆地........!

快樂尋回犬

一部未睇已經知道會睇到喊既電影,男主角我覺得好熟口熟面,我知道他演過"愛、回家",但我沒有看過這電影,後來想起他演出過"悲傷戀歌",演男主角的童年角色,講返呢套戲,劇情有點"老土"但狗狗的遭遇很令人同情,它的死更令人忍不住哭起來,眼淺的朋友最好不要看,原本我想睇合約情人,只是時間不合.

睇完戲去左Log on 行,見多人排隊買野,原來係Apple 電腦,d店員忙於交貨給人客,我聽到那店員問一個女人,係咪要$9400個部?有貨呀!你排隊比錢啦!!香港人真係有錢, 成萬銀都排隊搶購,半小時已經有十多人買,真不知一天會賣幾多? Apple 的電腦外型確很型,或者將來換機會考慮佢!

200 - EVAN ALMIGHTY

200 篇網誌了! 寫這200篇網誌前後近三年了,再睇返D舊既網誌,好多事好似無幾耐之前發生,卻原來已經兩三年了!時間過得真快!!

今天看了Evan ALMIGHTY 這電影,願先抱着看笑片的心情去看,看完卻有點感動..................戲中男主角因上帝要他跟創世紀第六章十四節,像挪亞一樣做方舟,人人都以為他儍,他的妻兒也離開他,當他妻子在食店的電視見到新聞報導其夫的"怪行"時,上帝出現了,他化身成侍應,借故與她交談,她訴說着丈夫的問題,上帝說 (不太記得對白,內容意思大概是這樣) :
"這聽起來是個機會!",
"人們祈求耐性,上帝是否該賜予他耐牲,抑或表現到耐性的機會?, 人們祈求勇氣,上帝是否該賜予他勇氣,抑或表現勇氣的機會? 人們祈求一家團敘, 上帝是否該賜予他感暖感, 抑或令他們團結一起的機會? "
短短幾句對白,令她恍然大悟,也再次提醒我,面對困難時所抱的心態,片末有一埸所有動物雙雙對對的上船,那場戲不知怎的,令我很感動,可能是男主角受盡白眼,排除萬難,終能令方舟建成,那一刻的成功感,使命感,有點感同身受, touching!

腦年齡

29/8/2007

我個 friend send 左條 link 比我玩腦年齡測驗, 登入後先按 Start, 321後記住圈圈裡面的數字,數字消失的時候, 再依照數字由小到大去按 在圈圈上,玩十題,試吓啦! 測試結果話我腦年齡係20歲呀!!!!

http://flashfabrica.com/f_learning/brain/brain.html

蒜蓉牛油焗雞翼

27/8/2007

前日抽唔到獎,我買嗰兩個銀包就比阿民同阿天抽到,阿民上次抽到LV銀包,今次又抽到Gucci銀包,真係好彩!

尋晚好想食雞翼,我諗起以前响金鐘返工,最鐘意食名都酒樓既蒜蓉牛油焗雞翼,每次我地都要食,都好耐無去過名都飲茶,我淨係食佢地既迷你月餅,無咁甜,同埋比較"乾",細細個,唔太"漏"!

等我試吓自已整焗雞翼,個焗爐都好耐無用過,我自已"刴"蒜蓉 (手都軟!), 加牛油同小小盬黎焗,不過焗得唔夠脆, 我見d蒜蓉開始有d燶,就熄爐,其實可以焗耐d, 但係我好肚餓,忍唔住要食啦! 味道都OK啦, 當然無酒樓嗰d咁好味啦!

老點遊戲

到我比公主老點!

遊戲規則如下:

A.　必須點名至少8個人，要用盡辦法通知各人參與這個遊戲， 人數不夠的話就少點，2個以上就行。B.　被點名的人不可重複被點，每個人只可玩一次。C.　回答問題當中時，需自行刪除一個不喜歡的問題，更 新一個新的問題，然後點名其他人來玩... 如此延續這個遊戲。D.　答案需在各自的blog內公佈。

開始遊戲:

寫出填寫日期：August 26, 2007 (HONG KONG TIME 0 : 48PM)

1.如果30歲還嫁不出（娶不到）你會怎樣？
答 : 我30歲前嫁咗啦

2.如果有機會可以讓你重回一個時間，你會選擇回到那個時間？
答 : 12歲! 升中努力讀書!

3.你介唔介意人地點睇你?
答 : 基本上無所謂,睇吓嗰果係乜人?

4.如果唔駛返學/返工你會點呢？
答 : 四圍去,去d一直想去又無機會去既地方.

5.　如果中3800萬獎金，你會怎麼花？ (新問題 )
答 : 比d錢屋企人, 然後買樓 ! 去旅行 !

6.你最怕的事情？
答 : 病!

7.你覺得邊件事係令你最難忘既？
答 : 太多啦!

8.這輩子最想去的地方？
答 : 印度

9.你能放下現在的生活，去鄉村或其他城市重新開始嗎？
答 : 視乎

10.　最愛的食物：
答 : 桃

11.最愛的顏色：
答 : 綠色

12.　最愛的休閒：
答 : Massage

13.　當你遇見一個想結識的人會說什麼:
答 : Hi ! 你咪係.............我係咪識你架?

14. 現在最想做的事?
答 : Massage !!!!

15.　最愛的口頭蟬：
答 : So ? than ? well ?

16. 最喜歡的地方:
(新加)答 : 廸士尼

17.　最愛的季節：
答 : 秋天

19.　最了解我的人：
答 : Ricky

20.　最愛的私人時間：
答 : 在炎夏的晚上,開行冷氣睇雜誌/書

21.　最想見的人：
答 : Edmond

22.　愛的定義：
答 : 無條件付出

23.　心中嘅目標：
答 : 健康活到七十歲,然後有一晚瞓瞓吓死左!

24.　家下嚟緊最想希望嘅嘢
答 : 中六合彩頭獎

25.　最喜歡的地方：
答 : Home !

26.　當你好沮喪的時候，你會選擇做 D 咩?
答 : 自閉

石鹽 Halite

23/8/2007


見到呢張石盬既相,覺得有d可惜,因為佢已經溶左!!!!我雖然無跌左佢落水,但係無同佢做防潮,响三月最潮濕既日子,佢就溶左啦,無晒d"角",變左圓圓地,佢週圍既野都變左好似比一層盬幅蓋左咁,都好難買番咁靚既做型囉!

今日出左尖沙咀買禮物,行到腳軟,所以我响五個鐘頭內食左三餐補體力!哈哈哈........先食左碗牛什麵 (唔記得試吓嗰度最出名既"怪味雞"tim!) 然後去左LV, 嘩!勁多人.....排隊呀!所以我give up 唔買LV ! 去左Gucci , Prada , Vivienne Westwood, Agnes b......... 睇睇!睇到肚餓再去左City super 食左個冷烏冬配八爪魚丸,d烏冬好長,好難夾黎食!食完我去左銅鑼灣,又係勁多人!老實講,d名店係無Service可言!d態度冷漠,唔志在,無笑容!但係d人好似唔使錢咁!排住隊去買!我唔係有任務在身真係唔會去!又多人又唔夠冷氣,同人"逼"左一輪先買到!梗係要食d野先啦!哈哈.......跟住去左許留山!食左咖哩什錦同埋金撈爽.........爽呀!

煎釀青椒

21/8/2007

連日來收到大家的鼓勵,很多謝大家的關心,在此多謝大家!

係時侯整d野食吓,獎勵自己 (為食藉口!),好想試吓整煎釀三寶,但係買唔到長青椒 (夠辣!) 所以買左燈籠椒,因為一包有三個,所以唔整矮瓜,太多食唔晒,我用魚肉加豬肉來釀,味道唔錯.

今日阿民揾我食飯,食食吓有隻大曱甴响我地附近走來走去,嚇到我地坐唔安食唔落,即刻調位,但係佢又跟住我地,好彩有個侍應埋去處理左佢,我地先放心d,下次都唔會去!

邁向新的一天

18/8/2007

今日開始,新的環境,新的人和事,我帶着亞孫送給我的史廸仔掛錶,開始我的新生活,收到很多很多的朋友SMS和 email,很感激他們的關心,希望他們都快樂地生活! 今日同阿偉食晏,去左飲茶,好耐無去飲茶了,重要係有點心車既酒樓,好開心,阿偉須然一直都無表示,但係佢好有心, thanks Wai! 我地可以一齊去旅行啦!出年可以去啦!!!!!!!!!

寫我心情

9/8/2007

下着雨的晚上,像我的心情一樣,離別在即,心情難免依依不捨,心裹充滿着矛盾,雨後會有陽光嗎?還會見到彩虹嗎?這幾年的風風雨雨,波折重重,都一一渡過了,我記得小學畢業那年,老師在我的紀念冊上寫"勤勞雖有苦味的根,卻有甜美的果實"我想,那苦味的根已長出了甜美的果,只是我還未嚐到.........!早已知道今年會很難過,撑了七個多月,還是撑不下去,面對未來的日子,眼前只有一片空白,唯有寄望明天會更好!

雙喜臨門

7/8/2007

尋日係好日子,我個 friend 阿 Janet 結婚, 而另一個 friend 阿魚同 Gary 既BB女出左世啦! 成3.5 kg,算幾重磅, 不過我去唔到飲,又去唔到醫院睇BB,睇吓明天可否去探BB, Gary 好開心,零晨六點幾SMS比我話入院, 八點幾就生左,好快,尋晚同阿魚SMS 互報現况,好想快d見吓佢, 雖然我成日叫佢地唔好生 (地球污染越來越嚴重!依家已經熱到35度,第時無冬天,下一代既生活唔知會點?) 不過都"鄧"佢地開心,希望BB健康快樂!重要諗吓送乜野比佢地好.

前兩日同Suki 食飯,一坐就三個幾鐘,一講起阿孫就覺得好痛心,唔明佢究竟點諗,希望佢可以成熟d.同Suki講開去玩,佢話想去 Ocean Park, 我就話想襯昂坪無吊車坐,去昂坪玩, 唔使驚坐吊車,佢就反對,我想話不如再去廸士尼..........我驚佢話我傻! Anyway , 到時再約啦,其實我都同佢去過2次,都玩得好開心!我成日都睇我地成班同小熊維尼影嗰張相........當時個個都好開心!

變形金剛

一直都想睇變形金剛,加上Blog友極力推薦,原本想睇五星級大鼠,都係睇左變形金剛先,今日去到戲院都差d買唔飛,原來套戲成144分鐘咁長,買完飛食左碗麵就入場,去到小食部排晒長龍,竟然得一個人賣野,好在都趕得切入場.

成套戲好精彩,果然值得一睇,早知去太古城睇啦!由開場到散場都好緊張刺激,多場電腦特技做得非常好,像真的一樣,不得不佩服史匹堡,十年前的侏羅紀公園和現在的變形金剛,同樣令人喝采.

抖抖氣

忙左幾日終於可以抖抖氣,連續失眠左幾日,琴晚終於瞓返覺好既,精神晒!

今日响櫃入面"見到"呢支史廸仔筆,我幾乎唔記得我買過呢支筆,一見到史廸仔就想笑,諗起佢响套戲入面幾百厭,又諗起 Blog友同佢個"仔"d攪笑對白.......下次買第二集睇吓先!

前幾日响Yahoo Blog 到見到個fd既Blog,今日再去睇,佢已經Delete晒d 日誌??唔知點解?
我老細前兩日突然問我有無去整蛋糕,我話無,因為我懶,如果有朋友生日都係買算啦!又平又快!不過,如果好close既fd,都可能會整既,到時先算!

今個Sunday 係我個fd Janet結婚,去唔到飲,真係可惜,有d遣憾tim!

睇吓史廸仔幾得意,可以左右搖擺架,不過太大支帶出街唔方便!

豉油皇亁煎扇貝

天氣好熱,唔知食乜好,想起之前睇飲食男女介紹過一個由江獻珠教煮既煎扇貝食譜,一直想試煮,我去超市見到只有雪藏的,大大粒賣$45有八粒,就買返去試吓,做法都好易,只係將扇貝煎至兩邊金黄,夾起d扇貝,原鑊爆一爆蒜頭同葱白,爆香後撈返起蒜頭葱白,扇貝回鑊,落埋頭抽+生抽(食譜用盤曬生抽,我無!)+糖,糖溶就完成,d扇貝煎完細粒左好多,細左一半呀!不過好好味!(我又讚自己),講起盤曬生抽,我之前想買,要成$260支!!!仲要去官塘買,不過好似話要好多年先整到,同埋話好好味喎!所以先咁貴,有機會買比阿媽試吓先!

14歲的媽媽

今日睇電視見到出左呢套"14歲的媽媽",將會在明珠台播,前幾日我個friend比左呢隻碟我,睇左幾集,覺得有d似"一公升眼淚",都係睇到人睇濕濕,我個男同事話睇到喊,我認為如果覺得"一公升眼淚"好睇,呢套都差唔多,女主角都係有個幸福家庭,男主角又係同家人關係唔好同埋比較沉默寡言,重有係一樣養左隻狗仔!女主角係"女皇的教室"那個小女孩志田未來,其實睇左幾集都估到故事發展係點,等我睇多幾集睇吓係咪估得啱先!

沙田~~熱!

今日入左沙田,勁熱呀! 好耐無去過沙田行街街,個商場裝修後靚左好多,不過商場與商場之間都好熱,可能走左d冷氣. 我见到史諾比公園就去睇吓,睇一陣已經流晒汗!!!!實在太曬了,我就走返入商場凉冷氣同埋行City Super .
呢間City Super 我未去過,入到去覺得好似响厨房咁,好大陣煮食氣味,無咁好行,都係Times square好行d,我行左個圈就走,跟住出返九龍,同阿孫,阿偉同Desmond食壽司,去左板前,可能太熱無乜胃口,不過面對鵝肝壽司又點忍得口呢?

豆腐芝士蛋糕

14/7/07

今日同阿孫食晏,第一次去 rice paper 食越南野,個度d裝修怪怪地,有小小越南feel, d食物又唔係咁正宗咁,有d似EXP,可能同一集團,d制作好似,我地叫左生牛肉河set lunch,春卷,炒菜,飲品,嗰個waitress姐姐全程黑口黑面,囉飲野埋黎問杯野係邊位既,但係完全聽唔到佢講乜?唔怪得無乜客,我地order蛋糕時,去雪櫃睇完先叫,我叫左豆腐芝士蛋糕,豆腐味好淡,芝士就唔"漏",一句講晒,唔會再去,食物普通又無service駛乜咁貴幫襯佢?兩個人食左三佰大元,唔值呀!

UNIQLO

8/7/2007


終於去左新開嗰間UNIQLO睇吓,雖然沙田已經有一間,不過我好少入去,等九龍塘呢間開先去行吓,可能係新開啦,勁多人,不過真係好多Tshirt款,質地都唔差$129兩件都算OK,我買左件藍宝石王子卡通片圖案既tee,嗰d一格格漫畫係袋黎架,都幾得意!晏晝好想食麵包,即刻叫阿勝去揾華哥,問吓有無麵包出爐,我想食皮脆包軟熱辣辣無餡既麵包! (係咪要求好高呢!) 點知真係有!簡單既提子麥包,我食晒成個呀!唔該晒阿勝!!!!d皮好脆呀!好好味呀!本來想留番件比阿天,我都忍唔住食剩半件比佢咋!

水矽釩鈣 Cavansite

這幾天的天氣有點鬱悶,時而天晴時而下雨,在電腦翻看一些舊照片,再見到這張水矽釩鈣的照片,它的做型像架小小的直升機,很cute,那些細小的晶體清可見,現在用同一部相機已影不到這效果,不知是相機用久了效果才差了,抑或是我退步了?

跟蹤

30/6/2007

今日同阿孫去睇戲,我好少睇港產片,今次順佢意睇左呢套跟蹤,兩大影帝主演,唔知點解會揾徐子珊做,anyway,電影拍得不錯,有點緊張氣氛,任達華戲份較多亦多一點發揮,他今次的做型與他之前的有很大分別.

睇完戲 join埋阿魚去揾Suki 同Moon,一路都碰見好多friend, 揾Gary 嗰陣見到呂生同强强,跟住見到阿棋,去到朗豪坊又見到舊同事,我地幾個去左KFC坐,又見到Janet,唔知點解大家既說話少左,可能太耐無見,感情好似淡左,我地等埋阿Cool, Gary 同嘉嘉,一齊去左周記避風塘食飯慶祝Suki同Moon生日,我地坐特大卡位,嗰度九點後特價,小菜$29碟,味道唔錯,不過細碟左d,我地叫埋炒蟹同中蝦,埋單$836,九個人食都唔算貴.阿魚預產期响8月,佢都陀得幾靚,見佢肚圓圓我以為佢會生仔,但係佢話照到係女,都無所謂啦,最緊要健健康康就得啦!

Patisserie

今期忽然一週,內裏的飲食男女名為07 cake bible, 介紹了一些餅店,也不是介紹很多,而是介紹一些鮮為人知的餅店,對我們這些有做餅經驗的人,有些都是知道的,例如出版了日嚐甜品一書的作者,倒是那些酒店內的餅店沒有吃過.
上期介紹的在麼地道的日本食店好想試吓,昨日出去尖沙咀也想不起,唯有下次去吧!

Miso

28/6/07

今天約了姊姊晚膳,她帶了女兒去電髮,還帶了她的兒子出來,雖然端午節見過他,今天卻覺得他長大了很多.

姨甥女在商場跑來跑去很開心,她只有5歲,說話有點老積,我們在Ocean Terminal 行了一陣,便去了Gateway那邊吃飯,原先想去UCC,但他們要関門了,便去了旁邊那間Miso日式食店,是M.A.X concept 旗下的食店,裏面的燈光很暗,食物還算OK,最好是那個"柚香清酒蠔杯"甜甜地的清酒內,有一隻小小的生蠔和柚皮絲,大大碗冰住蠔杯,一飲而下,蠔很鮮甜,酒昧不太濃,很適合女仕口味,而那客"脆脆蒜香西冷燒卷"也很特別,牛肉卷內有炸脆了的蒜片,很香脆很特別,我們還叫了鹽燒油甘魚頭,海膽壽司,煎鵝肝壽司,稻庭烏冬,好飽呢!那油甘魚頭不太好,比較腥,我們還叫了兩客甜品,一客是安倍川榚餅,一客是暖蕉撻拌檸檬雪芭,那個糕餅用豆乳浸着,豆乳裏有黑豆和百合,還用紙火煱暖住,個糕像糯米糕,都幾好味.

墨魚韮菜花

之前在報紙看到一道韮菜花鮮魷,好想試整,但係買唔到魷魚仔,只係見到墨魚仔,大概差不多吧,便買來試試,用蒜頭和辣椒爆香墨魚仔,味道唔錯,只稍嫌不夠辣味,我諗會再煮既.

化妝掃

昨日睇報紙見到化妝師介紹買平價化妝掃,見他推介的化妝掃主要是一些$88的貨品,其實一些有牌子的化妝掃套裝,價錢貴少少,質量有保證些,我睇完再看看自己的一套化妝掃,都好齊全,細細支連埋皮套帶出街都好方便,再用埋專用清潔液得閒洗吓,都好耐用,我較喜歡Bobbi Brown的掃,也買過Shu Uemura, RMK同埋Giorgio Armani,比較長身,不便帶出街.

晚上整左d啫喱,加埋水蜜桃,雪左一晚,今晚食得!Yummy !

今日我同事阿偉個哥哥做左爸爸,佢阿嫂生左個仔,成家人都好開心,但係前日就有另一個friend佢太太小產左!!上個月先飲佢地餐喜酒,佢地有左bb先結婚,由於個胎唔穩定,佢都住左幾日醫院,加上擺完酒又要飛返大陸再擺酒,舟車勞頓後就無左啦!唉!!!!!不過佢都重後生,第日重有機會既!

Panda & to-fu@Ocean Terminal

尋日個電腦上唔到網,今日又無事,原來我除左上網同儲存資料外,唔會點用電腦!

去左Tsim sha tsui 行左陣,好多人呢!見碼頭擺左好多隻熊貓,慶祝回歸十年,每個年份一種色,好多一家大細影相. 上到去見有一個好小型既To-fu公仔展覽,最近成日見到呢個公仔,都幾得意,不過唔鐘意佢唔笑,我前兩日見過一款好似百福豆腐包裝既做型,都幾可愛!行過一間shop見佢地個show window 有個人咁高即巨型雪糕裝飾,好特別,之前見呢間shop既display都好有心思,好似係賣童裝既,就响Evisu對面!

DIY 耳環

今日去左旺角食晏,去百味買左兩包冷麵同布丁奶茶,就當一餐,食完响旺角中心行左個round,買左件背心,我都好耐無買過背心,因為驚d拜拜肉粗手臂嚇親街坊啦!不過見件背心只係$50,著返件外套襯吓都ok.行行吓見有間shop賣耳環,$9對,重買三送一,咪睇吓囉,好多款一係好大揪,一係有d娘,不過我見d款大揪得黎都可以拆開黎改款喎,而且屋企有d零零碎碎既水晶珠仔...............唔!一於動手DIY........here we go!!!!!!!!!!

第一張相係嗰4款耳環既原貌,承惠$27,左邊嗰兩對,我嫌個圓圈同菱形好娘,尤其嗰圓圈上面嗰兩舊類似魚仔既吊飾,但係d配飾都好多,好useful,最左嗰對我同其它耳環mix& match 變左三個款,而右邊黑色嗰款都ok既,只係銀色粒珠有d甩色,可以換粒水晶落去,而黃色嗰對,揾唔到合適既珠,所以唔改.


Original


配方型紫水晶.................Cool!!


加左水晶嗰三款,好滿意,不過手指頭好痛耶!點解寫寫吓blog聞到好香糭味,唔道隔離屋半夜包稯?好想食tim,唔知大肚公主有糭食未呢?我聽日有得攞喇!

Fantastic 4 - Rise of the silver surfer

今日睇左呢套戲,鍾意睇電腦特技既話就啱晒,大量特技制做的驚險場面,又有d攪笑場面,充滿娛樂性,笑吓又多野睇,好過睇蜘蛛俠同魔盜王,起碼無咁悶先.

晚餐去左食京川菜,有小籠包,上海粗炒,雲吞雞,火腿津白,同擔擔麵,好飽!d小籠包好好味!

仲响Logon買左兩對耳環,我足足睇左成個鐘先睇啱!跟住有人响度做research,咪幫佢做吓,做完送左個隔熱手套比我,又係隔熱手套,究竟有無第二d野送,我都收左3次喇!!!!

蘋果酢

原來成個禮拜無update個blog,黎緊呢幾日得閒d可以寫多幾篇!

最近媽媽的朋友教她用日本蘋果酢浸蒜頭來做保健飲品,媽媽說她飲了之後腸胃好了,因她長期服葯的副作用影嚮,令她腸胃不好,最近見她開心了,可能飲了這蘋果酢後健康改善了,心情也好些,她說要在日本百貨公司才買到,前幾天和姊姊吃飯時,在Sogo見到,便買了支細的試試,每天飲一茶匙,又好似暢順左喎!

去開超市,緊係要買吓零食,買左我喜歡的Jagabee薯條,雖然熱氣,間中食吓都無乜問題,仲買左魚仔同埋糖果,見有d乾果零食,係比較少見到既蕃茄乾同小紅莓乾,d蕃茄乾幾好味,口感好得意!等我下次再買先!

牛皇星

昨晚約好了幾個朋友,諗住去食Mr. Steak 既日本和牛Buffet,但係 book 唔到枱,都知道勁多人,於是轉去吳松街嗰間牛皇星食牛肉火煱,一行四人我同Ronald,阿偉同阿孫坐的士去,而嘉嘉就之後來會合,間店坐滿人,佢地安排我地坐樓上,樓上只有我地一枱客,好似包場咁!


由於一早温左書(飲食男女),一坐低,先叫個清湯底,然後叫左一客牛肉粒,這個牛肉粒即使煮耐左都唔韌,好好食,而另一碟叫牛姜,白色一片片像象拔蚌,一灼即熟,味道像肥牛的肥膏,但係口感爽脆,仲有牛脷托,我冇食到,對牛脷興趣不大,所以無食,跟住係牛肉刺身,切得好薄既雪花肥牛,味道平平,最後係牛肉片(頸位),本書話呢嗰頸位牛肉片好嫩滑,果然係好嫩滑,好好食呀!!!!!!!!!一定要食,係今餐最好食既一道"菜",我仲叫左墨魚滑,好味!


個侍應只係招呼我地一枱客,成晚聽我地傾計,都忍唔住答左幾句,今次見嘉嘉對雙眼皮自然左d,真係成個靚左,唔怪得咁多人去整容,食完飯我地三個女仔去睇化妝品,嘉嘉話想辭職,因為人工低,時間長,我地都叫佢唔好做,但係佢耳仔軟,比佢阿姐氹佢做多一個月,希望佢到時走得成啦!